Ezekiel 21;1-32
21 Ndien uyo Jehovah ọtọn̄ọ ntak esịm mi, ete:
2 “Eyen owo, wụk iso fo se Jerusalem nyụn̄ tịn̄+ ikọ ban̄a ndisana ebiet,+ nyụn̄ tịn̄ ntịn̄nnịm ikọ ban̄a isọn̄ Israel.+
3 Nyụn̄ dọhọ isọn̄ Israel ete, ‘Ntem ke Jehovah ọdọhọ ete: “Sese ami mmọn̄ nnam ikọ ye afo,+ nyonyụn̄ nsio akan̄kan̄ mi ke efọk+ esie nsịbe edinen owo ye idiọkowo mfep ke esịt fo.+
4 Mmọdo akan̄kan̄ mi ọyọwọrọ ke efọk esie akan̄wana ye kpukpru obụkidem ọtọn̄ọde ke edem usụk tutu esịm edem edere, man n̄kpesịbe edinen owo ye idiọkowo mfep ke esịt fo.+
5 Ndien kpukpru obụkidem ẹyefiọk ẹte ke ami, Jehovah, nsio akan̄kan̄ mi ke efọk esie.+ Enye iditọn̄ọke aba ntak idụk efọk.”’+
6 “Ndien afo, O eyen owo, seme ye isịn eke enyekde.+ Seme ndotndot eseme ke iso mmọ.+
7 Ndien ama ekem, edieke mmọ ẹdibụpde fi ẹte, ‘Ntak emi afo esemede?’+ afo enyene ndidọhọ ete, ‘Nseme ke ntak etop.’+ Koro enye iditreke ndidi,+ ndien kpukpru esịt ẹyeyemede,+ kpukpru ubọk ẹyenyụn̄ ẹmem ndien kpukpru owo* ẹyefụhọ, kpukpru edọn̄ ẹyenyụn̄ ẹtọi mmọn̄.+ ‘Sese! Enye iditreke ndidi+ idinyụn̄ itreke nditịbe,’ uyo Jehovah Akakan Ọbọn̄ Andikara edi emi.”
8 Ndien uyo Jehovah ọtọn̄ọ ntak esịm mi, ete:
9 “Eyen owo, tịn̄ ntịn̄nnịm ikọ, nyụn̄ dọhọ ete, ‘Ntem ke Jehovah ọdọhọ ete: “Dọhọ, ‘Akan̄kan̄, akan̄kan̄!+ Ẹmeban enye ọsọp,+ ẹnyụn̄ ẹtụk enye esem n̄ko.
10 Ẹmeban enye ọsọp man ẹda ẹwot owo; ẹtụk enye man emịnen̄.’”’”+
“Mîdịghe nte nnyịn ikpenyene ndidara?”+
“‘Nte enye esịn esan̄ ubọn̄+ eyen mi,+ nte enye esịnde kpukpru eto?+
11 “‘Ndien owo ayak enye ọnọ ete ẹtụk esem, man akama enye ke ubọk. Ẹmeban akan̄kan̄ ọsọp, ẹmetụk enye esem, man ẹyak enye ẹsịn owotowo ke ubọk.+
12 “‘O eyen owo, tua nyụn̄ fiori,+ koro enye emedi ndin̄wana ye ikọt mi;+ emedi ndin̄wana ye kpukpru mbọn̄ Israel.+ Mbon oro ẹtopde ẹduọn̄ọ ẹnọ akan̄kan̄ ẹmedi ẹdidu ye ikọt mi.+ Mmọdo mia ifụhi.+
13 Koro ẹmedomo ẹse,+ ndien nso iditịbe edieke enye esịnde esan̄ ubọn̄ n̄ko?+ Esan̄ emi idikaha iso idu,’+ uyo Jehovah Akakan Ọbọn̄ Andikara edi emi.
14 “Ndien afo, O eyen owo—tịn̄ ntịn̄nnịm ikọ, nyụn̄ mia ubọk,+ nyụn̄ kot ‘Akan̄kan̄!’ utịm ikata.+ Enye edi akan̄kan̄ mbon oro ẹwotde. Enye edi akan̄kan̄ eke owotde akwa owo, emi akande mmọ okụk.+
15 Man esịt eyemede,+ man ẹnyụn̄ ẹnam mbon oro ẹkande ke kpukpru mme inuaotop mmọ ẹwak,+ nyada akan̄kan̄ nsịn n̄kpan̄a. O, ẹnam enye man emịnen̄, ẹnyụn̄ ẹtụk enye esem man ẹsịn n̄kpan̄a!+
16 Wụt ke ọmọsọp;+ ka nnasia! Tuak da; ka ufien! Ka ebiet ekededi oro iso fo esede!
17 Ndien ami nyada ekaubọk mi kiet mmia ke ekaubọk mi eken,+ nyonyụn̄ nnam ifụtesịt+ mi odobo.+ Ami, Jehovah, ndọhọ.”
18 Ndien uyo Jehovah esịm mi, ete:
19 “Ndien amaedi afo, O eyen owo, siak usụn̄ iba nọ idemfo man akan̄kan̄ edidem Babylon ebe odụk.+ Mmọ mbiba ẹyeto isọn̄ kiet ẹwọrọ ẹka, ndien ẹyesịbe ubọk oro ẹdade ẹnọ idiọn̄ọ ẹfep;+ ẹdisịbe enye ke n̄wan̄a-usụn̄ oro ẹsan̄ade ẹdụk obio.
