Exodus 14;1-31
14 Ndien Jehovah ọdọhọ Moses ete:
2 “Dọhọ nditọ Israel ete mmọ ẹfiak edem ẹkenam nna ke iso Pihahiroth ke ufọt Migdol ye inyan̄ emi asakde iso ese Baal-zephon.+ Mbufo ẹnyene ndinam nna ke iso esie ke mbeninyan̄.
3 Ndien Pharaoh ọyọdọhọ aban̄a nditọ Israel ete, ‘Mmọ ke ẹyo ke isọn̄ emi ke ndutịme. Wilderness omokụk mmọ esịn.’+
4 Ntre ami nyayak esịt Pharaoh ọsọn̄,+ ndien enye eyebịne mmọ, ami nyonyụn̄ nnọ idemmi ubọn̄ ke ndikan Pharaoh ye ofụri udịmekọn̄ esie;+ ndien nditọ Egypt ẹyefiọk ẹte ke ami ndi Jehovah.”+ Mmọdo mmọ ẹnam kpa ntre.
5 Ekem ẹditịn̄ ẹnọ edidem Egypt ẹte ke mbon oro ẹma ẹfen̄e. Kpa idaha oro esịt Pharaoh ye eke mme asan̄autom esie okpụhọde aban̄a mbon oro,+ ntre mmọ ẹdọhọ ẹte: “Nso ke nnyịn inam ntem, inyụn̄ iyak Israel ẹnyọn̄ọ ẹtre ndidụk ufụn+ nnọ nnyịn?”
6 Ntre enye etịm chariot ekọn̄ esie onyụn̄ ada ikọt esie adian idem.+
7 Ndien enye ada ata nti chariot+ ikie itiokiet ye kpukpru chariot eken ke Egypt ye mbonekọn̄ emi ẹwatde mmọ.
8 Ntem ke Jehovah ayak esịt Pharaoh, edidem Egypt, ọsọn̄,+ ndien enye ebịne nditọ Israel, ke adan̄aemi nditọ Israel ẹwọn̄ọde uko uko.*+
9 Ndien nditọ Egypt ẹbịne mmọ, ndien kpukpru mme enan̄-mbakara chariot Pharaoh ye mme awat enan̄-mbakara esie+ ye udịmekọn̄ esie ẹsịm mmọ ke adan̄aemi mmọ ẹnamde nna ke mbeninyan̄, ke Pihahiroth emi asakde iso ese Baal-zephon.+
10 Ke ini Pharaoh asan̄ade ekpere, nditọ Israel ẹtọn̄ọ ndimenede enyịn mmọ nse, ndien sese nditọ Egypt ke ẹbịne mmọ; ndien nditọ Israel ẹkop ndịk etieti ẹnyụn̄ ẹtọn̄ọ ndiseme n̄kot Jehovah.+
11 Ndien mmọ ẹdọhọ Moses ẹte: “Ndi koro itie ubụkowo mîdụhe ke ofụri Egypt esịn fi ada nnyịn edi mi man idikpan̄a ke wilderness?+ Nso ke afo anam ntem ye nnyịn ke ndida nnyịn n̄wọrọ ke Egypt?
12 Nte idịghe se nnyịn ikọdọhọde fi edi emi ke Egypt, ite, ‘Kpọn̄ nnyịn, man inam n̄kpọ inọ nditọ Egypt’? Koro ọfọn ye nnyịn ndinam n̄kpọ nnọ nditọ Egypt akan nnyịn ndikpan̄a ke wilderness.”+
13 Ndien Moses ọdọhọ mbon oro ete: “Ẹkûfehe ndịk.+ Ẹsọn̄ọ ẹda ẹnyụn̄ ẹkụt edinyan̄a Jehovah, emi enye edinyan̄ade mbufo mfịn emi.+ Koro nditọ Egypt emi mbufo ẹkụtde mfịn emi, mbufo idikwe mmọ aba tutu amama.+
