Exodus 4;1-31
4 Edi, Moses ọdọhọ ete: “Nso edieke mmọ mînịmke mi ke akpanikọ, mînyụn̄ ikopke uyo mi,+ koro mmọ ẹyedọhọ ẹte, ‘Jehovah ikowụtke fi idem.’”
2 Ndien Jehovah obụp enye ete: “Nso idi oro ke ubọk fo?” ndien enye ọbọrọ ete: “Esan̄.”+
3 Ndien enye ete: “Top enye nịm ke isọn̄.” Ntre enye otop esan̄ oro enịm ke isọn̄, ndien esan̄ oro akabade urụkikọt;+ ndien Moses efehe ọkpọn̄ enye.
4 Ndien Jehovah ọdọhọ Moses ete: “Nyan ubọk fo mụm enye isịm.” Ndien enye anyan ubọk esie omụm urụkikọt oro, ndien enye akabade esan̄ ke ubọk esie.
5 Ke nditịn̄ nte enye eketịn̄de, “Man mmọ ẹkpenịm ke akpanikọ ẹte ke Jehovah Abasi mme ete ete mmọ,+ Abasi Abraham+ ye Abasi Isaac+ ye Abasi Jacob,+ ama owụt fi idem.”+
6 Ndien Jehovah ọtọn̄ọ ntak ọdọhọ enye ete: “Mbọk, sịn ubọk fo ke ikpanesịt ọfọn̄ fo.” Ntre enye esịn ubọk esie. Ke ini enye osiode, sese, ubọk esie akabade akpamfia onyụn̄ afia nte snow!+
7 Ndien enye ọdọhọ ete: “Tọn̄ọ ntak sịn ubọk fo ke ikpanesịt ọfọn̄ fo.” Ntre enye ọtọn̄ọ ntak esịn ubọk. Ke ini enye osiode ubọk, sese, ubọk esie afiak etie nte ofụri idem esie!+
8 Ke nditịn̄ nte enye eketịn̄de, “Ama ekem, edieke mmọ mînịmke fi ke akpanikọ, mînyụn̄ inịmke akpa idiọn̄ọ oro, mmọ ẹyenịm udiana idiọn̄ọ oro ke akpanikọ.+
9 Ndien ama ekem, edieke mmọ mînịmke idiọn̄ọ mbiba emi ke akpanikọ, mînyụn̄ ikopke uyo fo,+ afo ndien enyene ndikoi mmọn̄ ke Akpa Nile nduọk ke obot; ndien mmọn̄ emi afo edikoide ke Akpa Nile ayakabade iyịp ke obot.”+
10 Ndien Moses ọdọhọ Jehovah ete: “Mbọk, Jehovah, ami ndịghe owo udọnikọ, n̄kedịghe owo udọnikọ n̄kpọn̄ emi ekebede m̀mê mbemiso oro m̀mê idem ke emi afo osụk etịn̄de ikọ ye asan̄autom fo mi, koro ami ndobide inua nnyụn̄ ndobide edeme.”+
11 Ndien Jehovah obụp enye ete: “Anie ọnọ owo inua, anie onyụn̄ anam imụm m̀mê inan m̀mê okụt-usụn̄ m̀mê nnan? Nte idịghe ami Jehovah?+
