Exodus 33;1-23
33 Ekem Jehovah ọdọhọ Moses ete: “Daha ke ọtọ emi, afo ye mbon emi afo okosion̄ode ke isọn̄ Egypt,+ ẹka isọn̄ emi n̄kọn̄wọn̄ọde nnọ Abraham ye Isaac ye Jacob nte, ‘Nyada enye nnọ mfri fo.’+
2 Ndien nyọdọn̄ angel ebem fi iso,+ nyonyụn̄ mbịn mbon Canaan, ye mme Amorite ye mme Hittite ye mme Perizzite ye mme Hivite ye mbon Jebus nsion̄o;+
3 ke isọn̄ emi ọfiọrọde mmọn̄eba ye aranọkwọk,+ koro nditieneke mbufo ndọk, sia mbufo ẹdide mbon oro ẹsọn̄de obotitọn̄,+ mbak ndisobo mbufo mfep ke usụn̄.”+
4 Ke ini mbon emi ẹkopde idiọk ikọ emi, mmọ ẹtọn̄ọ ndifụhọ;+ owo mmọ baba kiet inyụn̄ isịneke n̄kpọmbana ke idem.
5 Ndien Jehovah ọdọhọ Moses ete: “Dọhọ nditọ Israel ete, ‘Mbufo ẹdi mbon oro ẹsọn̄de obotitọn̄.+ Ayak esisịt+ ami n̄kpodụk ke otu mbufo nnyụn̄ nsobo mbufo mfep. Ntre ndien ẹsion̄o n̄kpọmbana ke idem mbufo ẹfep, sia nyomde ndifiọk se ndinamde mbufo.’”+
6 Ndien nditọ Israel ẹsion̄o n̄kpọmbana mmọ ẹfep ke idem ọtọn̄ọde ke Obot Horeb.+
7 Ndien Moses emen tent esie adaha okowụk ke edem itienna, ke ebiet emi oyomde usụn̄ ọkpọn̄ itienna; ndien enye okot enye tent usopidem. Ndien owo ekededi eke oyomde ndikop+ se Jehovah enyenede nditịn̄ ọyọwọrọ aka tent usopidem, emi odude ke edem itienna.
8 Edikem ke ini Moses ọwọrọde aka tent emi, kpukpru owo ẹyedaha ke enyọn̄ ẹdada+ ke enyịnusụn̄ tent mmọ, ẹnyụn̄ ẹse Moses tutu enye ebe odụk esịt tent.
9 Ekem ke ndondo oro Moses ebede odụk esịt tent, adaha obubịt enyọn̄+ oyosụhọde edida ke enyịnusụn̄ tent, ndien Abasi etịn̄ ikọ+ ye Moses.
10 Ndien kpukpru owo ẹkụt adaha obubịt enyọn̄+ adade ke enyịnusụn̄ tent oro, kpukpru owo ẹnyụn̄ ẹdaha ke enyọn̄ ẹnụhọ ke enyịnusụn̄ tent mmọ.+
11 Ndien Jehovah etịn̄ ikọ iso ye iso ye Moses,+ kpa nte emi owo etịn̄de ikọ ye ekemmọ owo. Ke ini enye afiakde edi itienna, asan̄autom esie+ Joshua, eyen Nun,+ osụk adada do ke tent, nte adaidaha.
12 Ndien Moses ọdọhọ Jehovah ete: “Sese, afo ọdọhọ mi ete, ‘Da mbon emi dọk,’ edi afo usianke mi owo emi afo edisiode ọdọn̄ asan̄a ye ami. Akan oro, afo ọmọdọhọ ete, ‘Mmọfiọk fi ke enyịn̄,+ n̄ko, afo omokụt mfọn ke iso mi.’
13 Mbọk, edieke edide mmokụt mfọn ke iso fo,+ mbọk, nam mi mfiọk usụn̄ fo,+ man mfiọk fi, man nnyụn̄ n̄kụt mfọn ke iso fo. Nyụn̄ ti ete ke mbon emi ẹdi ikọt fo.”+
14 Ntre enye ọdọhọ ete: “Ami nyasan̄a ye afo,+ ndinyụn̄ ntreke ndinọ fi nduọkodudu.”+
15 Ndien enye ọdọhọ enye ete: “Edieke afo mûdusan̄ake ye ami uka, kûda nnyịn udaha ke ebiet emi udọk.
16 Ndien ẹdida nso ẹfiọk ke ami ye ikọt fo imokụt mfọn ke iso fo? Nte idịghe ke afo ndisan̄a ye nnyịn,+ ke emi ama akanam mi ye ikọt fo idi isio ye kpukpru mbon eken emi ẹdude ke iso isọn̄?”+
17 Ndien Jehovah ọdọhọ Moses ete: “Nyanam n̄kpọ emi afo etịn̄de+ mi n̄ko, koro afo omokụt mfọn ke iso mi, mmonyụn̄ mfiọk fi ke enyịn̄.”
18 Ntre enye ọdọhọ ete: “Mbọk, nam mi n̄kụt ubọn̄ fo.”+
19 Edi enye ọdọhọ ete: “Ami nyanam kpukpru nti ido mi ẹbe fi ke iso,+ nyonyụn̄ ntan̄a enyịn̄ Jehovah ke iso fo;+ nnyụn̄ mfọn mfọn ye owo eke ndifọnde, nnyụn̄ ntua owo eke ndituade mbọm.”+
20 Enye onyụn̄ adian do ete: “Afo ukemeke ndikụt mi iso, koro baba owo kiet ikemeke ndikụt mi iso nnyụn̄ ndu uwem.”+
21 Jehovah onyụn̄ ọdọhọ ete: “Sese itie odu mi ekpere mi, afo da ke enyọn̄ itiat emi.
22 Ndien ama ekem ke adan̄aemi ubọn̄ mi asan̄ade ebe, nyemen fi nsịn ke abaitiat oro, nnyụn̄ nda ekaubọk mi mfụk fi nte ufụkn̄kpọ tutu nsan̄a mbe.
23 Ekem nyofụhọde ekaubọk mi, ndien afo oyokụt mi edem. Edi udukwe mi iso.”+
