Exodus 25;1-40
25 Ndien Jehovah ọdọhọ Moses+ ete:
2 “Dọhọ nditọ Israel ete mmọ ẹbọ etịbe ẹnọ mi: Kpukpru owo emi esịt onụkde ke mbufo ẹdibọ etịbe ẹnọ mi.+
3 Ndien etịbe emi mbufo ẹdibọde mmọ edi emi: gold+ ye silver+ ye okpoho,+
4 ye blu blu ndidi, ye idet erọn̄ emi enyenede uduot mmọn̄ibọn̄ ye ididuot ndidi ye eti linen ye idet ebot,+
5 ye ikpa okukịm erọn̄ emi ẹnamde eyịbe, ye ikpa seal, ye eto acacia;+
6 aran ikan̄+ ye aran balsam+ emi ẹsidade ẹnam aran oro ẹsidade ẹyet owo+ ye edifuọn̄ incense;+
7 ye itiat onyx ye itiat emi ẹsịnde ke ephod+ ye ke mbana ikpanesịt.+
8 Ndien yak mmọ ẹnam edisana ebiet ẹnọ mi, sia ndidụn̄de ke otu mmọ.+
9 Afo enyene ndinam tent utuakibuot ye kpukpru n̄kpọmbana esie ekekem ye mbiet oro n̄wụtde fi.+
10 “Ndien yak mmọ ẹda eto acacia ẹnam Ekebe,+ cubit iba ye ubak ke uniọn̄ ye cubit kiet ye ubak ke ubom onyụn̄ okon̄ ke cubit kiet ye ubak.
11 Nyụn̄ da ata gold fụk enye.+ Fụk enye ke esịt ye ke edem, nyụn̄ da gold nam mben esie kanade.+
12 Nyụn̄ da gold nam ekara n̄kpọ inan̄, nyụn̄ yịri mmọ ke enyọn̄ ukot esie mbinan̄, ekara n̄kpọ iba ẹdu ke n̄kan̄ kiet, ekara n̄kpọ iba ẹnyụn̄ ẹdu ke n̄kan̄ eken.+
13 Nyụn̄ da eto acacia nam nnyan eto nyụn̄ da gold fụk mmọ.+
14 Nyụn̄ dọn̄ nnyan eto oro ke mme ekara n̄kpọ emi ẹdude ke n̄kan̄ mbiba Ekebe oro man ẹkeme ndida mmọ mmen Ekebe oro.
15 Yak nnyan eto oro ẹsịne ke mme ekara n̄kpọ Ekebe oro. Owo inyeneke ndision̄o mmọ do mfep.+
16 Nyụn̄ sịn ntiense oro ndinọde fi ke esịt Ekebe oro.+
17 “Ndien da ata gold nam okukịp, emi edide cubit iba ye ubak ke uniọn̄ ye cubit kiet ye ubak ke ubom.+
18 Nyụn̄ da gold nam cherub iba. Afo enyene ndidom mmọ ke enyọn̄ okukịp+ oro ke utịt mbiba.
19 Nam cherub kiet ke utịt n̄kan̄ kiet ye cherub kiet ke utịt n̄kan̄ eken.+ Mbufo ẹnyene ndinam mme cherub emi ndori ke utịt mbiba ke enyọn̄ okukịp oro.
20 Ndien yak mme cherub emi ẹtat mba mmọ mbiba ke enyọn̄, ẹda mba mmọ ẹfụk okukịp oro, kiet ọwọn̄ọde iso owụt eken.+ Yak iso mme cherub emi ẹse okukịp oro.
