Ezekiel 23;1-49
23 Ndien uyo Jehovah esịm mi,+ ete:
2 “Eyen owo, iban iba ẹkedu, kpa nditọiban emi eka kiet amande.+
3 Ndien mmọ ẹtọn̄ọ ndisan̄a akpara ke Egypt.+ Mmọ ẹma ẹsan̄a akpara ke ini uyen mmọ.+ Do ke ẹkenuak mmọ eba,+ do ke ẹkenyụn̄ ẹfịk mmọ ikpanesịt ke ini emi mmọ mîkọfiọkke irenowo.
4 Ndien enyịn̄ mmọ ẹkedi Oholah, adiaha, ye Oholibah, eyeneka esie an̄wan, ndien mmọ ẹkedi okịm+ ẹnyụn̄ ẹman nditọiren ye nditọiban.+ Ndien amaedi enyịn̄ mmọ, Oholah edi Samaria,+ Oholibah onyụn̄ edi Jerusalem.+
5 “Ndien Oholah ọtọn̄ọ ndisan̄a akpara,+ ke adan̄aemi enye osụk odude ke idak mi, onyụn̄ ọdiọk itọn̄ oyom mmọ eke ẹnen̄erede ẹma enye,+ oyom mbon Assyria,+ emi ẹkedude ẹkpere,
6 mme andikara emi ẹsịnede blu blu ọfọn̄, ye mme udiana andikara—ndiye n̄kparawa, kpukpru mmọ, mbonekọn̄ emi ẹwatde ke mme enan̄-mbakara.
7 Ndien enye anam akpara ye mmọ, kpa ata nti nditọiren Assyria, kpukpru mmọ; ndien enye asabade idem+ ye kpukpru mbon oro enye ọdiọkde itọn̄ oyom—idem ye mme mbubiam mbiet mmọ.
8 Enye ikonyụn̄ ision̄oke idem ikpọn̄ usan̄a akpara oro enye akadade oto Egypt, koro mmọ ẹkedan̄de enye ke ini uyen esie, mmọ ẹnyụn̄ ẹdi mbon oro ẹkefịkde enye ikpanesịt ke ini emi enye mîkọfiọkke erenowo, ẹnyụn̄ ẹka iso ẹn̄wan̄a oburobụt ebuana mmọ ẹfụk enye.+
9 Mmọdo ami nyakde enye nsịn ke ubọk mbon oro ẹnen̄erede ẹma enye,+ nsịn ke ubọk nditọiren Assyria, emi enye ọkọdiọkde itọn̄ oyom.+
10 Edi mmọ ẹkefụhọde enye iferi.+ Mmọ ẹma ẹmụm nditọ esie iren ye nditọ esie iban,+ ẹnyụn̄ ẹwot enye ke akan̄kan̄. Ndien enye akabade edi n̄kpọ esuene ọnọ iban, mmọ ẹnyụn̄ ẹbiere ikpe ẹnọ enye.
11 “Ke ini Oholibah, eyeneka esie, okụtde emi,+ enye etetịm ọdiọk itọn̄ unam idan̄ akan enye, akpara oro enye asan̄ade onyụn̄ ọdiọk akan use eyeneka esie.+
12 Koro enye ọkọdiọkde itọn̄ oyom nditọiren Assyria,+ mme andikara ye mme udiana andikara emi ẹkedude ẹkpere, emi ẹkesịnede ata ndiye ọfọn̄, mbonekọn̄ emi ẹwatde ke mme enan̄-mbakara—ndiye n̄kparawa, kpukpru mmọ.+
13 Ndien ami ndikụt nte, ke ntak emi enye akasabarede idem, mmọ mbiba ẹsan̄a afan̄ kiet.+
14 Ndien enye ọdọdiọn̄ anam mme edinam usan̄a akpara esie ẹwak ke ini enye okụtde irenowo ke mme ndise oro ẹkapde ke ibibene,+ mme mbiet+ mbon Chaldea oro ẹyetde ididuot,+
15 mmọ ẹbọbọ ubọpisịn+ ke isịn, ẹnyụn̄ ẹbọbọ mbọbọ ibuot oro ọtọde etehede, ẹtie nte mbonekọn̄, kpukpru mmọ, ẹbiet nditọiren Babylon, emi ẹmanade ke isọn̄ mbon Chaldea.
