Exodus 26;1-37
26 “Ndien da ọfọn̄ tent duop emi ẹnamde ke eti linen oro ẹfiakde-fiak, ye blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi,+ nam tent utuakibuot.+ Dọk mme cherub+ nte fansi ke mme ọfọn̄ emi.
2 Uniọn̄ ọfọn̄ tent kiet kiet edi cubit edịp ye itiaita, ubom ọfọn̄ tent kiet kiet onyụn̄ edi cubit inan̄. Kpukpru ọfọn̄ tent+ emi ẹnyene udomo kiet.
3 Da ọfọn̄ tent ition kịm kiet yịri ye eken, nyụn̄ da ọfọn̄ tent ition efen kịm kiet yịri ye eken.+
4 Ndien da blu blu ndidi nam itie usịn ekọp ke mben ọfọn̄ tent kiet emi edide akpatre ke otu mme ọfọn̄ oro; nyụn̄ nam kpasụk ntre ke mben akpatre ọfọn̄ tent enye eken emi ẹdimende ẹkpaha.+
5 Nam itie aba ye duop emi ẹdisịnde ekọp ke ọfọn̄ tent kiet, nyụn̄ nam itie aba ye duop emi ẹdisịnde ekọp ke utịt ọfọn̄ tent enye eken emi ẹdimende ẹkpaha, nam mme itie usịn ekọp emi ẹsak iso ẹse kiet eken.+
6 Nyụn̄ da gold nam ekọp aba ye duop nyụn̄ da mme ekọp emi kpaha mme ọfọn̄ tent emi dian kiet man ẹkabade ẹdi tent utuakibuot kiet.+
7 “Ndien afo enyene ndida idet ebot+ nnam ọfọn̄ tent mfụk tent utuakibuot emi. Nam ọfọn̄ tent duopekiet.
8 Uniọn̄ ọfọn̄ tent kiet kiet edi cubit edịp ye duop,+ ubom ọfọn̄ tent kiet kiet onyụn̄ edi cubit inan̄. Ọfọn̄ tent duopekiet emi ẹdi ukem ke udomo.
9 Ndien afo enyene ndikịm ọfọn̄ tent ition nyịri kiet, onyụn̄ ekịm ọfọn̄ tent itiokiet eken eyịri kiet,+ afo onyụn̄ enyene ndifụt ọyọhọ ọfọn̄ tent itiokiet emi odude ke iso tent emi utịm ikaba.
10 Nyụn̄ nam itie aba ye duop emi ẹdisịnde ekọp ke mben ọfọn̄ tent kiet, emi edide akpatre ke otu mme ọfọn̄ emi, ye itie aba ye duop emi ẹdisịnde ekọp ke mben ọfọn̄ tent enye eken emi ẹdimende ẹkpaha.
11 Afo onyụn̄ enyene ndida okpoho+ nnam ekọp aba ye duop nnyụn̄ ndọn̄ ekọp oro ke mme itie usịn ekọp ndien akpaha mme ọfọn̄ tent emi eyịri, man ẹkabade ẹdi kiet.+
12 Ndien yak se isụhọde ke mme ọfọn̄ tent emi ẹdu do nte nyọhọ-nsụhọ. Ubak ọfọn̄ tent emi osụhọde ọyọkọn̄ọ ke edem tent utuakibuot emi.
13 Ndien cubit kiet ke n̄kan̄ emi ye cubit kiet ke n̄kan̄ eken emi ẹsụhọde ke ofụri uniọn̄ ọfọn̄ tent emi ẹyedu nte nyọhọ-nsụhọ ke n̄kan̄ mbiba ke tent utuakibuot emi, man ofụk enye ke n̄kan̄ emi ye ke n̄kan̄ oko.
14 “Ndien afo enyene ndida ikpa okukịm erọn̄ emi ẹnamde eyịbe nnam ufụkn̄kpọ mfụk tent nnyụn̄ nda ikpa seal nnam ufụkn̄kpọ mfụk ke enyọn̄ esie.
15 “Afo onyụn̄ enyene ndida eto acacia nnam obubọk+ tent utuakibuot emi, emi ẹdidade ẹwụk.