21 Nyụn̄ men okukịp+ emi kịbi ke Ekebe, ndien sịn ntiense oro ndinọde fi ke esịt Ekebe oro.
22 Ndien nyowụt fi idem do nnyụn̄ ndu ke enyọn̄ okukịp oro+ ntịn̄ ikọ ye afo, ke ufọt cherub iba oro ẹdorode ke enyọn̄ ekebe ntiense, kpa kpukpru se nditemede fi nte ọdọhọ nditọ Israel.+
23 “Ndien da eto acacia nam okpokoro,+ emi edide cubit iba ke uniọn̄ ye cubit kiet ke ubom onyụn̄ okon̄de ke cubit kiet ye ubak.
24 Nyụn̄ da ata gold fụk enye, nyụn̄ da gold nam mben esie kanade.+
25 Nyụn̄ nam mben emi okponde ke ubara ekaubọk kiet kanade, nyụn̄ da gold nam isọn̄ mben oro kanade.+
26 Nyụn̄ da gold nam ekara n̄kpọ inan̄ nyụn̄ yịri mme ekara n̄kpọ oro ke inụk ukot mbinan̄.+
27 Mme ekara n̄kpọ oro ẹnyene ndidu n̄kpere mben nte itie ndisịn nnyan eto nda mmen okpokoro emi.+
28 Nyụn̄ da eto acacia nam nnyan eto nyụn̄ da gold fụk mmọ, man mmọ ẹsida eto emi ẹmen okpokoro emi.+
29 “Ndien nam mme usan ye mme cup ye mme osioinua ye mme eso emi mmọ ẹdidade ẹtọhọ edin̄wọn̄ uwa. Da ata gold nam mmọ.+
30 Nyụn̄ dori uyo iso Abasi ke okpokoro emi ke iso mi kpukpru ini.+
31 “Nyụn̄ da ata gold nam uwụk utuenikan̄. Enyene ndidodom uwụk utuenikan̄ emi.+ Nam ukot, ye n̄kọk ye cup ye ekop ye flawa ẹto ke enye ẹwọrọ.
32 Nam uwụk utuenikan̄ emi enyene n̄kọk itiokiet ke n̄kan̄ esie mbiba, n̄kọk ita ke n̄kan̄ kiet, n̄kọk ita ke n̄kan̄ eken.+
33 Yak cup ita emi ẹbietde mfri almond ẹdu ke n̄kọk kiet, ekop ye flawa ẹtiene kiet eken, cup ita emi ẹbietde mfri almond ẹnyụn̄ ẹdu ke n̄kọk eken, ekop ye flawa ẹtiene kiet eken.+ Ntem ke edinam ye n̄kọk itiokiet emi ẹsiahade ẹwọrọ ke uwụk utuenikan̄ emi.
34 Ndien yak cup inan̄ emi ẹtiede nte mfri almond ẹdu ke uwụk utuenikan̄ emi, ekop ye flawa ẹtiene kiet eken.+
35 Ndien ekop emi odude ke idak n̄kọk iba oto enye ke idem ọwọrọ, ekop emi odude ke idak n̄kọk iba efen onyụn̄ oto enye ke idem ọwọrọ, ekop emi odude ke idak n̄kọk iba emi ẹsụhọde onyụn̄ oto enye ke idem ọwọrọ, emi edi ke n̄kọk itiokiet emi ẹsiahade ẹwọrọ ke uwụk utuenikan̄ emi.+
36 Yak ekop mmọ ye n̄kọk mmọ ẹsiaha ke enye. Da ata gold+ dom mmọ nte n̄kpọ kiet.
37 Nyụn̄ nam utuenikan̄ itiaba dori; ndien ẹnyene ndidomo mme utuenikan̄ emi, mmọ ẹnyụn̄ ẹnyene ndiyama ke iso ebiet emi enye odude.+
38 Ndien ẹnyene ndida ata gold nnam mme ufatikan̄ ye mme n̄kpọ ufọp incense esie.+
39 Yak enye ada ata gold emi odobide ke talent kiet anam enye ye kpukpru n̄kpoduoho emi.
40 Nyụn̄ kụt ete amanam enye etie nte mbiet emi ẹkewụtde fi ke obot oro.+