16 Ndien enye ọtọn̄ọ ndidiọk itọn̄ nyom mmọ ke ini adade enyịn+ okụt mmọ onyụn̄ ọdọn̄ mme isụn̄utom ẹka ẹbịne mmọ ke Chaldea.+
17 Ndien nditọiren Babylon ẹdụk ẹbịne enye, ẹdi ke bed ima, ẹnyụn̄ ẹdisabade enye ke oburobụt ebuana mmọ;+ ndien mmọ ẹsabade enye, ukpọn̄ esie onyụn̄ ọtọn̄ọ ndiwọn̄ọde n̄kpọn̄ mmọ ke itekesịt.
18 “Ndien enye anam akpara esie ke eferife onyụn̄ ofụhọde iferi esie,+ tutu ukpọn̄ mi ọwọn̄ọde ke itekesịt etre ndisan̄a ye enye, kpa nte ukpọn̄ mi ọkọwọn̄ọrede ke itekesịt etre ndisan̄a ye eyeneka esie an̄wan.+
19 Ndien enye anam mme edinam usan̄a akpara+ esie ẹwak tutu anam ẹti mme usen uyen esie,+ emi enye akasan̄ade akpara ke isọn̄ Egypt.+
20 Ndien enye ọdiọk itọn̄ nte ibanesa emi ẹnyenede mbon oro ndido idem mmọ etiede nte ndido idem nyara ass, emi ndido idan̄ mmọ etiede nte ndido idan̄ nyara enan̄-mbakara.+
21 Ndien afo osụk ekere aban̄a obukpo ido ini uyen fo emi ẹkefịkde fi ikpanesịt ọtọn̄ọde ke Egypt,+ ke ntak eba ini uyen fo.+
22 “Mmọdo, O Oholibah, ntem ke Jehovah Akakan Ọbọn̄ Andikara ọdọhọ ete, ‘Sese ami mmọn̄ ndemede mbon oro ẹnen̄erede ẹma fi man ẹn̄wana ye afo,+ mbon oro ukpọn̄ fo ọwọn̄ọrede ọkpọn̄ ke itekesịt, nyonyụn̄ nda mmọ ndi ẹdin̄wana ye afo ke kpukpru edem,+
23 nditọiren Babylon+ ye kpukpru mbon Chaldea,+ Pekod+ ye Shoa ye Koa, kpukpru nditọiren Assyria emi ẹdude ye mmọ, ndiye n̄kparawa, mme andikara ye mme udiana andikara, kpukpru mmọ, mbonekọn̄ ye mbon oro ẹkotde ẹdi, emi ẹwatde ke mme enan̄-mbakara, kpukpru mmọ.
24 Ndien mmọ ẹyedụk ẹdi en̄wan ye afo, ẹsan̄a ye uyom chariot ekọn̄ ye mme wheel,+ ye esop ediwak owo, ye akwa otuekọn̄ ye ekpri otuekọn̄ ye ndụn. Mmọ ẹyen̄wana ekọn̄ ẹkan fi ẹkụk, ndien ami nyayak ubiereikpe nnọ mmọ, mmọ ẹyenyụn̄ ẹda ubiereikpe mmọ ẹbiere ikpe ẹnọ fi.+
25 Ndien ami nyowụt fi ifiopesịt mi,+ mmọ ẹyenyụn̄ ẹnam n̄kpọ ye afo ke ifụtesịt.+ Mmọ ẹyesịbe fi ibuo ye utọn̄ ẹfep, ndien se isụhọde fi ke esịt ọyọduọ ke akan̄kan̄. Mmọ ẹyetan̄+ nditọiren fo ye nditọiban fo,+ ikan̄ oyonyụn̄ ata se isụhọde fi ke esịt.+
