Exodus 5;1-23
5 Ekem Moses ye Aaron ẹdi ẹdidọhọ Pharaoh ẹte:+ “Ntem ke Jehovah Abasi Israel ọdọhọ ete, ‘Yak ikọt mi ẹnyọn̄ọ, man mmọ ẹkenam usọrọ ẹnọ mi ke wilderness.’”+
2 Edi Pharaoh ọdọhọ ete: “Jehovah edi anie,+ eke n̄kpokopde uyo esie nnyụn̄ nyak Israel ẹnyọn̄ọ?+ Mfiọkke Jehovah ndomo esisịt,+ akan oro, ndiyakke Israel ẹnyọn̄ọ.”+
3 Edi mmọ ẹdọhọ ẹte: “Abasi mme Hebrew omosobo ye nnyịn.+ Mbọk, nnyịn iyom ndinam isan̄ usen ita n̄ka wilderness n̄kawa uwa nnọ Jehovah Abasi nnyịn;+ mbak enye edida idiọk udọn̄ọ m̀mê akan̄kan̄ etiene nnyịn.”+
4 Ntre edidem Egypt ọdọhọ mmọ ete: “Nso inam mbufo, Moses ye Aaron, ẹnam mbon emi ẹtre utom mmọ?+ Mbufo ẹka ẹkenam utom mbufo!”+
5 Ndien Pharaoh ọdọhọ ete: “Sese! idụt emi ẹmewak idahaemi,+ ndien mbufo ẹmenam mmọ ẹtre utom.”+
6 Ndien kpa ke usen oro Pharaoh owụk mme andinyịk mbon oro ẹnam utom ye mme etubom mmọ,+ ete:
7 “Mbufo ẹkûnọ mmọ aba n̄kpọ uda nnam kọrikọri+ nte ẹkesinọde ke akpa. Ẹyak mmọ ẹka ẹkeda mmọ ke idemmọ.
8 Akan oro, mbufo ẹnam mmọ ẹnam kpa ibat kọrikọri oro mmọ ẹkesinamde ke akpa. Ẹkûsio baba kiet, koro mmọ ẹfu ifu.+ Oro esịn mmọ ẹfiori ẹte, ‘Nnyịn iyom ndinyọn̄, nnyịn iyom ndika n̄kawa uwa nnọ Abasi nnyịn!’+
9 Yak utom efịk mmọ, mmọ ẹnyụn̄ ẹnam utom, mmọ ẹkûnyụn̄ ẹkpan̄ utọn̄ ke ikọ nsu.”+
10 Ntre mme andinyịk mbon oro ẹnam utom+ ye mme etubom mmọ ẹwọn̄ọ ẹka ẹkedọhọ mmọ ẹte: “Ntem ke Pharaoh ọdọhọ ete, ‘Ndinọhọ mbufo aba n̄kpọ uda nnam kọrikọri.
11 Mbufo ẹka ẹkeda mmọ ke idem mbufo ke ebiet ekededi eke mbufo ẹdikụtde, koro owo mîdisioho baba n̄kpọ kiet ke se mbufo ẹkesinamde.’”+
12 Ndien mmọ ẹsuana ke ofụri isọn̄ Egypt ẹketan̄ mme ọkpọ wheat ndida nnam n̄kpọ unam kọrikọri.
13 Ndien mme andinyịk mmọ ẹnam utom ẹka iso ẹkpak mmọ,+ ẹte: “Ẹkụre utom mbufo, owo kiet kiet enyene ndinam utom usen esie n̄kụre, kpa nte ẹkesinamde ke ini emi ẹkesinọde mbufo n̄kpọ ndida nnam.”+
14 Ekem ẹmia+ mme etubom+ nditọ Israel, oro mme eseutom Pharaoh ẹkenịmde ẹte ẹse mmọ enyịn, mmọ emi ẹnyụn̄ ẹdọhọ ẹte: “Anam didie mbufo mîkanamke udeme utom unam kọrikọri+ mbufo ima, n̄kpọn̄ ye mfịn, nte ẹkesinamde ke akpa?”+
15 Ndien mme etubom+ nditọ Israel ẹdi ẹdiseme ẹnọ Pharaoh, ẹte: “Nso inam afo anamde ntem ye nnyịn mme asan̄autom fo?
16 Owo inọhọ mme asan̄autom fo n̄kpọ uda nnam kọrikọri, kpa ye oro mmọ ke ẹdọhọ nnyịn ẹte, ‘Mbufo ẹnam kọrikọri!’ ndien sese, ke ẹmia mme asan̄autom fo, ke ini edide ikọt fo ẹdue.”+
17 Edi enye ọbọrọ ete: “Mbufo ẹfu ifu, mbufo ẹfu ifu!+ Oro esịn mbufo ẹdọhọde ẹte, ‘Nnyịn iyom ndinyọn̄, nnyịn iyom ndika n̄kawa uwa nnọ Jehovah.’+
18 Mbufo ẹka ndien, ẹkenam utom! Okposụkedi owo mîdinọhọ mbufo n̄kpọ uda nnam kọrikọri, mbufo ẹnyene ndinọ n̄kemn̄kem ibat kọrikọri.”+
19 Ndien mme etubom nditọ Israel ẹkụt idemmọ ke idiọk itie ke ntak oro ẹdọhọde ẹte:+ “Mbufo ẹkûsio baba kiet ke ibat kọrikọri emi owo enyenede ndinam ke usen.”+
20 Ekem mmọ ẹdisobo ye Moses ye Aaron,+ emi ẹdade do ẹbet ndisobo ye mmọ nte mmọ ẹtode ọtọ Pharaoh ẹwọrọ ẹdi.
21 Ndien kpa idahaoro mmọ ẹdọhọ mmọ ẹte: “Jehovah akpakam ese mbufo onyụn̄ ekpe ikpe ye mbufo,+ sia mbufo ẹnamde nnyịn idi n̄kpọ itekesịt+ ke iso Pharaoh ye ke iso mme asan̄autom esie ẹnyụn̄ ẹsịnde mmọ akan̄kan̄ ke ubọk ẹte ẹda ẹwot nnyịn.”+
22 Ndien Moses ọdọhọ Jehovah+ ete: “Jehovah, ntak emi afo anamde n̄kpọ ọdiọk ye mbon emi?+ Ntak emi afo osiode mi ọdọn̄?+
23 Koro toto nte n̄kaka ke ọtọ Pharaoh n̄ketịn̄ ikọ ke enyịn̄ fo,+ enye ọmọdiọk ye mbon emi,+ afo unyụn̄ unyan̄ake ikọt fo ke baba usụn̄ kiet.”+