20 Afo enyene ndisiak usụn̄ nnọ akan̄kan̄ odụk akan̄wana ye Rabbah+ nditọ Ammon, kiet onyụn̄ akan̄wana ye Judah, ye Jerusalem obio ibibene.+
21 Koro edidem Babylon atuak ada ke n̄wan̄a-usụn̄, ke ibuot usụn̄ iba, man ebre idiọn̄.+ Enye emenyen̄e mme idan̄. Amada teraphim+ obụp n̄kpọ; enye emese esịt unam.
22 Idiọn̄ oro odude enye ke ubọk nnasia aban̄a Jerusalem, man enịm n̄kpọ uwụri ibibene,+ man atat owo inua aban̄a uwotowo, man emenede uyo n̄kpo ekọn̄,+ man enịm n̄kpọ uwụri ibibene ndiwụri mme inuaotop, man ekịbi ibombom akanade, man ọbọp ibibene akanade.+
23 Ndien enye amakabade etie ye mmọ nte nsunsu idiọn̄ ke enyịn mmọ+—mbon oro ẹn̄wọn̄ọde un̄wọn̄ọ ẹnọ mmọ;+ ndien enye anam ẹti ndudue,+ man ẹmụm mmọ.+
24 “Mmọdo ntem ke Jehovah Akakan Ọbọn̄ Andikara ọdọhọ ete, ‘Ke ntak emi mbufo ẹnamde ẹti ndudue mbufo ke emi ẹyararede mme ubiatibet mbufo, man ẹkpekụt mme idiọkn̄kpọ mbufo nte ekemde ye kpukpru mme edinam mbufo, ẹyekam ẹmụm mbufo ke ubọk+ ke ntak emi mbufo ẹnamde ẹti+ mbufo.’
25 “Ndien amaedi afo, O idiọk ọbọn̄+ Israel emi adade unan n̄kpa,+ emi usen fo edide edisịm ke ini akpatre ndudue,+
26 ntem ke Jehovah Akakan Ọbọn̄ Andikara ọdọhọ ete, ‘Yarade mbọbọ ibuot, nyụn̄ yarade anyanya.+ N̄kpọ iditiehe aba nte eketiede.+ Menede se isụhọrede,+ nyụn̄ sụhọde se ikon̄de.+
27 Nyosobo, nyosobo, nyosobo enye.+ Amaedi emi n̄ko, enye idinyeneke baba owo kiet tutu enye emi enyenede unen oro ekemde ye ibet edi,+ ndien nyemen nnọ enye.’+
28 “Ndien afo, O eyen owo, tịn̄ ntịn̄nnịm ikọ, nyụn̄ dọhọ ete, ‘Ntem ke Jehovah Akakan Ọbọn̄ Andikara ọdọhọ aban̄a nditọ Ammon ye esuene eke otode mmọ.’ Afo onyụn̄ enyene ndidọhọ ete, ‘Akan̄kan̄, akan̄kan̄ emi ẹdụride ẹsio man ẹsịn n̄kpan̄a, emi ẹtụkde esem man owot owo, man emịnen̄,+
29 ke ntak emi mmọ ẹkụtde n̄kukụt eke mîdịghe akpanikọ ẹnọ fi, ke ntak emi mmọ ẹbrede idiọn̄ nsu ẹnọ fi,+ man ẹmen fi ẹdori ke itọn̄ mbon oro ẹwotde, kpa mme idiọkowo oro usen mmọ edide edisịm ke ini akpatre ndudue.+
30 Fiak sịn enye ke efọk esie. Nyekpe ikpe ye afo ke ebiet emi ẹkebotde fi, ke isọn̄ emi afo ọkọtọn̄ọde.+
31 Ndien ami nyan̄wan̄a fi ifụtesịt mi ke idem. Nyefri ikan̄ ifụtesịt mi nduọk fi,+ nnyụn̄ nyak fi nsịn ke ubọk mme anana-ibuot owo, kpa mbon oro ẹnyenede usọ ke ndisịn nsobo.+
32 Koro afo ayakabade edi ifia ikan̄.+ Iyịp fo oyodu ke ufọt isọn̄. Owo iditịghi fi, koro ami, Jehovah, ndọhọ.’”+
Mme Ikọ Idakisọn̄
^ At. Ed., “spirit.”
