Ezekiel 22;1-31
22 Ndien uyo Jehovah ọtọn̄ọ ntak esịm mi, ete:
2 “Ndien amaedi afo, O eyen owo, nte afo eyekpe ikpe,+ nte afo eyekpe ikpe ọnọ obio+ emi enyenede ubiomikpe iyịp onyụn̄ anam enye ọfiọk kpukpru mme mbubiam n̄kpọ esie?+
3 Ndien afo enyene ndidọhọ ete, ‘Ntem ke Jehovah Akakan Ọbọn̄ Andikara ọdọhọ ete: “O obio emi ọduọkde iyịp+ ke esịt esie tutu ini esie edi,+ onyụn̄ anamde mme mbubiam mbiet ke esịt esie man enye akabade edehe,+
4 afo emenyene ubiomikpe ke iyịp emi afo ọduọkde,+ omonyụn̄ akabade edehe ke ntak mme mbubiam mbiet fo emi afo anamde.+ Ndien afo amanam mme usen fo ẹsan̄a ẹkpere, afo oyonyụn̄ esịm mme isua fo. Ntak edi oro ndinamde fi edi n̄kpọ esuene ọnọ mme idụt onyụn̄ edi n̄kpọ nsahi ọnọ kpukpru mme obio.+
5 Mme obio oro ẹdude ẹkpere fi ye mbon oro ẹdude ẹyom usụn̄ ẹyesak fi nsahi, O afo emi enyịn̄ fo edehede, ndutịme onyụn̄ ọyọhọde fi ke esịt.+
6 Sese! Mbọn̄+ Israel ẹdu ke esịt fo, owo kiet kiet ayak idem ọnọ ubọk esie man ọduọk iyịp.+
7 Mmọ ẹmesịn ete ye eka ke ndek ke esịt fo.+ Mmọ ẹmenam n̄kpọ ke utụk ye esenowo emi odude ke esịt fo.+ Mmọ ẹmefiomo eyenakpa ye ebeakpa ke ufọt fo.”’”+
8 “‘Afo emesịn ndisana ebiet mi ke ndek, onyụn̄ asabade mme sabbath mi.+
9 Ata mbon edidọk ẹdu fi ke esịt, man ẹduọk iyịp;+ mmọ ẹmenyụn̄ ẹtie ke enyọn̄ ikpọ obot ẹdia udia ke esịt fo.+ Mmọ ẹmenam obukpo ido ke ufọt fo.+
10 Mmọ ẹmefụhọde iferi ete ke esịt fo;+ mmọ ẹmesuene n̄wan emi itieisọn̄ esie anamde enye edehe ke esịt fo.+
11 Owo omonyụn̄ anam mbubiam n̄kpọ ye n̄wan nsan̄a esie,+ owo amanam obukpo ido asabade n̄wan eyen esie;+ owo omonyụn̄ esuene eyeneka esie an̄wan, kpa eyenan̄wan ete esie, ke esịt fo.+
12 Mmọ ẹmebọ ubọkedem ke esịt fo man ẹduọk iyịp.+ Afo ọmọbọ udori,+ ọmọnọ ebuọt ọbọ akwa udori,+ onyụn̄ ada afai otụk+ mme nsan̄a fo adia udori,+ omonyụn̄ efre mi,’+ uyo Jehovah Akakan Ọbọn̄ Andikara edi emi.
13 “‘Ndien, sese! mmamia ubọk+ mban̄a idiọk udori oro afo adiade,+ ye mme edinam uduọkiyịp emi ẹdude fi ke esịt.+
14 Nte esịt fo ọyọyọ+ mîdịghe nte ubọk fo ọyọnọ odudu ke mme usen eke ndinamde n̄kpọ mban̄a fi?+ Ami, Jehovah, ndọhọ, nyonyụn̄ nnam n̄kpọ.+
15 Ndien ami nyasuan fi ndọn̄ ke otu mme idụt nnyụn̄ mbịn fi ndọn̄ ke otu mme idụt,+ nyonyụn̄ nsobo ndek fo mfep ke esịt fo.+
16 Ndien ẹyesabade fi ke esịt fo ke enyịn mme idụt, ndien afo ọyọfiọk ete ke ami ndi Jehovah.’”+
17 Ndien uyo Jehovah ọtọn̄ọ ntak esịm mi, ete:
18 “Eyen owo, mbon ufọk Israel ẹmekabade ẹdi mbukpen̄+ ke enyịn mi. Kpukpru mmọ ẹdi okpoho ye tian ye ukwak ye n̄ket ke esịt akwa ikan̄. Mmọ ẹmekabade ẹdi ediwak mbukpen̄ silver.+
19 “Mmọdo ntem ke Jehovah Akakan Ọbọn̄ Andikara ọdọhọ ete, ‘Ke ntak emi kpukpru mbufo ẹkabarede ẹdi ediwak mbukpen̄,+ sese ami mmọn̄ ntan̄ mbufo mbon ọtọkiet ke esịt Jerusalem.+
20 Nte emi ẹtan̄de silver ye okpoho ye ukwak+ ye n̄ket ye tian ẹdọn̄ ke esịt akwa ikan̄, man ẹbara+ ikan̄ ẹnam mmọ ẹtara,+ kpa ntre ke nditan̄ mmọ mbon ọtọkiet ke iyatesịt mi ye ke ifụtesịt mi, nyonyụn̄ mbara ikan̄ nnyụn̄ nnam mbufo ẹtara.
