Ezekiel 20;1-49
20 Edikem ke ọyọhọ isua itiaba, ke ọyọhọ ọfiọn̄ ition, ke ọyọhọ usen duop ke ọfiọn̄ oro, irenowo ke otu mbiowo Israel ẹdụk ẹdi ndibụp Jehovah n̄kpọ,+ ndien mmọ ẹdisụhọde ẹtie mi ke iso.+
2 Ekem uyo Jehovah esịm mi, ete:
3 “Eyen owo, tịn̄ ikọ ye mbiowo Israel, nyụn̄ dọhọ mmọ ete, ‘Ntem ke Jehovah Akakan Ọbọn̄ Andikara ọdọhọ ete: “Nte mbufo ẹdi man ẹdibụp mi n̄kpọ?+ ‘Ma uwem mi, ndiyakke mbufo ẹbụp mi n̄kpọ,’+ uyo Jehovah Akakan Ọbọn̄ Andikara edi emi.”’
4 “Nte afo eyekpe ikpe mmọ? Nte afo eyekpe ikpe mmọ, O eyen owo?+ Nam mmọ ẹfiọk mme mbubiam n̄kpọ mme ete ete mmọ.+
5 Afo nyụn̄ dọhọ mmọ ete, ‘Ntem ke Jehovah Akakan Ọbọn̄ Andikara ọdọhọ ete: “Ke usen oro n̄kemekde Israel,+ ami n̄ko mma mmenede ubọk+ mi n̄n̄wọn̄ọ nnọ mfri ufọk Jacob+ nnyụn̄ nnam mmọ ẹdiọn̄ọ mi ke isọn̄ Egypt.+ Ih, mma mmenede ubọk mi n̄n̄wọn̄ọ nnọ mmọ nte, ‘Ami ndi Jehovah Abasi mbufo.’+
6 Ke usen oro, mma mmenede ubọk+ mi n̄n̄wọn̄ọ nnọ mmọ nte ke nyada mmọ n̄wọrọ ke isọn̄ Egypt ndi isọn̄ oro n̄keyepde nnọ mmọ, enye emi ọfiọrọde mmọn̄eba ye aranọkwọk.+ Enye ekedi n̄kpọmbana kpukpru mme idụt.+
7 Ndien ndọhọ mmọ nte, ‘Yak owo mbufo kiet kiet, otop mme mbubiam n̄kpọ oro enyịn esie amade ọduọk,+ ẹkûnyụn̄ ẹda mme mbubiam mbiet Egypt ẹsabade idem mbufo.+ Ami ndi Jehovah Abasi mbufo.’+
8 “‘“Ndien mmọ ẹtọn̄ọ ndisọn̄ ibuot ye ami,+ mmọ inyụn̄ inyịmeke ndikpan̄ utọn̄ nnọ mi. Mmọ kiet kiet inyụn̄ itomoke mme mbubiam n̄kpọ enyịn mmọ iduọn̄ọ, inyụn̄ ikpọn̄ke mme mbubiam mbiet Egypt,+ tutu ami n̄n̄wọn̄ọ ndin̄wan̄a mmọ ifụtesịt mi ke idem, man nda iyatesịt mi nsịm utịt ke idemmọ ke isọn̄ Egypt.+
9 Ndien ami nnam n̄kpọ ke ntak enyịn̄ mi mbak ẹdisabade enye ke enyịn mme idụt emi mmọ ẹdude ke otu mmọ,+ koro mma nnam mmọ ẹdiọn̄ọ mi ke iso mmọ ke ndikada mmọ n̄wọrọ ke isọn̄ Egypt.+
10 Ntre mma nda mmọ n̄wọrọ ke isọn̄ Egypt nnyụn̄ nda mmọ ndi wilderness.+
11 “‘“Ndien ami nnọ mmọ mme ewụhọ+ mi; ami nnyụn̄ nnam mmọ ẹfiọk mme ubiereikpe+ mi, man owo eke enịmde mmọ akpada mmọ odu uwem.+
12 Ami mma nnyụn̄ nnọ mmọ mme sabbath mi n̄ko,+ man akabade edi idiọn̄ọ ke ufọt mi ye mmọ,+ man mmọ ẹfiọk ẹte ke ami ndi Jehovah emi nnamde mmọ ẹsana.
