Ezekiel 14;1-23
14 Ndien irenowo ke otu mbiowo Israel ẹdi ẹbịne mi ẹnyụn̄ ẹditie mi ke iso.+
2 Ekem uyo Jehovah esịm mi, ete:
3 “Eyen owo, amaedi irenowo emi, mmọ ẹmenam mme mbubiam mbiet mmọ ẹdọk ẹdi esịt mmọ, ẹmenyụn̄ ẹda n̄kpọ iduọ emi edide ntak ndudue mmọ ẹnịm ke iso mmọ.+ Nte n̄kpayak mmọ ẹdibụp mi n̄kpọ?+
4 Mmọdo tịn̄ ikọ ye mmọ nyụn̄ dọhọ mmọ ete, ‘Ntem ke Jehovah Akakan Ọbọn̄ Andikara ọdọhọ ete: “Owo ekededi ke ufọk Israel oro anamde mme mbubiam mbiet+ esie ẹdọk ẹdi esịt esie onyụn̄ adade n̄kpọ iduọ oro edide ntak ndudue esie enịm ke iso esie onyụn̄ edide ebịne prọfet, ami Jehovah nyọbọrọ enye n̄kpọ oro nte ekemde ye uwak mbubiam mbiet esie,+
5 man mmụm ufọk Israel ke esịt+ mmọ, koro mme mbubiam mbiet mmọ amanam mmọ ẹdian̄ade ẹkpọn̄ mi—kpukpru mmọ.”’+
6 “Mmọdo dọhọ ufọk Israel ete, ‘Ntem ke Jehovah Akakan Ọbọn̄ Andikara ọdọhọ ete: “Ẹfiak ẹdi ẹnyụn̄ ẹsion̄o idem ẹkpọn̄ mme mbubiam mbiet+ mbufo ẹnyụn̄ ẹwọn̄ọde iso mbufo ẹkpọn̄ kpukpru mbubiam n̄kpọ mbufo;+
7 koro owo ekededi ke ufọk Israel m̀mê ke otu isenowo eke odụn̄de nte esenowo ke Israel, oro adian̄arede ada etre nditiene mi+ onyụn̄ anamde mme mbubiam mbiet esie ẹdọk ẹdi esịt esie onyụn̄ adade n̄kpọ iduọ oro edide ntak ndudue esie enịm ke iso esie onyụn̄ edide ebịne prọfet man edibụp mi n̄kpọ aban̄a idemesie,+ ami Jehovah nyọbọrọ enye.
8 Ndien ami ndinenke iso ye owo+ oro nyonyụn̄ nnịm enye ke idiọn̄ọ+ ye ke ufiet,+ nnyụn̄ nsịbe enye mfep ke otu ikọt mi;+ ndien mbufo ẹyefiọk ẹte ke ami ndi Jehovah.”’+
9 “‘Ndien amaedi prọfet oro, edieke ẹbian̄ade enye ndien enye etịn̄ ikọ, ami, Jehovah, mbian̄a prọfet oro;+ ndien ami nyanyanade ubọk mi n̄n̄wana ye enye nnyụn̄ nsobo enye mfep ke otu ikọt mi Israel.+
10 Ndien mmọ ẹyebiom ndudue mmọ.+ Ndudue andibụp edidi ukem nte ndudue prọfet oro,+
11 mbak mbon ufọk Israel ẹdiyo aba ẹkpọn̄ usụn̄ ẹtre nditiene mi+ ẹdinyụn̄ ẹtọn̄ọ aba ntak ẹsabade idemmọ ke kpukpru ubiatibet mmọ. Ndien mmọ ẹyedi ikọt mi, ami nyonyụn̄ ndi Abasi mmọ,’ uyo Jehovah Akakan Ọbọn̄ Andikara edi emi.”+
12 Ndien uyo Jehovah esịm mi, ete:
13 “Eyen owo, edieke isọn̄ anamde idiọkn̄kpọ edue mi ke enye nditre ndinam akpanikọ,+ ami n̄ko nyanyanade ubọk mi n̄n̄wana ye enye nnyụn̄ mbụn̄ mme eto emi ẹyịride+ ekara uyo nnọ enye, ndien nyọdọn̄ akan̄+ utom nnọ enye nnyụn̄ nsịbe owo ye ufene mfep ke enye.”+