26 Ndien mmọ ẹyesion̄o fi ọfọn̄+ ke idem ẹnyụn̄ ẹtan̄ ndiye n̄kpọmbana+ fo.
27 Ndien ami nyanam obukpo ido fo etre ke esịt fo,+ ye usan̄a akpara fo emi afo akadade oto isọn̄ Egypt;+ ndien afo udumenekede enyịn fo use mmọ, udunyụn̄ utịghi aba Egypt.’
28 “Koro ntem ke Jehovah Akakan Ọbọn̄ Andikara ọdọhọ ete, ‘Sese ami mmọn̄ nyak fi nsịn ke ubọk mbon oro afo asuade, nsịn ke ubọk mbon oro ukpọn̄ fo ọwọn̄ọrede ọkpọn̄ ke itekesịt.+
29 Ndien mmọ ẹyenam n̄kpọ ye afo ke usua ẹnyụn̄ ẹtan̄ kpukpru mfri ọkpọsọn̄ utom fo, ẹnyụn̄ ẹkpọn̄ fi iferi;+ ndien ẹyefụhọde fi iferi unam use fo ye obukpo ido fo ye mme edinam usan̄a akpara fo.+
30 Ẹyenam fi kpukpru n̄kpọ emi koro afo akasan̄ade nte akpara oyom mme idụt,+ ke ntak emi afo akadade mme mbubiam mbiet mmọ asabade idemfo.+
31 Afo amasan̄a ke usụn̄ eyeneka fo an̄wan;+ ndien ami nyayak cup esie nsịn fi ke ubọk.’+
32 “Ntem ke Jehovah Akakan Ọbọn̄ Andikara ọdọhọ ete, ‘Afo ọyọn̄wọn̄ cup eyeneka fo an̄wan, cup emi otụn̄ọde onyụn̄ an̄wan̄ade inua.+ Afo ayakabade edi n̄kpọ nsahi ye se ẹsede ke ndek, koro cup oro ọdọn̄ọde ekese.+
33 Afo ọyọn̄wọn̄ mmịn ye mfụhọ oyụhọ, ọyọn̄wọn̄ cup n̄kpaidem ye nsobo oyụhọ, kpa cup eyeneka fo an̄wan, Samaria.
34 Ndien afo ọyọn̄wọn̄ enye onyụn̄ ọn̄wọn̄ enye okụre,+ afo oyonyụn̄ ata mbai usiọn̄ esie, onyụn̄ esịbe eba fo efep.+ “Koro ami ndọhọ,” uyo Jehovah Akakan Ọbọn̄ Andikara edi emi.’
35 “Mmọdo ntem ke Jehovah Akakan Ọbọn̄ Andikara ọdọhọ ete, ‘Koro afo efrede mi+ onyụn̄ osiode mi ọduọk ke edem fo,+ do afo oyobiom obukpo ido fo ye mme edinam usan̄a akpara fo.’”