13 “‘“Edi mmọ, ufọk Israel, ẹma ẹsọn̄ ibuot ye ami ke wilderness.+ Mmọ ikasan̄ake ke mme ewụhọ mi,+ ẹma ẹnyụn̄ ẹsịn mme ubiereikpe mi,+ emi edide edieke owo ekpenịmde mmọ, enye n̄ko akpada mmọ odu uwem.+ Ndien mmọ ẹma ẹnen̄ede ẹsabade mme sabbath mi,+ tutu ami n̄n̄wọn̄ọ ndin̄wan̄a mmọ ifụtesịt mi ke idem ke wilderness, man nsobo mmọ mfep.+
14 Edi ami nnam n̄kpọ ke ntak enyịn̄ mi mbak ẹdisabade enye ke enyịn mme idụt, emi n̄kadade mmọ ke iso mmọ n̄wọrọ.+
15 Ndien ami mmenede ubọk mi n̄n̄wọn̄ọ nnọ mmọ ke wilderness,+ nte ke ndidaha mmọ ndụk isọn̄ oro n̄kọnọde mmọ, enye emi ọfiọrọde mmọn̄eba ye aranọkwọk,+ (enye edi n̄kpọmbana kpukpru mme idụt,)+
16 ke ntak oro mmọ ẹkesịnde mme ubiereikpe mi; ndien amaedi mme ewụhọ mi, mmọ ikasan̄ake ke mmọ, mmọ ẹnyụn̄ ẹsabade mme sabbath mi, koro esịt mmọ eketienede mme mbubiam mbiet mmọ.+
17 “‘“Ndien enyịn mi ọtọn̄ọ nditua mmọ mbọm mbak ndisobo mmọ,+ ami nnyụn̄ nsoboke mmọ mfep ke wilderness.
18 Ndien ami ndọhọ nditọ mmọ ke wilderness+ nte, ‘Ẹkûsan̄a ke mme ewụhọ mme ete ete mbufo,+ ẹkûnam mme ubiereikpe mmọ,+ ẹkûnyụn̄ ẹda mme mbubiam mbiet mmọ ẹsabade idem mbufo.+
19 Ami ndi Jehovah Abasi mbufo.+ Ẹsan̄a ke mme ewụhọ mi,+ ẹnịm mme ubiereikpe+ mi ẹnyụn̄ ẹnam mmọ.+
20 Ẹnam mme sabbath mi ẹsana,+ ndien mmọ ẹyetie nte idiọn̄ọ ke ufọt mi ye mbufo, man mbufo ẹfiọk ẹte ke ami ndi Jehovah Abasi mbufo.’+
21 “‘“Ndien nditọ mmọ ẹtọn̄ọ ndisọn̄ ibuot ye ami.+ Mmọ isan̄ake ke mme ewụhọ mi, inyụn̄ inịmke mme ibet mi ke ndinam mmọ, emi edide edieke owo ekpenịmde mmọ, enye akpada mmọ odu uwem.+ Mmọ ẹsabade mme sabbath mi.+ Ntre mma n̄n̄wọn̄ọ ndin̄wan̄a mmọ ifụtesịt mi ke idem, man nnam iyatesịt mi esịm utịt ke idemmọ ke wilderness.+
22 Ndien ami ndụri ubọk+ mi nsio nnyụn̄ nnam n̄kpọ ke ntak enyịn̄ mi, mbak ẹdisabade enye ke enyịn mme idụt, emi n̄kadade mmọ ke iso mmọ n̄wọrọ.+
23 N̄ko, ami mma mmenede ubọk mi n̄n̄wọn̄ọ nnọ mmọ ke wilderness,+ nte ke nyasuan mmọ ndọn̄ ke otu mme idụt nnyụn̄ mbịn mmọ ndọn̄ ke otu mme obio,+
24 ke ntak emi mmọ mîkenịmke mme ubiereikpe+ mi ẹnyụn̄ ẹsịnde mme ewụhọ+ mi, ẹkenyụn̄ ẹsabarede mme sabbath mi,+ enyịn mmọ ẹkenyụn̄ ẹtienede mme mbubiam mbiet mme ete ete mmọ.+