14 “‘Ndien edieke owo mbita emi, Noah,+ Daniel+ ye Job,+ ẹkpedude ke esịt esie, mmọ ẹkpenyan̄a ukpọn̄ mmọ ke ntak edinen ido+ mmọ,’ uyo Jehovah Akakan Ọbọn̄ Andikara edi emi.”+
15 “‘Mîdịghe edieke n̄kpanamde ndiọi unam ikọt ẹsan̄a ke isọn̄+ oro ẹbe ndien mmọ ẹnam enye ataba nditọ+ ndien enye akabade ndon, owo ekededi inyụn̄ isan̄ake ibe ke ntak ndiọi unam oro,+
16 edieke owo mbita emi ẹkpedude ke esịt esie, ma uwem mi,’ uyo Jehovah Akakan Ọbọn̄ Andikara edi emi, ‘mmọ ikpanyan̄ake nditọiren m̀mê nditọiban; mmọ kpọt ke ẹkpenyan̄a, isọn̄ okponyụn̄ akabade ndon.’”+
17 “‘Mîdịghe edieke n̄kpadade akan̄kan̄ ntiene isọn̄ oro,+ n̄kponyụn̄ ndọhọde nte: “Yak akan̄kan̄ asan̄a ke isọn̄ oro ebe,” n̄kponyụn̄ nsịbede owo ye ufene mfep ke enye,+
18 idem edieke owo mbita emi ẹkpedude ke esịt esie,+ ma uwem mi,’ uyo Jehovah Akakan Ọbọn̄ Andikara edi emi, ‘mmọ ikpanyan̄ake nditọiren m̀mê nditọiban, edi mmọ kpọt ke ẹkpenyan̄a.’”+
19 “‘Mîdịghe edieke n̄kpọdọn̄de idiọk udọn̄ọ etiene isọn̄+ oro, n̄kponyụn̄ n̄n̄wan̄a enye ifụtesịt mi ke idem ke ndiduọk iyịp,+ man nsịbe owo ye ufene mfep ke enye,
20 idem edieke Noah,+ Daniel+ ye Job+ ẹkpedude ke esịt esie,+ ma uwem mi,’ uyo Jehovah Akakan Ọbọn̄ Andikara edi emi, ‘mmọ ikpanyan̄ake eyeneren m̀mê eyenan̄wan; mmọ ẹkpenyan̄a ukpọn̄ mmọ ke ntak edinen ido mmọ.’”+
21 “Koro ntem ke Jehovah Akakan Ọbọn̄ Andikara ọdọhọ ete, ‘Ntre n̄ko ke edidi ke ini ndidade ndiọi n̄kpọ inan̄ mbiere ikpe+—akan̄kan̄ ye akan̄ ye idiọk unam ikọt ye idiọk udọn̄ọ+—oro ndidọn̄de ẹtiene Jerusalem man nsịbe owo ye ufene mfep ke esịt.+
22 Edi, sese! ẹyeyak otu oro ẹbọhọde, kpa mbon oro ẹdade ẹwọrọ, ẹsụhọ ke enye.+ Sese, nditọiren ye nditọiban mmọ mi! Mmọ ke ẹwọrọ ẹtiene mbufo, mbufo ẹyenyụn̄ ẹkụt usụn̄ mmọ ye mme edinam mmọ.+ Ndien mbufo ẹyekop ndọn̄esịt ẹban̄a afanikọn̄ oro ndidade ntiene Jerusalem, kpa kpukpru n̄kpọ oro ndidade ntiene enye.’”
23 “‘Ndien mmọ ẹyedọn̄ mbufo esịt ke ini mbufo ẹkụtde usụn̄ mmọ ye mme edinam mmọ; ndien mbufo ẹyefiọk ẹte ke ikedịghe ke unana ntak ke ami n̄kanam kpukpru n̄kpọ oro nnamde ye enye,’ uyo Jehovah Akakan Ọbọn̄ Andikara edi emi.”+
