Exodus 28;1-43
28 “Nam Aaron, eyenuka, ye nditọiren esie emi ẹdude ye enye, ẹto ke otu nditọ Israel ẹsan̄a ẹkpere fi, man enye akpanam utom nte oku ọnọ mi,+ Aaron,+ Nadab ye Abihu,+ Eleazar ye Ithamar,+ nditọiren Aaron.
2 Nam ndisana ọfọn̄ nọ Aaron, eyenuka, man ọnọ enye ubọn̄ ye uyai.+
3 Afo onyụn̄ enyene ndidọhọ kpukpru mbon eti ibuot emi n̄kesịnde mmọ spirit ọniọn̄+ ke esịt, ndien mmọ ẹnyene ndinam ọfọn̄ Aaron man adian̄ade enye enịm san̄asan̄a, man enye akpanam utom nte oku ọnọ mi.+
4 “Ndien mme ọfọn̄ oro mmọ ẹdinamde ẹdi emi: mbana ikpanesịt,+ ephod+ ye anana-ubọk kod+ ye ewụra emi enyenede n̄wet nte obukpọk nsa, mbọbọ ibuot+ ye ubọpisịn;+ ndien mmọ ẹnyene ndinam ndisana ọfọn̄ nnọ Aaron eyenuka ye nditọiren esie, man enye akpanam utom nte oku ọnọ mi.
5 Ndien mmọ ẹdida gold ye blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi ye eti linen.
6 “Ndien mmọ ẹnyene ndida gold ye blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi ye eti linen oro ẹfiakde-fiak, kpa utom andikịm fansi,+ nnam ephod.
7 Enye edinyene mbak iba emi ẹkịmde ẹdian kiet ke utịt afara n̄kan̄ mbiba, ẹnyụn̄ ẹnyene ndikịm enye ndian kiet.+
8 Ẹdinyụn̄ ẹda ukem ọfọn̄ ẹnam mbọbọ+ emi ẹyịride ndida ntebe enye, oro edi, gold ye blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi ye eti linen oro ẹfiakde-fiak.
9 “Da itiat onyx+ iba nyụn̄ kap+ enyịn̄ nditọ Israel+ sịn ke mmọ,
10 enyịn̄ itiokiet ke itiat kiet, ye enyịn̄ itiokiet emi ẹsụhọde ke itiat enye eken nte emana mmọ edide ke adiana ke adiana.+
11 Afo enyene ndikap enyịn̄ nditọ Israel nsịn ke itiat iba emi, nte emi anamusọ itiat akapde ufịkn̄kpọ.+ Afo enyene ndidọn̄ mmọ ke mme ndudu oro ẹdade gold ẹnam.+
12 Nyụn̄ yịri itiat iba oro ke mbak ọfọn̄ afara ephod man ẹdi itiat editi ẹnọ nditọ Israel;+ ndien Aaron enyene ndikọn̄ọ enyịn̄ mmọ ke mbak ọfọn̄ afara mbiba oro ke iso Jehovah nte n̄kpọ editi.
13 Afo onyụn̄ enyene ndida gold nam mme ndudu,
14 ye urụk iba eke ẹbietde n̄kpọkọbi emi ẹnamde ke ata gold.+ Afo edifiak mmọ nte ndidi, nte urụk anamusọ; nyụn̄ yịri urụk emi ebietde n̄kpọkọbi mi ke mme ndudu oro.+
15 “Nyụn̄ nam andikịm fansi ọdọk mbana ikpanesịt ikpe+ adian. Nam enye kpa nte ẹnamde ephod. Afo edida gold ye blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi ye eti linen oro ẹfiakde-fiak anam enye.+
16 Enye enyene ndidi ukem ukem ke n̄kan̄ mbinan̄ ke ini ẹfụtde enye iba, udomo ubọk* kiet ke uniọn̄ ye udomo ubọk kiet ke ubom.+
17 Nyụn̄ dọn̄ itiat ke esịt esie, nam itiat oro edi udịm inan̄.+ Akpa udịm edidi ruby+ ye topaz+ ye emerald.+
18 Ndien ọyọhọ udịm iba edidi turquoise+ ye sapphire+ ye jasper.+
19 Ọyọhọ udịm ita edidi itiat leshem ye agate+ ye amethyst.+
20 Ndien ọyọhọ udịm inan̄ edidi chrysolite+ ye onyx+ ye jade. Mmọ ẹdisịne ke mme ndudu oro ẹnamde ke gold.+
21 Ndien itiat emi ẹnyene ndikem ye enyịn̄ nditọ Israel, ẹdidi duopeba nte enyịn̄ mmọ ẹdide.+ Ẹdikap mmọ nte ẹsikapde ufịkn̄kpọ, ẹkap mmọ kiet kiet nte enyịn̄ mmọ ẹdide, ekem ye esien duopeba.+
22 “Nyụn̄ da ata gold+ nam urụk eke ẹwan̄de-wan̄ ke mbana ikpanesịt oro.
23 Da gold nam ekara n̄kpọ iba+ yịri ke mbana ikpanesịt oro, nyụn̄ yịri ekara n̄kpọ iba oro ke utịt mbiba ke mbana ikpanesịt oro.