36 Ndien Jehovah ọdọhọ mi ete: “Eyen owo, nte afo eyekpe ikpe+ Oholah ye Oholibah+ onyụn̄ asian mmọ mme mbubiam n̄kpọ mmọ?+
37 Koro mmọ ẹmesịn efịbe,+ iyịp omonyụn̄ odu mmọ ke ubọk,+ mmọ ẹmenyụn̄ ẹsịn efịbe ye mbubiam mbiet mmọ.+ Ndien, ke ẹsiode oro ẹfep, mmọ ẹmefọp* nditọiren oro mmọ ẹkemande ẹnọ mi ẹnọ mmọ nte udia.+
38 Akan oro, se mmọ ẹnamde mi edi emi: Mmọ ẹmesabade+ edisana ebiet+ mi ke usen oro, ẹmenyụn̄ ẹsabade mme sabbath mi.+
39 Ndien ke ini mmọ ẹkewotde nditọiren mmọ ẹnọ mme mbubiam mbiet mmọ,+ mmọ ẹma ẹdụk ẹdi edisana ebiet mi ke usen oro man ẹdisabade enye,+ ndien, sese! oro edi se mmọ ẹnamde ke esịtufọk mi.+
40 Ndien n̄ko, ke ini mmọ ẹkedọn̄de utom ẹnọ mbon oro ẹtode anyan ebiet ẹdi, emi ẹkedọn̄de isụn̄utom+ aka ebịne, sese! mmọ ẹma ẹdi,+ kpa mbon emi ẹkesịnde fi eyet idemfo,+ ọdọn̄ n̄kpọ ke enyịn+ onyụn̄ ada n̄kpọmbana abana idem.+
41 Ndien afo osụhọde etie ke n̄kpana ubọn̄,+ okpokoro emi ẹbride onyụn̄ odu ke iso esie,+ afo onyụn̄ odori incense+ mi ye aran mi ke enyọn̄ esie.+
42 Ndien uyom otuowo emi ẹdude ke ifụre odu ke esịt esie,+ ẹnyụn̄ ẹda irenowo emi ẹtode ke otu ubonowo ọkọrọ ye mme akpammịn+ emi ẹtode ke wilderness ẹdi, ndien mmọ ẹda n̄kpọubọk ẹsịn iban ke ubọk ẹnyụn̄ ẹyara mmọ ndiye anyanya ke ibuot.+
43 “Ekem ami ndọhọ mban̄a n̄wan oro akakpade mba ke ntak usịn efịbe nte,+ ‘Ke emi, enye oyosụk asan̄a akpara esie.’+
44 Ndien mmọ ẹdụk ẹbịne enye, nte emi owo odụkde ebịne n̄wan akpara; ke ukem usụn̄ oro ke mmọ ẹkedụk ẹbịne Oholah ye Oholibah nte iban obukpo ido.+
45 Edi ndinen+ owo ẹdida ubiereikpe oro ẹnịmde ẹnọ iban n̄kaowo+ ye iban emi ẹduọkde iyịp ẹbiere ikpe ẹnọ enye;+ koro mmọ ẹdide iban n̄kaowo, iyịp omonyụn̄ odu mmọ ke ubọk.+
46 “Koro ntem ke Jehovah Akakan Ọbọn̄ Andikara ọdọhọ ete, ‘Odu esop emi ẹdidade ẹdọk ẹdi ẹdin̄wana ye mmọ+ ẹyenyụn̄ ẹnam mmọ ẹdi n̄kpọndịk ye n̄kpọ mbụme.+
47 Ndien esop emi ẹyetọn̄ọ mmọ ke itiat,+ ẹyenyụn̄ ẹda akan̄kan̄ mmọ ẹkpok mmọ ẹduọn̄ọ. Mmọ ẹyewot nditọiren mmọ ye nditọiban mmọ,+ ẹyenyụn̄ ẹfọp mme ufọk mmọ ke ikan̄.+
48 Ndien nyanam obukpo ido+ etre ke isọn̄,+ kpukpru iban ẹyenyụn̄ ẹyak ẹnen̄ede mmọ, mbak mmọ ẹdinam nte ekemde ye obukpo ido mbufo.+
49 Ndien mmọ ẹyeda obukpo ido mbufo ẹdori mbufo ke idem,+ mbufo ẹyenyụn̄ ẹbiom mme idiọkn̄kpọ mbubiam mbiet mbufo; ndien mbufo ẹyefiọk ẹte ke ami ndi Jehovah Akakan Ọbọn̄ Andikara.’”+
Mme Ikọ Idakisọn̄
^ At. Ed., “ẹnam ẹbe ke ikan̄.”
