Exodus 2;1-25
2 Ekem eren kiet ke ufọk Levi aka ekemen eyen Levi+ ọdọ.
2 Ndien n̄wan oro oyomo onyụn̄ aman eyeneren. Ke ini enye okụtde nte eyen oro eyede, enye edịp enye+ ke ọfiọn̄ enyọn̄ ita.+
3 Ke ini enye mîkemeke ndidịp eyen oro aba,+ enye ada ekebe n̄kukịp onyụn̄ eyet itai+ ke ekebe oro ndien esịn eyen oro ke esịt emen ekenịm ke otu nnyanyan̄a+ ke mben Akpa Nile.
4 Ndien eyeneka esie an̄wan ada do nsannsan ete ise se ẹdinamde enye.+
5 Ekem adiaha Pharaoh osụhọde aka ndiyere mmọn̄ ke Akpa Nile, ifịn iban esie ẹnyụn̄ ẹsan̄a ke mben Akpa Nile. Ndien enye ada okụt ekebe oro ke otu nnyanyan̄a. Ke ndondo oro enye ọdọn̄ ofụn an̄wan esie ete ekemen edi.+
6 Ke ini enye okụbọrede ekebe, enye okụt eyen oro, ndien sese, eyen ke atua. Ndien mbọm eyen oro anam enye,+ okposụkedi enye ọdọhọde ete: “Emi edi kiet ke otu nditọ mme Hebrew.”
7 Ndien eyeneka esie an̄wan ọdọhọ adiaha Pharaoh ete: “Ndi n̄ka n̄kokot edep kiet ke otu iban mme Hebrew nnọ fi, man ọbọk eyen emi ọnọ fi?”
8 Ntre adiaha Pharaoh ọdọhọ enye ete: “Ka!” Ndien n̄kaiferi oro ọsọsọp aka okokot eka eyen emi.+
9 Ndien adiaha Pharaoh ọdọhọ enye ete: “Men eyen emi kọbọk nọ mi, ndien ami nyọnọ fi n̄kpọ eyenutom.”+ Ndien n̄wan oro emen eyen oro ọkọbọk.
10 Ndien eyen oro ọkọri okpon. Ekem n̄wan oro ada enye ọsọk adiaha Pharaoh, enye onyụn̄ akabade edi eyen esie;+ ndien enye osio eyen oro enyịn̄ Moses, onyụn̄ ọdọhọ ete: “Edi koro n̄kosio enye ke mmọn̄.”+
11 Edikem ke mme usen oro, nte Moses ọkọtọn̄ọde ndikop odudu, enye ọwọrọ aka ke ọtọ nditọete esie ete ikese mbiomo emi mmọ ẹbiomde;+ ndien enye okụt eyen Egypt kiet amiade eyen Hebrew emi edide kiet ke otu nditọete esie.+
12 Ntre enye ọwọn̄ọde ese edem emi ye edem oko inyụn̄ ikwe owo ndomokiet. Ndien enye amia eyen Egypt oro owot onyụn̄ obụk enye ke ntan.+
13 Ekem enye ọwọrọ asan̄a ke ndan̄nsiere, ndien sese, nditọ Hebrew iba ke ẹn̄wana en̄wan. Ntre enye ọdọhọ andidue ete: “Nso inam fi amiade nsan̄a fo?”+
14 Ndien enye ọdọhọ ete: “Anie ekemek fi ete edi ọbọn̄ ye ebiereikpe nnyịn?+ Nte oyom ndiwot mi kpa nte okowotde eyen Egypt oro?”+ Ndien Moses edịghe onyụn̄ ọdọhọ ete: “Ke akpanikọ, ẹdiọn̄ọ n̄kpọ emi!”+
15 Ekem Pharaoh okop n̄kpọ emi, enye onyụn̄ oyom ndiwot Moses;+ edi Moses efehe+ ọbọhọ Pharaoh aka okodụn̄ ke isọn̄ Midian;+ ndien enye osụhọde etie ke mben obube mmọn̄.
16 Oku+ Midian ama enyene nditọiban itiaba, ndien nte ido mmọ edide, mmọ ẹdi ẹdikoi mmọn̄ ẹdọn̄ ke n̄kpọ udọn̄ mmọn̄ ẹyọhọ man ẹnọ ufene ete mmọ ẹn̄wọn̄.+
17 Ndien mme ekpemerọn̄ ẹdi nte ido mmọ edide ẹdibịn mmọ ẹfep. Edi Moses adaha ke enyọn̄ an̄wam iban oro onyụn̄ ọnọ ufene mmọ mmọn̄ ẹn̄wọn̄.+
18 Ntre ke ini mmọ ẹnyọn̄de ẹdi ufọk ẹdisịm Reuel+ ete mmọ, enye obụp ete: “Mbufo ẹnam didie ẹsọp ẹnyọn̄ ẹdisịm ufọk mfịn?”
19 Ndien mmọ ẹbọrọ ẹte: “Eyen Egypt+ kiet akanyan̄a nnyịn osio ke ubọk mme ekpemerọn̄, akan oro, enye ama okoi mmọn̄ ọnọ nnyịn, onyụn̄ ọnọ ufene nnyịn ẹn̄wọn̄.”
20 Ndien enye obụp nditọiban esie ete: “Enye odu m̀mọ̀n̄? Ntak emi mbufo ẹkedahade ẹkpọn̄ owo oro? Mbufo ẹkot enye edidia n̄kpọ.”+
21 Ekem Moses enyịme ndidụn̄ ye owo oro, enye onyụn̄ ada Zipporah+ eyen esie ọnọ Moses ọdọ.
22 Ekem enye aman eyeneren, ndien Moses osio eyen oro enyịn̄ Gershom,+ koro enye ọdọhọde ete: “Ami ndụn̄ nte esenowo ke esenidụt.”+
23 Edikem ke ufan̄ anyan ini oro, edidem Egypt akpa,+ edi nditọ Israel ẹseme ẹban̄a itie ufụn mmọ ẹnyụn̄ ẹtuan̄a,+ ndien eseme emi mmọ ẹsemede ẹyom un̄wam ke ntak itie ufụn+ oro ọdọk ekesịm ata Abasi.
24 Ekem Abasi okop+ mmụm mmọ,+ Abasi onyụn̄ eti ediomi emi enye akanamde ye Abraham ye Isaac ye Jacob.+
25 Ntre Abasi ese nditọ Israel, Abasi onyụn̄ okụt ufen mmọ.