12 Ka ndien, ami nyodu ye inua fo nyonyụn̄ nteme fi se afo editịn̄de.”+
13 Edi enye ọdọhọ ete: “Mbọk, Jehovah, dọn̄ owo en̄wen eke afo edidọn̄de.”
14 Ndien Jehovah ayat esịt ye Moses, onyụn̄ ọdọhọ ete: “Nte Aaron eyen Levi idịghe eyenuka?+ Mmọfiọk nte enye etịm ọdiọn̄ọ nditịn̄ ikọ. Ndien, n̄ko, sese, enye ke ọwọrọ edi ndisobo ye afo. Ke ini enye edikụtde fi, enye ayadat esịt.+
15 Ndien afo enyene nditịn̄ nnọ enye nnyụn̄ nsịn enye ikọ emi ke inua;+ ndien ami nyodu ye inua fo nnyụn̄ ndu ye inua esie,+ nyonyụn̄ nteme mbufo se mbufo ẹdinamde.+
16 Enye oyonyụn̄ etịn̄ ikọ ye mbio oro ọnọ fi; ndien enye eyetie nte inua ọnọ fi,+ afo oyonyụn̄ etie nte Abasi ọnọ enye.+
17 Ndien afo ayakama esan̄ emi ke ubọk man akpada anam mme idiọn̄ọ.”+
18 Ntem Moses ọnyọn̄ ebịne Jethro, ete an̄wan esie, ọkọdọhọ enye ete:+ “Mbọk, nyom ndinyọn̄ ntiene nditọete mi emi ẹdude ke Egypt man n̄kese m̀mê mmọ ke ẹsụk ẹdodu ke uwem.”+ Ntre Jethro ọbọrọ Moses ete: “Ka ke emem.”+
19 Ekem Jehovah ọdọhọ Moses ke Midian ete: “Fiak ka Egypt, koro kpukpru mbon oro ẹkeyomde ukpọn̄ fo ẹmekpan̄a.”+
20 Ekem Moses ada n̄wan esie ye nditọiren esie, odori ke ass, onyụn̄ afiak aka isọn̄ Egypt. Moses onyụn̄ akama esan̄ ata Abasi ke ubọk esie.+
21 Ndien Jehovah ọdọhọ Moses ete: “Ke ini afo afiakde ọnyọn̄ Egypt, kụt ete amanam kpukpru mme utịben̄kpọ emi nsịnde fi ke ubọk, ke iso Pharaoh.+ Ami nyayak esịt esie ọsọn̄;+ enye idinyụn̄ iyakke ikọt mi ẹnyọn̄ọ.+
22 Ndien afo enyene ndidọhọ Pharaoh ete: ‘Ntem ke Jehovah ọdọhọ ete: “Israel edi eyen mi, kpa akpan mi.+
23 Nnyụn̄ ndọhọ fi nte: Yak eyen mi ọnyọn̄ man enye akanam n̄kpọ ọnọ mi. Edi mûnyịmeke ndiyak enye ọnyọn̄, sese, ami nyowot eyen fo, kpa akpan fo.”’”+
24 Edikem ke usụn̄, ke itienna,+ Jehovah osobo ye enye,+ onyụn̄ oyom ndiwot enye.+
25 Ndien Zipporah+ ada ikwa emi ẹdade itiat ẹnam esịbe eyen esie edụt+ onyụn̄ anam enye otụk ikpat esie ndien ọdọhọ ete: “Edi koro afo edide ebendọ iyịp ọnọ mi.”
26 Ntem enye asana eyen oro ayak. Ndien n̄wan emi ọdọhọ ete: “Ebendọ iyịp,” ke ntak mbobi.
27 Ndien Jehovah ọdọhọ Aaron ete: “Ka kosobo ye Moses ke wilderness.”+ Ndien enye aka okosobo ye enye ke obot ata Abasi+ onyụn̄ etịm enye inua.
28 Ndien Moses asian Aaron kpukpru ikọ Jehovah, kpa enye emi ọkọdọn̄de enye utom,+ ye kpukpru idiọn̄ọ emi enye eketemede enye ete anam.+
29 Ndien Moses ye Aaron ẹka ẹkesop kpukpru mbiowo nditọ Israel ọtọkiet.+
30 Ekem Aaron etịn̄ kpukpru ikọ oro Jehovah ọkọdọhọde Moses,+ onyụn̄ anam mme idiọn̄ọ+ oro ke iso mme owo.
31 Ntem mme owo ẹnịm ke akpanikọ.+ Ke ini mmọ ẹkopde ẹte Jehovah ama ọwọn̄ọde ntịn̄enyịn esie+ ọnọ nditọ Israel onyụn̄ okụt ukụt mmọ,+ mmọ ẹnụhọ ẹnyụn̄ ẹduọ ke isọn̄.+