24 Sịn urụk gold mbiba oro ke ekara n̄kpọ iba oro ke utịt mbana ikpanesịt oro.+
25 Nyụn̄ sịn utịt urụk mbiba ke ndudu iba oro, nyụn̄ yịri mmọ ke iso mbak ọfọn̄ afara ephod oro.+
26 Da gold nam ekara n̄kpọ iba yịri ke utịt mbiba ke mbana ikpanesịt oro, ke mben n̄kan̄ emi adianade ke ephod.+
27 Nyụn̄ da gold nam ekara n̄kpọ iba yịri ke isọn̄ mbak ọfọn̄ afara ephod oro mbiba, ke iso, ekpere itie emi mmọ ẹsobode, ke enyọn̄ mbọbọ ephod.+
28 Ndien mmọ ẹyeda blu blu urụk ẹtebe ekara mbana ikpanesịt oro ẹdian ye ekara n̄kpọ oro odude ke ephod, man enye odu ke enyọn̄ mbọbọ ephod, mbana ikpanesịt oro okûnyụn̄ esịk ọkpọn̄ enyọn̄ ephod+ emi enye odude.
29 “Ndien Aaron enyene ndikọn̄ọ enyịn̄ nditọ Israel ke mbana ikpanesịt ikpe ke ikpanesịt esie nte n̄kpọ editi ke ini enye odụkde Edisana ebiet ke iso Jehovah kpukpru ini.
30 Ndien afo enyene ndisịn Urim+ ye Thummim ke mbana ikpanesịt ikpe emi, ndien mmọ ẹyedu ke ikpanesịt Aaron ke ini enye edide ke iso Jehovah; ndien Aaron oyobiom ikpe+ nditọ Israel ke ikpanesịt esie ke iso Jehovah kpukpru ini.
31 “Nyụn̄ da blu blu ndidi kpọt nam anana-ubọk kod ephod.+
32 Nyụn̄ sio itọn̄ ke ufọt ufọt enyọn̄ esie. Dọk mben itọn̄ oro kanade, nte ọdọk-ọfọn̄ ọkpọdọkde. Nam itọn̄ oro etie nte itọn̄ kod ukwak, mbak ediwaha.+
33 Nyụn̄ da blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi dọk pomegranate yịri kanade mben isọn̄ esie, nyụn̄ da gold nam n̄kanika+ yịri ke ufọt mme pomegranate emi kanade;
34 n̄kanika gold kiet ye pomegranate kiet, n̄kanika gold kiet ye pomegranate kiet, kanade mben isọn̄ anana-ubọk kod emi.+
35 Ndien Aaron eyesịne enye anam utom, ẹyenyụn̄ ẹkop uyom n̄kanika oro ke ini enye odụkde edisana ebiet ke iso Jehovah ye ke ini enye ọwọrọde, mbak enye edikpa.+
36 “Nam nsemnsem ubak ata gold nyụn̄ kap ke enye, ‘Jehovah edi Edisana,’+ nte ẹkapde ufịkn̄kpọ.
37 Nyụn̄ da blu blu urụk tebe enye dian ke mbọbọ ibuot.+ Enye edidu ke iso mbọbọ ibuot.
38 Ndien enye enyene ndidu ke ọkpọiso Aaron, ndien Aaron enyene ndibọrọ mban̄a ndudue emi ẹnamde ẹdian ndisana n̄kpọ,+ emi nditọ Israel ẹdinamde asana, oro edi, kpukpru ndisana enọ mmọ; ndien enye enyene ndidu ke ọkpọiso esie kpukpru ini, man anam mmọ ẹnyene unyịme+ ke iso Jehovah.
39 “Nyụn̄ da eti linen dọk ewụra emi etiede n̄wetn̄wet nte obukpọk nsa nyụn̄ da eti linen nam mbọbọ ibuot,+ nyụn̄ nam ubọpisịn,+ kpa utom ọdọk-ọfọn̄.
40 “Nyụn̄ nam ewụra+ nọ nditọ Aaron, nam ubọpisịn nọ mmọ, nyụn̄ nam uyaraibuot+ nọ mmọ nte n̄kpọ ubọn̄ ye uyai.+
41 Nyụn̄ da mmọ sịne Aaron eyenuka ye nditọiren esie, yet mmọ aran+ nyụn̄ sịn mmọ odudu ke ubọk yọhọ*+ nyụn̄ nam mmọ ẹsana, ndien yak mmọ ẹnam utom nte mme oku ẹnọ mi.
42 Nam ibio ọfọn̄ukot emi mmọ ẹdisịnede ke idak ifụk iferi.+ Nam mmọ ẹniọn̄ ọtọn̄ọde ke isịn sịm ifụhi.
43 Ndien Aaron ye nditọ esie ẹnyene ndisịne mmọ ke ini mmọ ẹdụkde tent usopidem m̀mê ke ini mmọ ẹsan̄ade ẹkpere itieuwa ndinam utom ke edisana ebiet, mbak mmọ ẹdidue isop ẹnyụn̄ ẹkpan̄a. Emi edidi nsinsi ewụhọ ọnọ enye ye nditọ esie eke ẹditienede enye ke edem.+
Mme Ikọ Idakisọn̄
^ “Udomo ubọk” edi uniọn̄ emi ọtọn̄ọde ke ibuot akpan nnuenubọk esịm ibuot akpatre nnuenubọk ke ini ẹtian̄arede ofụri nnuenubọk.
^ Ikọ Hebrew emi ke ata edikabade ọwọrọ “da odudu yọhọ ubọk,” ndien ẹda enye ẹtịn̄ ẹban̄a ẹdinọ mbon oro ẹnyenede ndinam utom ke itieutom oku ọyọhọ odudu.
