Exodus 9;1-35
9 Ekem Jehovah ọdọhọ Moses ete: “Ka ke ọtọ Pharaoh nyụn̄ kọdọhọ enye ete,+ ‘Ntem ke Jehovah Abasi mme Hebrew ọdọhọ ete: “Yak ikọt mi ẹnyọn̄ọ man mmọ ẹkenam n̄kpọ ẹnọ mi.
2 Edi edieke afo osụk esịnde ndiyak mmọ ẹnyọn̄ọ onyụn̄ osụk omụmde mmọ enịm,+
3 sese! ubọk Jehovah+ oyotụk mme ufene+ fo emi ẹdude ke in̄wan̄. Ata idiọk udọn̄ọ+ oyomụm mme enan̄-mbakara ye mme ass ye mme camel ye mme enan̄ ye mme erọn̄.
4 Ndien Jehovah ayanam ubahade odu ke ufọt ufene Israel ye ufene Egypt, ndien ufene nditọ Israel baba kiet idikpaha.”’”+
5 Jehovah enịm ini onyụn̄ ọdọhọ ete: “N̄kpọn̄, Jehovah ayanam n̄kpọ emi ke isọn̄ emi.”+
6 Ndien Jehovah anam n̄kpọ emi ke ndan̄nsiere, ndien kpukpru orụk ufene ke Egypt ẹtọn̄ọ ndikpan̄a;+ edi ufene nditọ Israel baba kiet ikpaha.
7 Ekem Pharaoh ọdọn̄ ẹkese, ndien, sese! ufene Israel baba kiet ikpaha. Edi esịt Pharaoh ọdọdiọn̄ ọsọn̄,+ enye inyụn̄ iyakke mbon oro ẹnyọn̄ọ.
8 Ekem Jehovah ọdọhọ Moses ye Aaron ete: “Mbufo ẹwobi ntọn̄ ke itie ufọp kọrikọri+ ẹyọhọ ekaubọk mbiba, ndien Moses enyene nditop enye ke enyọn̄ ke iso Pharaoh.
9 Ndien ntọn̄ oro ayakabade obu ke ofụri isọn̄ Egypt, onyụn̄ odoro owo ye unam ke idem onyụn̄ akabade mbufụt eke odụkde imịn+ ke ofụri isọn̄ Egypt.”
10 Ntre mmọ ẹwobi ntọn̄ ke itie ufọp kọrikọri ẹnyụn̄ ẹkeda ke iso Pharaoh, ndien Moses otop ntọn̄ oro ke enyọn̄, enye onyụn̄ odoro owo ye unam ke idem onyụn̄ akabade mbufụt eke odụkde imịn.+
11 Ndien mme oku mfọni ikemeke ndida ke iso Moses ke ntak mbufụt emi, koro mbufụt emi ẹma ẹfịt mme oku mfọni ye kpukpru nditọ Egypt.+
12 Edi Jehovah ayak esịt Pharaoh ọsọn̄, enye inyụn̄ ikpan̄ke utọn̄ inọ mmọ, kpa nte Jehovah ọkọdọhọde Moses.+
13 Ekem Jehovah ọdọhọ Moses ete: “Bak demede ke usenubọk kada ke iso Pharaoh,+ nyụn̄ dọhọ enye ete, ‘Ntem ke Jehovah Abasi mme Hebrew ọdọhọ ete: “Yak ikọt mi ẹnyọn̄ọ man mmọ ẹkenam n̄kpọ ẹnọ mi.+
14 Koro ke emi ke nda kpukpru ufen mmia fi ye mme asan̄autom fo ye ikọt fo, man afo ọfiọk ete ke idụhe owo ndomokiet eke ebietde mi ke ofụri isọn̄.+
15 Koro adan̄aemi n̄kpanyanade ubọk mi nda idiọk udọn̄ọ mmia fi ye ikọt fo man ẹsobo fi ẹfep ke isọn̄.+
16 Edi, ke akpanikọ, kpa ntak emi akanam mi nsụk nnịm fi uwem,+ man n̄wụt fi odudu mi, man ẹnyụn̄ ẹtan̄a enyịn̄ mi ke ofụri isọn̄.+
17 Ndi afo ke osụk ananam n̄kpọ iseri iseri ye ikọt mi unyụn̄ uyakke mmọ ẹnyọn̄ọ?+
18 Sese, ke ukem ini emi n̄kpọn̄, ami nyanam ọkpọsọn̄ edịm itiat edep, kpa orụk oro akanam mîdepke toto nte Egypt okodu tutu esịm emi.+
19 Ndien, ke emi, dọn̄ ẹketan̄ kpukpru ufene fo ye kpukpru se inyenede fi ke in̄wan̄ ẹdidọn̄ ke ufọk. Koro amaedi owo ye unam ekededi eke ẹdidude ke in̄wan̄ emi owo mîdinamke ẹdụk ufọk, edịm itiat+ eyetịm mmọ, ndien mmọ ẹyekpan̄a.”’”