21 Ndien ami nyatan̄ mbufo mbon ọtọkiet nnyụn̄ mbara mbufo ke ikan̄ ifụtesịt mi,+ ndien mbufo ẹyetara ke esịt esie.+
22 Kpa nte ẹnamde silver atara ke esịt akwa ikan̄, kpasụk ntre ke ẹdinam mbufo ẹtara ke esịt esie; ndien mbufo ẹyefiọk ẹte ke ami, Jehovah, n̄n̄wan̄a ifụtesịt mi mfụk mbufo.’”+
23 Ndien uyo Jehovah ọtọn̄ọ ntak esịm mi, ete:
24 “Eyen owo, dọhọ enye ete, ‘Afo edi isọn̄ oro owo mînamke asana, enye oro owo mînamke edịm edep ke esịt ke usen ifụtesịt.+
25 Mme prọfet esie ẹdụk odu ke esịt esie,+ kpa nte ekpe eke okụnide awaide unam eke enye omụmde.+ Mmọ ẹmeta ukpọn̄.+ Mmọ ẹtan̄ mme ọsọn̄urua n̄kpọ ye mme n̄kpọuto.+ Mmọ ẹmenam mme ebeakpa mmọ ẹwak ke esịt esie.+
26 Mme oku esie ẹmebiat ibet mi,+ mmọ ẹnyụn̄ ẹsabade ndisana ebiet mi.+ Mmọ inamke ukpụhọde+ odu ke ufọt edisana n̄kpọ ye usụhọde n̄kpọ,+ mmọ inyụn̄ inamke ẹfiọk ukpụhọde oro odude ke ufọt n̄kpọ eke edehede ye n̄kpọ eke asanade,+ mmọ ẹnyụn̄ ẹwọn̄ọde enyịn mmọ ẹfep ke mme sabbath mi,+ ẹnyụn̄ ẹsabade mi ke otu mmọ.+
27 Mbọn̄ esie ke ufọt esie ẹbiet mme wolf eke ẹwaide se ẹmụmde ke ndiduọk iyịp,+ ke ndisobo mme ukpọn̄ man ẹdia idiọk udori.+
28 Ndien mme prọfet esie ẹmeyet ndom ẹnọ mmọ,+ ẹkụt n̄kukụt eke mîdịghe akpanikọ+ ẹnyụn̄ ẹbre idiọn̄ nsu ẹnọ mmọ,+ ẹdọhọ ẹte: “Ntem ke Jehovah Akakan Ọbọn̄ Andikara ọdọhọ,” ke ini Jehovah mîdọhọke.
29 Mbio obio ẹmeda n̄kari ẹtụk+ owo ẹnyụn̄ ẹwamade owo n̄kpọ ẹbọ ke n̄wo,+ mmọ ẹnyụn̄ ẹfiomo mbon ukụt ye mme ubuene,+ ẹtụk isenowo inyụn̄ ikpehe unenikpe.’+
30 “‘Ndien ami nyom owo ke otu mmọ emi edidiọn̄de ibibene itiat+ edinyụn̄ adade ke ufan̄+ ibibene ke iso mi ọnọ obio emi, mbak ami ndisobo enye;+ ami nnyụn̄ n̄kwe baba owo kiet.
31 Ntre ami nyan̄wan̄a mmọ ifụtesịt+ mi ke idem. Nyonyụn̄ nsobo mmọ ke ikan̄ ifụtesịt mi.+ Nyada usụn̄ mmọ ndori mmọ ke ibuot,’+ uyo Jehovah Akakan Ọbọn̄ Andikara edi emi.”
