Exodus 31;1-18
31 Ndien Jehovah ọdọhọ Moses ete:
2 “Sese, mmokot Bezalel,+ eyen Uri, eyen Hur, owo esien Judah,+ ke enyịn̄.
3 Nyonyụn̄ nsịn enye spirit Abasi ke idem nyọhọ man enye enyene ọniọn̄ ye asian ye ifiọk ye kpukpru orụk usọ,+
4 ndinam utom usọ, ye ke ndinam utom ke gold ye silver ye okpoho,+
5 ye ke ndisọi itiat eke ẹdade ẹnam n̄kpọ+ ye eto eke ẹdade ẹnam kpukpru orụk utom.+
6 Koro, sese! ami mmenịm Oholiab, eyen Ahisamach, owo esien Dan,+ nte odu ye enye, mmonyụn̄ nsịn ọniọn̄ ke esịt kpukpru mbon emi ẹnyenede esịt ọniọn̄, man mmọ ẹnam kpukpru n̄kpọ eke n̄ketemede fi:+
7 tent usopidem+ ye Ekebe+ ntiense ye okukịp esie,+ ye kpukpru n̄kpoduoho tent,
8 ye okpokoro ye n̄kpoduoho esie,+ ye uwụk utuenikan̄ emi ẹnamde ke ata gold ye kpukpru n̄kpoduoho esie,+ ye itieuwa ufọp incense,+
9 ye itieuwa emi ẹsiwade edifọp uwa ye kpukpru n̄kpoduoho esie,+ ye besịn ye n̄kpọ udori besịn,+
10 ye mme ọfọn̄ eke ẹdọkde-dọk ye ndisana ọfọn̄ Aaron oku ye mme ọfọn̄ oro nditọiren esie ẹdisịnede ẹnam utom nte mme oku;+
11 ye aran oro ẹsidade ẹyet owo ye edifuọn̄ incense edisana ebiet.+ Mmọ ẹnyene ndinam nte ekemde ye kpukpru n̄kpọ emi n̄ketemede fi.”
12 Ndien Jehovah ọdọhọ Moses ete:
13 “Dọhọ nditọ Israel ete, ‘Mbufo ẹnyene ndinịm mme sabbath mi,+ koro enye edide idiọn̄ọ ke ufọt mi ye mbufo ke ofụri emana mbufo, man mbufo ẹfiọk ẹte ke ami Jehovah nnam mbufo ẹsana.+
14 Mbufo ẹnịm sabbath, koro enye edide edisana n̄kpọ ọnọ mbufo.+ Ẹkûtre ndiwot owo eke asabarede enye.+ Edieke owo anamde utom ke esịt, ẹnyene ndisịbe ukpọn̄ oro mfep ke otu orụk esie.+
15 Ẹnam utom ke usen itiokiet, edi ọyọhọ usen itiaba edi sabbath emi ẹduọkde odudu ofụri ofụri.+ Enye edi edisana n̄kpọ ọnọ Jehovah. Ẹkûtre ndiwot owo ekededi emi anamde utom ke usen sabbath.
16 Ndien nditọ Israel ẹnyene ndinịm sabbath, nnyụn̄ nti sabbath ke ofụri emana mmọ. Enye edi nsinsi ediomi.+
17 Enye edi idiọn̄ọ ke ufọt mi ye nditọ Israel ke nsinsi,+ koro Jehovah akanamde enyọn̄ ye isọn̄ ke usen itiokiet ndien ke ọyọhọ usen itiaba enye etre utom onyụn̄ ọduọk odudu.’”+
18 Ke ndondo oro enye okụrede nditịn̄ ikọ ye Moses ke Obot Sinai, enye ọnọ Moses itiatn̄wed Ntiense iba,+ kpa itiatn̄wed emi nnuenubọk Abasi+ ekewetde.