25 Ndien ami nyak mmọ ẹnyene mme ewụhọ oro mîkọfọnke ye mme ubiereikpe oro mmọ mîkekemeke ndida ndu uwem.+
26 Ndien ami nyayak mmọ ẹda mme enọ mmọ ẹsabade idemmọ ke ini mmọ ẹnamde kpukpru nditọ oro ẹsịrerede itie eyen ẹbe ke ikan̄,+ man n̄kposobo mmọ, mmọ ẹkpenyụn̄ ẹfiọk ẹte ke ami ndi Jehovah.”’+
27 “Mmọdo tịn̄ nọ ufọk Israel, O eyen owo, nyụn̄ dọhọ mmọ ete, ‘Ntem ke Jehovah Akakan Ọbọn̄ Andikara ọdọhọ ete:+ “Kpa ntem ke mme ete ete mbufo ẹkesụn̄i mi, ke mmọ nditre ndinam akpanikọ nnọ mi.+
28 Ndien ami nda mmọ ndi isọn̄+ oro n̄kemenerede ubọk mi n̄n̄wọn̄ọ nte ke nyọnọ mmọ.+ Ke ini mmọ ẹkụtde kpukpru edikon̄ obot+ ye kpukpru eto eke ẹnyenede ediwak n̄kọk, mmọ ẹtọn̄ọ ndiwa uwa+ mmọ do ẹnyụn̄ ẹnọ enọ itekesịt, ẹnyụn̄ ẹwa uwa mmọ do man osio edinem utebe,+ ẹnyụn̄ ẹn̄wan̄a edin̄wọn̄ uwa+ mmọ ẹduọk do.
29 Ntre ami ndọhọ mmọ nte, ‘Nso ke edikon̄ ebiet emi mbufo ẹkade ọwọrọ, emi akpanamde ẹkot enye Edikon̄ Ebiet tutu esịm mfịn emi?’”’+
30 “Mmọdo dọhọ ufọk Israel ete, ‘Ntem ke Jehovah Akakan Ọbọn̄ Andikara ọdọhọ ete: “Nte mbufo ẹsabade idem mbufo ke usụn̄ emi mme ete ete mbufo ẹkesabarede idem,+ nte mbufo ẹnyụn̄ ẹtiene mme mbubiam n̄kpọ mmọ man ẹnyene oburobụt ebuana ye mmọ?+
31 Ndien ke ndimen mme enọ mbufo ndi ebe ke ndifọp nditọ mbufo ke ikan̄,*+ nte mbufo ẹsabade idem ẹnọ kpukpru mme mbubiam mbiet mbufo tutu esịm mfịn emi?+ Nte n̄kpayak mbufo ẹbụp mi n̄kpọ, O ufọk Israel?”’+
“‘Ma uwem mi,’ uyo Jehovah Akakan Ọbọn̄ Andikara edi emi, ‘ndiyakke mbufo ẹbụp mi n̄kpọ.+
32 Ndien se idụkde mbufo ekikere*+ ididehedei itịbe,+ koro mbufo ẹdọhọde ẹte: “Ẹyak nnyịn ikabade itie nte mme idụt, nte mme ubon ke isọn̄,+ ke ndinam n̄kpọ nnọ eto ye itiat.”’”+
33 “‘Ma uwem mi,’ uyo Jehovah Akakan Ọbọn̄ Andikara edi emi, ‘nyada ọkpọsọn̄ ubọk ye edinyanade ubọk+ ye ifụtesịt oro n̄n̄wan̄ade nduọk n̄kara mbufo nte edidem.+
34 Ndien nyosio mbufo ke otu mme owo, nnyụn̄ nda ọkpọsọn̄ ubọk ye edinyanade ubọk ye ifụtesịt oro n̄n̄wan̄ade nduọk,+ ntan̄ mbufo ke mme idụt oro ẹkesuande mbufo ẹdọn̄ mbon ọtọkiet.
35 Ndien nyada mbufo ndi ke wilderness mme owo+ nnyụn̄ n̄kpe ikpe ye mbufo do iso ye iso.+
36 “‘Kpa nte n̄kekpede ikpe ye mme ete ete mbufo ke wilderness isọn̄ Egypt,+ kpa ntre ke ndikpe ikpe ye mbufo,’ uyo Jehovah Akakan Ọbọn̄ Andikara edi emi.