20 Owo ekededi ke otu mme asan̄autom Pharaoh eke ikọ Jehovah anamde enye ndịk anam mme asan̄autom esie ye mme ufene esie ẹfehe ẹdidụk ufọk,+
21 edi owo ekededi eke mîdọn̄ke enyịn ke ikọ Jehovah ayak mme asan̄autom esie ye mme ufene esie ẹdu ke in̄wan̄.+
22 Ndien Jehovah ọdọhọ Moses ete: “Menede ubọk fo nyan+ ke enyọn̄ man edịm itiat+ edep ke ofụri isọn̄ Egypt etịm owo ye unam ye kpukpru ikọn̄ in̄wan̄ ke isọn̄ Egypt.”
23 Ntre Moses emenede esan̄ esie anyan ke enyọn̄; ndien Jehovah anam obuma asiaha, edịm itiat+ onyụn̄ edep, ndien ikan̄ asak osụhọde edi isọn̄, Jehovah onyụn̄ anam edịm itiat edep ke isọn̄ Egypt.
24 Ntem ke edịm itiat edep, ikan̄ onyụn̄ abuaha ye edịm itiat oro, edep tutu mbiet esie idụhe ke ofụri isọn̄ Egypt tọn̄ọ nte enye ekedi idụt.+
25 Ndien edịm itiat edep ke ofụri isọn̄ Egypt. Edịm itiat onyụn̄ etịm kpukpru se idude ke in̄wan̄, ọtọn̄ọde ke owo tutu esịm unam, ye kpukpru orụk ikọn̄ ke in̄wan̄; onyụn̄ obụn̄ kpukpru orụk eto ke in̄wan̄.+
26 Isọn̄ Goshen kpọt, emi nditọ Israel ẹkedude, ke edịm itiat+ oro mîkedepke.
27 Ekem Pharaoh ọdọn̄ ẹkekot Moses ye Aaron ẹdi onyụn̄ ọdọhọ mmọ ete: “Mmanam idiọkn̄kpọ isan̄ enye emi.+ Jehovah emenen,+ edi ami ye ikọt mi imedue.
28 Ẹkpe Jehovah ubọk ẹte obuma ye edịm itiat Abasi ẹtre.+ Koro mmenyịme ndiyak mbufo ẹnyọn̄ọ, mbufo idinyụn̄ idụhe mi aba.”
29 Ntre Moses ọdọhọ enye ete: “Mma nsụk n̄wọwọrọ ke obio, nyemenede ubọk mi nnọ Jehovah.+ Obuma eyetre, edịm itiat idinyụn̄ idepke aba, man afo ọfiọk ete ke isọn̄ emi enyene Jehovah.+
30 Amaedi afo ye mme asan̄autom fo, mmọfọfiọk nte ke kpa ye oro mbufo idibakke Jehovah Abasi.”+
31 Edịm itiat ama abiat flax ye barley, koro barley ama osion̄o idem, flax onyụn̄ osion̄o mfri.+
32 Edi edịm itiat ikabiatke wheat ye spelt,+ koro ini mmọ mîkekemke.
33 Ndien Moses ọwọrọ ke obio ọkpọn̄ Pharaoh onyụn̄ ekemenede ubọk esie ọnọ Jehovah, ndien obuma ye edịm itiat ẹtọn̄ọ nditre, edịm onyụn̄ ebiere ke isọn̄.+
34 Ke ini Pharaoh okụtde ke edịm ye edịm itiat ye obuma ẹtre, enye ye mme asan̄autom esie ẹtọn̄ọ ntak ẹnam idiọkn̄kpọ ẹnyụn̄ ẹsọn̄ esịt.+
35 Ndien esịt Pharaoh ọdọdiọn̄ ọsọn̄, enye inyụn̄ iyakke nditọ Israel ẹnyọn̄ọ, kpa nte Jehovah akadade inua Moses etịn̄.+
