Exodus 35;1-35
35 Ekem Moses osop ofụri esop nditọ Israel ọtọkiet onyụn̄ ọdọhọ mmọ ete: “Emi edi ikọ oro Jehovah etemede, ete ẹnam:+
2 Mbufo ẹnam utom ke usen itiokiet,+ edi ọyọhọ usen itiaba edidi edisana ọnọ mbufo, kpa sabbath emi ẹduọkde odudu ofụri ofụri ẹnọ Jehovah. Ẹnyene ndiwot owo ekededi eke anamde utom ke esịt.+
3 Ẹkûbara ikan̄ ke ebiet ekededi emi mbufo ẹdụn̄de ke usen sabbath.”
4 Ndien Moses ọdọhọ ofụri esop nditọ Israel ete: “Emi edi ikọ oro Jehovah etemede, ete,
5 ‘Mbufo ẹtịp etịbe ke otu mbufo ẹnọ Jehovah.+ Yak owo ekededi eke esịt esie enyịmede+ ada enye edi nte etịbe Jehovah, oro edi, gold ye silver ye okpoho+
6 ye blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi ye eti linen ye idet ebot+
7 ye ikpa okukịm erọn̄ emi ẹnamde eyịbe ye ikpa seal ye eto acacia
8 ye aran ikan̄ ye aran balsam emi ẹsidade ẹnam aran oro ẹsidade ẹyet owo ye edifuọn̄ incense+
9 ye itiat onyx ye itiat emi ẹsịnde ke ephod+ ye ke mbana ikpanesịt.+
10 “‘Ndien yak kpukpru mbon esịt ọniọn̄+ ke otu mbufo ẹdi ẹdinam kpukpru se Jehovah eketemede,
11 oro edi, tent utuakibuot ye tent esie ye se ẹdade ẹfụk enye, ye mme ekọp esie ye mme obubọk esie, ye mbiọn̄ eto esie, ye mme adaha esie ye mme etak esie;
12 Ekebe+ ye nnyan eto esie,+ okukịp+ ye ikpehe+ emi ẹdade ẹkwi;
13 okpokoro+ ye nnyan eto esie ye kpukpru n̄kpoduoho esie ye uyo iso Abasi;+
14 ye uwụk utuenikan̄+ emi ọnọde un̄wana ye n̄kpoduoho esie ye utuenikan̄ esie ye aran+ ikan̄;
15 ye itieuwa ufọp incense+ ye nnyan eto esie; ye aran oro ẹsidade ẹyet owo ye edifuọn̄ incense;+ ye ọfọn̄ enyịnusụn̄ tent utuakibuot;
16 itieuwa emi ẹsiwade edifọp uwa+ ye n̄kpọ un̄wan n̄kpọ emi ẹnamde ke okpoho ye nnyan eto esie ye ofụri n̄kpoduoho esie; besịn ye n̄kpọ udori besịn;+
17 ọfọn̄ ikpehe okụre,+ mme adaha esie ye mme etak esie; ye ọfọn̄ enyịnusụn̄ inuaotop okụre;
18 ọkpọhọ tent utuakibuot ye ọkpọhọ tent okụre ye mme urụk mmọ;+
19 mme ọfọn̄+ eke ẹdọkde-dọk man ẹsịne ẹnam utom ke edisana ebiet, ndisana ọfọn̄+ Aaron oku ye mme ọfọn̄ oro nditọiren esie ẹdisịnede ẹnam utom nte mme oku.’”
20 Ntem ofụri esop nditọ Israel ẹdaha ke iso Moses ẹwọn̄ọ.
21 Ndien kpukpru owo eke esịt onụkde mmọ,+ ye mmọ eke esịt edemerede, ẹda etịbe Jehovah ẹdi ke utom tent usopidem ye ke kpukpru utom esie ye ke edida nnam ndisana ọfọn̄.
22 Ndien mmọ ẹdọdiọn̄ ẹdi, irenowo ye iban, kpukpru owo eke esịt edemerede. Mmọ ẹda n̄kpaha ye n̄kpanuen utọn̄ ye n̄kpanuen ye n̄kpọmbana iban, kpukpru orụk n̄kpọmbana gold, oro edi, kpukpru owo eke ẹdade gold ẹsọk Jehovah nte edifụn̄ uwa.+
23 Ndien kpukpru owo emi ẹnyenede blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi ye eti linen ye idet ebot ye ikpa okukịm erọn̄ emi ẹnamde eyịbe ye ikpa seal, ẹda mmọ ẹdi.+
24 Kpukpru owo eke ẹtịpde silver ye okpoho ẹda etịbe Jehovah ẹdi, ndien kpukpru owo emi ẹnyenede eto acacia ndida nnam utom, ẹda ẹdi.
25 Ndien kpukpru iban emi ẹnyenede esịt ọniọn̄+ ẹdọk n̄kpọ ke ubọk mmọ, ẹnyụn̄ ẹdọdiọn̄ ẹda se mmọ ẹdọkde ẹdi, oro edi, blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi ye eti linen.
26 Ndien kpukpru iban emi ẹnyenede ọniọn̄, eke esịt edemerede mmọ, ẹdọk idet ebot.
27 Ndien mbọn̄ ẹda itiat onyx ye itiat emi ẹdisịnde ke ephod ye mbana ikpanesịt ẹdi,+
28 ọkọrọ ye aran balsam ye aran ikan̄ ye aran oro ẹsidade ẹyet owo ye edifuọn̄ incense.+
29 Kpukpru iren ye iban eke esịt ẹdemerede mmọ ndida n̄kpọ ndi ke kpukpru utom oro Jehovah eketemede Moses, ẹnam ntre; nditọ Israel ẹda enọ unyịmesịt ẹsọk Jehovah.+
30 Ekem Moses ọdọhọ nditọ Israel ete: “Sese, Jehovah omokot Bezalel,+ eyen Uri, eyen Hur, owo esien Judah, ke enyịn̄.
31 Ndien enye esịn enye spirit Abasi ke idem ọyọhọ man enye enyene ọniọn̄, ye asian ye ifiọk ye kpukpru orụk usọ
32 ndinam utom usọ, ye ke ndinam utom ke gold ye silver ye okpoho,+
33 ye ke ndisọi itiat eke ẹdade ẹnam n̄kpọ ye eto eke ẹdade ẹnam kpukpru orụk utom usọ.+
34 Ndien enye emesịn ke esịt esie ete ọnọ mme owo ukpep, enye ye Oholiab+ eyen Ahisamach owo esien Dan.
35 Enye emesịn mmọ ọniọn̄ ke esịt ọyọhọ+ ndinam kpukpru utom usọ ye utom edikịm ọfọn̄ nsịn fansi+ ye eke udọk-ọfọn̄ ke blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi ye eti linen, ye utom utuak-ọfọn̄, kpa irenowo emi ẹnamde kpukpru orụk utom ye ndudiọn̄.
