Exodus 24;1-18
24 Ndien enye ọdọhọ Moses ete: “Dọk tiene Jehovah, afo ye Aaron ye Nadab ye Abihu+ ye mbiowo Israel ata ye duop,+ ẹnyụn̄ ẹda nsannsan ẹtuak ibuot.
2 Ndien Moses ikpọn̄-ikpọn̄ edisan̄a ekpere Jehovah; edi yak mmọ ẹkûsan̄a ẹkpere, mbon emi ẹkûnyụn̄ ẹtiene enye ẹdọk.”+
3 Ekem Moses edi editịn̄ kpukpru ikọ Jehovah ye kpukpru ubiereikpe+ emi ọnọ mbon emi, ndien kpukpru owo ẹbọrọ ke uyo kiet ẹte: “Nnyịn imenyịme ndinam kpukpru se Jehovah ọdọhọde.”+
4 Ndien Moses ewet kpukpru ikọ Jehovah.+ Enye onyụn̄ abak edemede ke usenubọk anam itieuwa ke ukot obot oro ye adaha duopeba emi ẹsan̄ade ẹkekem ye esien Israel duopeba.+
5 Ekem enye osio n̄kparawa ke otu nditọ Israel ọdọn̄, ndien mmọ ẹwa edifọp uwa, ẹnyụn̄ ẹwa nyara enan̄, nte uwa ebuana+ ẹnọ Jehovah.
6 Ndien Moses ada ndusụk iyịp esịn ke usan,+ onyụn̄ esịme ndusụk eken ke itieuwa.+
7 Ekem enye emen n̄wed ediomi+ edikot ke utọn̄ mme owo.+ Ndien mmọ ẹdọhọ ẹte: “Nnyịn imenyịme ndinam kpukpru se Jehovah ọdọhọde nnyụn̄ n̄kop uyo esie.”+
8 Ntre Moses ada iyịp oro esịme mme owo ke idem+ onyụn̄ ọdọhọ ete: “Emi edi iyịp ediomi+ emi Jehovah anamde ye mbufo aban̄a kpukpru ikọ emi.”
9 Ndien Moses ye Aaron ye Nadab ye Abihu ye mbiowo Israel ata ye duop ẹdọk ẹka,
10 ndien mmọ ẹkụt Abasi Israel.+ Ndien se ibietde n̄kpọ eke ẹdade mbat mbat itiat sapphire ẹnam odu enye ke idak ikpat onyụn̄ asana nte heaven.+
11 Ndien enye ikanyanke ubọk esie itụk mme ọwọrọiso owo ke otu nditọ Israel,+ edi mmọ ẹma ẹkụt ata Abasi ke n̄kukụt,+ ẹdia ẹnyụn̄ ẹn̄wọn̄ n̄kpọ.+
12 Ndien Jehovah ọdọhọ Moses ete: “Dọk tiene mi ke obot nyụn̄ du do, koro nyom ndinọ fi itiatn̄wed ye ibet ye ewụhọ oro n̄wetde ndida n̄kpep mmọ.”+
13 Ntre Moses ye asan̄autom esie, Joshua, ẹdaha ke enyọn̄ ndien Moses ọdọk obot ata Abasi.+
14 Edi enye ọdọhọ mbiowo oro ete: “Mbufo ẹtie mi ẹbet nnyịn tutu nnyịn ifiak idi.+ Ndien, sese! Aaron ye Hur+ ẹdu ye mbufo. Owo ekededi eke enyenede ikọ, yak enye aka ebịne mmọ.”+
15 Ntem ke Moses ọdọk obot ke adan̄aemi obubịt enyọn̄ ofụkde obot+ oro.
16 Ndien ubọn̄ Jehovah+ odu ke Obot Sinai,+ obubịt enyọn̄ onyụn̄ ofụk enye ke usen itiokiet. Ekem ke ọyọhọ usen itiaba enye etie ke obubịt enyọn̄+ oro okot Moses.
17 Ndien ke enyịn nditọ Israel ubọn̄ Jehovah eketie nte ikan̄+ eke asakde ke enyọn̄ obot.
18 Ekem Moses odụk obubịt enyọn̄ oro asan̄a ebe ọdọk obot+ oro. Moses onyụn̄ odu ke obot oro uwemeyo aba ye okoneyo aba.+
