Exodus 7;1-25
7 Mmọdo Jehovah ọdọhọ Moses ete: “Sese, mmanam fi edi Abasi ọnọ Pharaoh,+ ndien Aaron eyenuka eyedi prọfet fo.+
2 Afo eyetịn̄ kpukpru se ndiwụkde fi;+ ndien Aaron eyenuka editịn̄ ikọ ye Pharaoh,+ ndien enye ayayak nditọ Israel ẹwọn̄ọ ke isọn̄ esie ẹnyọn̄ọ.+
3 Edi ami nyayak esịt Pharaoh ọsọn̄,+ nyonyụn̄ nnam mme idiọn̄ọ ye mme utịben̄kpọ mi ẹwak ke isọn̄ Egypt.+
4 Ndien Pharaoh idikpan̄ke utọn̄ inọ mbufo;+ ndien nyemenede ubọk mi ndori Egypt ke idem nnyụn̄ nda ikpọ ubiereikpe+ nsion̄o mme udịm mi,+ kpa ikọt mi+ nditọ Israel,+ mfep ke isọn̄ Egypt.
5 Ndien nditọ Egypt ẹyefiọk ẹte ke ami ndi Jehovah ke ini nnyanarede ubọk mi n̄n̄wana ye Egypt,+ ndien nyosion̄o nditọ Israel ke otu mmọ mfep.”+
6 Ndien Moses ye Aaron ẹnam kpa nte Jehovah eketemede mmọ.+ Mmọ ẹnam kpa ntre.+
7 Ndien Moses ekedi isua anan̄, Aaron okonyụn̄ edi isua anan̄ ye ita, ke ini mmọ ẹtịn̄de ikọ ye Pharaoh.+
8 Ekem Jehovah ọdọhọ Moses ye Aaron ete:
9 “Edieke Pharaoh edidọhọde mbufo ete, ‘Mbufo ẹnam utịben̄kpọ ẹwụt,’+ do afo enyene ndidọhọ Aaron ete, ‘Men esan̄ fo+ top nịm ke isọn̄ ke iso Pharaoh.’ Ndien esan̄ oro ayakabade akamba urụkikọt.”+
10 Ntre Moses ye Aaron ẹka ke ọtọ Pharaoh ẹkenam kpa nte Jehovah eketemede. Ndien Aaron otop esan̄ esie enịm ke isọn̄ ke iso Pharaoh ye ke iso mme asan̄autom esie, ndien esan̄ oro akabade akamba urụkikọt.
11 Edi Pharaoh onyụn̄ okot mbon ọniọn̄ ye mbiaidiọn̄ ẹdi;+ ndien mme oku mfọni ke Egypt ẹnyụn̄ ẹda mfọni mmọ ẹnam ukem utịben̄kpọ oro.+
12 Ntre mmọ kiet kiet ẹtop esan̄ mmọ ẹnịm ke isọn̄, ndien mmọ ẹkabade ikpọ urụkikọt; edi esan̄ Aaron atan̄ mme esan̄ mmọ emen.
13 Edi esịt Pharaoh osụk ọsọsọn̄,+ enye inyụn̄ ikpan̄ke utọn̄ inọ mmọ, kpa nte Jehovah ọkọdọhọde.
14 Ndien Jehovah ọdọhọ Moses ete: “Esịt Pharaoh ke ọsọsọn̄.+ Enye inyịmeke ndiyak mbon emi ẹnyọn̄ọ.+
15 Ka bịne Pharaoh ke usenubọk. Sese! Enye ke ọwọrọ aka akpa!+ Ndien da ke mben Akpa Nile+ man afo osobo ye enye, nyụn̄ kama esan̄ emi akakabarede urụkikọt do ke ubọk fo.+
16 Ndien dọhọ enye ete, ‘Jehovah Abasi mme Hebrew ọkọdọn̄ mi utom ọnọ fi,+ ete: “Yak ikọt mi ẹnyọn̄ọ, man mmọ ẹkenam n̄kpọ ẹnọ mi ke wilderness,”+ edi sese afo ukopke tutu esịm emi.
17 Ntem ke Jehovah ọdọhọ ete:+ “Afo ayada emi ọfiọk ete ke ami ndi Jehovah.+ Sese, ami mmọn̄ nda esan̄ emi ke ubọk mi nyịbi mmọn̄ emi odude ke Akpa Nile,+ ndien enye ayakabade iyịp.+
18 Ndien iyak emi ẹdude ke Akpa Nile ẹyekpan̄a,+ Akpa Nile oyonyụn̄ etebe,+ ndien nditọ Egypt idikemeke ndin̄wọn̄ mmọn̄ Akpa Nile.”’”+
19 Ekem Jehovah ọdọhọ Moses ete: “Dọhọ Aaron ete, ‘Men esan̄ fo nyụn̄ nyan ubọk fo+ ke enyọn̄ mmọn̄ Egypt, ye ke mme akpa mmọ, ye ke mme edịk Nile mmọ, ye ke mme n̄kpọdiọhọ mmọn̄ mmọ,+ ye ke kpukpru obube mmọn̄ mmọ, man mmọ ẹkabade iyịp.’ Ndien iyịp oyodu ke ofụri isọn̄ Egypt ye ke mme n̄kpọ udọn̄ mmọn̄ emi ẹdade eto ẹnam ye ke mme n̄kpọ udọn̄ mmọn̄ emi ẹdade itiat ẹnam.”
20 Ndien Moses ye Aaron ẹsọsọp ẹnam ntre,+ kpa nte Jehovah eketemede,+ ndien enye emenede esan̄ oro ke enyọn̄ eyịbi mmọn̄ emi odude ke Akpa Nile ke iso Pharaoh ye ke iso mme asan̄autom esie,+ ndien ofụri mmọn̄ emi odude ke Akpa Nile akabade iyịp.+
21 Ndien iyak emi ẹdude ke Akpa Nile ẹkpan̄a,+ Akpa Nile onyụn̄ ọtọn̄ọ nditebe; nditọ Egypt inyụn̄ ikemeke ndin̄wọn̄ mmọn̄ Akpa Nile;+ iyịp onyụn̄ odu ke ofụri isọn̄ Egypt.
22 Edi mme oku mfọni ke Egypt ẹda mfọni mmọ ẹnam ukem utịben̄kpọ oro;+ ndien emi anam esịt Pharaoh ọdọdiọn̄ ọsọn̄,+ enye inyụn̄ ikpan̄ke utọn̄ inọ mmọ; kpa nte Jehovah ọkọdọhọde.+
23 Ntem Pharaoh ọwọn̄ọde iso ọnyọn̄ ufọk esie, inyụn̄ ikereke iban̄a n̄kpọ emi.+
24 Ndien kpukpru nditọ Egypt ẹtịbi isọn̄ ẹkanade Akpa Nile ẹyom mmọn̄ ndin̄wọn̄, koro mmọ mîkemeke ndin̄wọn̄ mmọn̄ Akpa Nile.+
25 Ndien usen itiaba ẹdikem tọn̄ọ nte Jehovah ekeyịbi Akpa Nile.