16 Uniọn̄ obubọk kiet edi cubit duop, ubom obubọk kiet onyụn̄ edi cubit kiet ye ubak.
17 Obubọk kiet kiet enyene ukot iba emi ẹyịrede kiet. Ntem ke afo edinam kpukpru obubọk tent utuakibuot emi.
18 Ndien afo enyene ndinam obubọk tent utuakibuot emi, obubọk edịp ke n̄kan̄ emi esede Negeb, ke edem usụk.
19 “Nyụn̄ da silver nam etak+ obubọk aba emi ẹdiwụkde obubọk edịp; etak iba ke idak obubọk kiet emi enyenede ukot iba, ye etak iba efen ke idak obubọk enye eken emi enyenede ukot iba.
20 Nyụn̄ nam obubọk edịp nọ tent utuakibuot emi ke n̄kan̄ eken, emi esede edem edere,+
21 ye etak aba emi ẹnamde ke silver, etak iba ke idak obubọk kiet ye etak iba efen ke idak obubọk enye eken.+
22 Nyụn̄ nam obubọk itiokiet ke n̄kan̄ tent utuakibuot emi esede edem usoputịn.+
23 Nyụn̄ nam obubọk iba nte inụk tent utuakibuot+ ke n̄kan̄ esie mbiba.
24 Ndien mmọ ẹnyene ndidiana iba ke isọn̄, yak mmọ ẹnyụn̄ ẹdiana iba ntre ẹsịm enyọn̄ ke akpa itie emi ekara n̄kpọ odude. Nam mmọ mbiba ẹtie ntem. Mmọ ẹdidi adaha inụk iba.
25 Nyụn̄ nam obubọk itiaita ye etak efịtekiet emi ẹnamde ke silver, etak iba ke idak obubọk kiet ye etak iba efen ke idak obubọk enye eken.
26 “Nyụn̄ da eto acacia nam mbiọn̄ eto,+ nam ition nọ mme obubọk emi ẹdude ke edem kiet ke tent utuakibuot emi,
27 nyụn̄ nam ition nọ mme obubọk emi ẹdude ke edem eken ke tent utuakibuot emi nyụn̄ nam mbiọn̄ eto ition nọ mme obubọk ition emi ẹdude ke n̄kan̄ tent utuakibuot emi ẹsede edem usoputịn.+
28 Ndien yak ibiọn̄ eto emi esịnede ke ufọt obubọk emi oto ke utịt kiet esịm utịt eken.
29 “Nyụn̄ da gold fụk mme obubọk emi,+ nyụn̄ da gold nam mme ekara n̄kpọ emi ẹdisịnde mbiọn̄ eto emi; nyụn̄ da gold fụk mbiọn̄ eto emi.
30 Nyụn̄ wụk tent utuakibuot emi ekekem ye mbiet emi ẹkewụtde fi ke obot.+
31 “Nyụn̄ da blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi ye eti linen oro ẹfiakde-fiak nam ikpehe.+ Ẹyedọk mme cherub+ nte fansi ẹdian ke ikpehe emi.
32 Nyụn̄ yịri enye ke adaha inan̄ emi ẹdade eto acacia ẹnam ẹnyụn̄ ẹfụkde gold. Ẹda gold ẹnam mme ntok mmọ. Mmọ ẹdiwụhọ ke etak inan̄ emi ẹnamde ke silver.
33 Nyụn̄ yịri ikpehe emi ke idak ekọp oro nyụn̄ men ekebe ntiense+ dinịm ke esịt; ndien ikpehe oro ayabahade Edisana+ ye Ata Edisana+ ọnọ mbufo.
34 Nyụn̄ da okukịp kịbi ke ekebe ntiense oro ke Ata Edisana.
35 “Nyụn̄ diọk okpokoro ke iso ikpehe, uwụk utuenikan̄+ onyụn̄ odu ke nsakiso ye okpokoro, ke n̄kan̄ tent utuakibuot emi esede edem usụk; nyụn̄ diọk okpokoro ke n̄kan̄ edem edere.
36 Nyụn̄ da blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi ye eti linen oro ẹfiakde-fiak nam ọfọn̄ enyịnusụn̄+ ke inuaotop tent, kpa utom ọdọk-ọfọn̄.
37 Nyụn̄ da eto acacia nam adaha ition ndiyịri ọfọn̄ enyịnusụn̄ nyụn̄ da gold fụk mmọ. Da gold nam mme ntok mmọ. Nyụn̄ da okpoho nam etak ition nọ mmọ.