14 Jehovah ayan̄wana ọnọ mbufo,+ edi mbufo ẹdidodop ẹda ẹse.”
15 Ndien Jehovah ọdọhọ Moses ete: “Ntak emi afo osụk esemede okot mi?+ Dọhọ nditọ Israel ete mmọ ẹtọn̄ọ isan̄.
16 Ndien afo menede esan̄ fo+ nyan ke enyọn̄ inyan̄ nyụn̄ bahade enye,+ man nditọ Israel ẹsan̄a ke ufọt esie ẹbe ke edisat isọn̄.+
17 Ndien sese ami mmayak esịt nditọ Egypt ọsọn̄,+ man mmọ ẹkpebịne mmọ, ami n̄kponyụn̄ nnọ idemmi ubọn̄ ke ndikan Pharaoh ye ofụri udịmekọn̄ esie ye mme chariot ekọn̄ esie ye mbonekọn̄ esie emi ẹwatde enan̄-mbakara.+
18 Ndien nditọ Egypt ẹyefiọk ẹte ke ami ndi Jehovah ke ini nnọde idemmi ubọn̄ ke ndikan Pharaoh ye mme chariot ekọn̄ esie ye mbonekọn̄ esie emi ẹwatde enan̄-mbakara.”+
19 Ekem angel+ ata Abasi emi ekebemde udịm Israel iso adaha akada mmọ ke edem, ndien adaha obubịt enyọn̄ adaha mmọ ke iso akada ke edem.+
20 Ntre enye edi edidu ke ufọt udịm nditọ Egypt ye udịm Israel.+ Ke n̄kan̄ kiet, enye edi obubịt enyọn̄ ye ekịm. Edi ke n̄kan̄ eken, enye anam un̄wana odu ke okoneyo.+ Ndien otu kiet isan̄ake ikpere otu eken ke ofụri okoneyo oro.
21 Ndien Moses anyan ubọk esie ke enyọn̄ inyan̄;+ Jehovah onyụn̄ anam ọkpọsọn̄ ofụm edem usiahautịn ofụme ke ofụri okoneyo oro eberi mmọn̄ inyan̄ oro afiak edem onyụn̄ anam isọn̄ inyan̄ akabade edisat isọn̄,+ ndien mmọn̄ abahade iba.+
22 Edikem nditọ Israel ẹsan̄a ke edisat isọn̄ ẹbe ke ufọt inyan̄,+ ke adan̄aemi mmọn̄ akabarede edi ibibene ke nnasia ye ke ufien mmọ.+
23 Ndien nditọ Egypt ẹbịne mmọ, ofụri enan̄-mbakara Pharaoh ye mme chariot ekọn̄ esie ye mbonekọn̄ esie emi ẹwatde enan̄-mbakara ẹnyụn̄ ẹbịne mmọ,+ ẹdụk ufọt inyan̄.
24 Ekem ke n̄kpọusen Jehovah etie ke adaha ikan̄ ye obubịt enyọn̄+ emenede enyịn ese udịm nditọ Egypt, onyụn̄ etịmede udịm nditọ Egypt.+
25 Ndien enye osion̄o wheel chariot mmọ efep onyụn̄ anam ọsọn̄ mmọ ndiwat;+ nditọ Egypt ẹnyụn̄ ẹdọhọ ẹte: “Ẹyak nnyịn ifehe ikpọn̄ Israel, koro Jehovah an̄wanade ye nditọ Egypt ọnọ mmọ.”+
26 Ekem Jehovah ọdọhọ Moses ete: “Nyan ubọk fo ke enyọn̄ inyan̄,+ man mmọn̄ afiak edi edifụk nditọ Egypt ye mme chariot ekọn̄ mmọ ye mbonekọn̄ emi ẹwatde enan̄-mbakara.”
27 Kpa idaha oro Moses anyan ubọk esie ke enyọn̄ inyan̄, ndien ke eyo ekperede ndisiere inyan̄ ọtọn̄ọ ndifiak nyọhọ nte esiyọhọde. Ofụri emi nditọ Egypt ke ẹfen̄e ẹyom ndibọhọ, edi Jehovah otop nditọ Egypt ọdọn̄ ke ufọt inyan̄.+
28 Ndien mmọn̄ ọdọdiọn̄ afiak edi.+ Ekem mmọn̄ ofụk mme chariot ekọn̄ ye mbonekọn̄ emi ẹwatde ke enan̄-mbakara ke otu udịmekọn̄ Pharaoh emi ẹkebịnede mmọ ẹdụk inyan̄.+ Baba owo kiet ke otu mmọ ibọhọke.+
29 Ndien nditọ Israel ẹsan̄a ke edisat isọn̄ ẹbe ke ufọt inyan̄,+ ndien mmọn̄ akabade ibibene ke nnasia ye ke ufien mmọ.+
30 Ntem ke Jehovah anyan̄a Israel ke usen oro osio nditọ Egypt ke ubọk,+ ndien Israel ẹkụt nte nditọ Egypt ẹkpan̄ade ẹbono ke mbeninyan̄.+
31 Israel n̄ko ẹkụt ọkpọsọn̄ ubọk oro Jehovah adade an̄wana ye nditọ Egypt; mmọ ẹnyụn̄ ẹtọn̄ọ ndibak Jehovah nnyụn̄ mbuọt idem ke Jehovah ye Moses, asan̄autom esie.+
Mme Ikọ Idakisọn̄
^ At. Ed., “ye edimenede ubọk.”