37 ‘Ndien nyanam mbufo ẹsan̄a ke idak esan̄+ ẹbe nnyụn̄ nda mbufo ndisịn ke mbọbọ ediomi.+
38 Ndien nyọkpọri mbon oro ẹsọn̄de ibuot ye mbon oro ẹbiatde ibet+ mi mfep ke otu mbufo, koro nyada mmọ n̄wọrọ ke isọn̄ oro mmọ ẹdụn̄de nte isenowo, edi mmọ ididụkke isọn̄ Israel;+ ndien mbufo ẹyefiọk ẹte ke ami ndi Jehovah.’+
39 “Ndien mbufo, O ufọk Israel, ntem ke Jehovah Akakan Ọbọn̄ Andikara ọdọhọ ete, ‘Mbufo owo kiet kiet ẹka ẹkenam n̄kpọ ẹnọ mbubiam mbiet mbufo.+ Ndien ama ekem edieke mbufo mîkpan̄ke utọn̄ inọ mi, do mbufo ididaha aba mme enọ mbufo ye mme mbubiam mbiet mbufo isabade edisana enyịn̄ mi.’+
40 “‘Koro ke edisana obot mi, ke edikon̄ obot Israel,’+ uyo Jehovah Akakan Ọbọn̄ Andikara edi emi, ‘do ke mmọ, ofụri ufọk Israel, ẹdinam n̄kpọ ẹnọ mi, ke isọn̄ emi.+ Do ke ndinem esịt ye mmọ, do ke ndinyụn̄ nyom etịbe mbufo ye enọ akpa mbun̄wụm mbufo ke kpukpru ndisana n̄kpọ mbufo.+
41 Nyenem esịt ye mbufo ke ntak edinem utebe,+ ke ini ndade mbufo n̄wọrọ ke otu mme owo nnyụn̄ ntan̄de mbufo ke mme idụt emi ẹkesuande mbufo ẹdọn̄ mbon ọtọkiet,+ ndien mbufo ẹyenam mi nsana ke enyịn mme idụt.’+
42 “‘Ndien mbufo ẹyefiọk ẹte ke ami ndi Jehovah,+ ke ini ndade mbufo ndụk isọn̄ Israel,+ ndụk isọn̄ oro n̄kemenerede ubọk mi n̄n̄wọn̄ọ nte ke nyọnọ mme ete ete mbufo.
43 Ndien do ke mbufo ẹditi mme usụn̄+ mbufo ye kpukpru n̄kpọ oro mbufo ẹkenamde ẹsabade idem mbufo,+ ndien mbufo ẹyekop bụt ke ntak kpukpru ndiọi n̄kpọ oro mbufo ẹkenamde.+
44 Ndien mbufo ẹyefiọk ẹte ke ami ndi Jehovah+ ke ini nnamde n̄kpọ ye mbufo ke ntak enyịn̄+ mi, nnamke nte ekemde ye ndiọi usụn̄ mbufo nnyụn̄ nnamke nte ekemde ye ndiọi edinam mbufo,+ O ufọk Israel,’ uyo Jehovah Akakan Ọbọn̄ Andikara edi emi.”
45 Ndien uyo Jehovah esịm mi, ete:
46 “Eyen owo, wụk iso+ fo se n̄kan̄ ikpehe edem usụk nyụn̄ tịn̄+ ikọ nọ edem usụk, nyụn̄ tịn̄ ntịn̄nnịm ikọ nọ akai ikọt edem usụk.
47 Afo onyụn̄ enyene ndidọhọ akai edem usụk ete, ‘Kop uyo Jehovah. Ntem ke Jehovah Akakan Ọbọn̄ Andikara ọdọhọ ete: “Sese ami mmọn̄ n̄kịm fi ikan̄,+ enye oyonyụn̄ ata kpukpru eto eke ẹsehede ye kpukpru nsat eto ke esịt fo.+ Edemeikan̄ eke asakde idinịmeke,+ enye oyonyụn̄ ọfọp kpukpru iso,* ọtọn̄ọde ke edem usụk tutu esịm edem edere.+
48 Ndien kpukpru obụkidem ẹyekụt ẹte ke ami, Jehovah, n̄kịm enye ikan̄, tutu enye inịmeke.”’”+
49 Ndien ami ndọhọ nte: “O, Jehovah Akakan Ọbọn̄ Andikara! Mmọ ke ẹdọhọ ẹban̄a mi ẹte, ‘Nte enye itohoke ufiet?’”+
Mme Ikọ Idakisọn̄
^ At. Ed., “ndinam ẹbe ke ikan̄.”
^ At. Ed., “spirit.”
^ M̀mê, “ofụri iso isọn̄.”
