Ezekiel 27;1-36
27 Ndien uyo Jehovah ọtọn̄ọ ntak esịm mi, ete:
2 “Amaedi afo, O eyen owo, kwọ ikwọ mfụhọ+ ban̄a Tyre,
3 nyụn̄ dọhọ Tyre ete,
“‘O afo emi odụn̄de ke mme inuaotop inyan̄,+ n̄wan emi anyamde urua ye mbon ediwak isuo,+ ntem ke Jehovah Akakan Ọbọn̄ Andikara ọdọhọ ete: “O Tyre, afo ọdọhọ ete, ‘Ami mmeye mma.’+
4 Mme obio fo ẹdu ke esịt inyan̄.+ Mbon oro ẹbọpde fi ẹmenam fi eye ama.+
5 Mmọ ẹda mme eto juniper ke Senir+ ẹnam kpukpru mme obukpọk fo. Ẹda cedar ke Lebanon+ ẹnam eto afara ẹwụk ke esịt fo.
6 Mmọ ẹda ikpọ eto Bashan ẹnam mme uden̄ fo. Ẹnam iso ubom fo ke nnụkenen emi ẹkọn̄de ẹsịn ke eto cypress emi ẹtode mme isuo Kittim.+
7 Akamba ọfọn̄ fo edi linen emi enyenede nsio nsio uduot emi ẹdade ẹto Egypt,+ man ẹda enye ẹnam afara fo. Ọkọm fo edi blu blu ndidi+ ye idet erọn̄ emi enyenede uduot mmọn̄ibọn̄+ emi ẹdade ẹto mme isuo Elishah.+
8 “‘“Mme andidụn̄ Sidon+ ye Arvad+ ẹkedi mbon uwat fo. O Tyre, mbonusọ+ fo ẹdu fi ke esịt; mmọ ẹkedi mme awat nsụn̄ikan̄+ fo.
9 N̄kani iren Gebal+ ye mbonusọ esie ẹma ẹdu ke esịt fo nte mme andisịri mme ndudu fo.+ Kpukpru nsụn̄ikan̄ inyan̄ ye mme awat-inyan̄ mmọ ẹma ẹdu ke esịt fo, man ẹkpụhọ mme n̄kpọurua.
10 Mbon Persia+ ye mbon Ludim+ ye mbon Put+ ẹma ẹdu ke udịmekọn̄ fo, mmọ ẹkedi mbonekọn̄ fo. Mmọ ẹma ẹkọn̄ otuekọn̄ ye ndụn ke esịt fo.+ Mmọ ẹdi mbon oro ẹkenamde fi eye.
11 Nditọ Arvad,+ ọkọrọ ye udịmekọn̄ fo, ẹma ẹdu ke mme ibibene fo ẹkan ẹkụk, mbon uko ẹdi mbon emi ẹkedude ke mme tọwa fo. Mmọ ẹma ẹkọn̄ mme ekara otuekọn̄ mmọ ke mme ibibene fo ẹkan ẹkụk.+ Mmọ ẹma ẹnam fi eye ama.
12 “‘“Tarshish+ ekedi owourua fo ke ntak uwak kpukpru orụk ọsọn̄urua inyene.+ Koro ẹma ẹnọ mme n̄kpọ oro afo ọkọkọde obon ẹbọ silver, ukwak, tian ye n̄ket esie.+
13 Javan,+ Tubal+ ye Meshech+ ẹkedi mme anyamurua fo. Ẹma ẹda mme n̄kpọurua fo ẹkpụhọ ẹbọ mme owo*+ ye mme n̄kpọ okpoho.
14 Ẹma ẹnọ mme n̄kpọ oro afo ọkọkọde obon ẹbọ mme enan̄-mbakara ye mme enan̄-mbakara ekọn̄ ye mme mule emi ẹketode ufọk Togarmah.+
15 Nditọ Dedan+ ẹkedi mme anyamurua fo; ediwak isuo ẹkedi mbonurua oro ẹnamde utom ẹnọ fi; mmọ ẹmeda nnụkenen+ ye obubịt eto ẹsọk fi nte enọ.
16 Edom ekedi owourua fo ke ntak uwak utom fo. Ẹma ẹnọ mme n̄kpọ oro afo ọkọkọde obon ẹkpụhọ ẹbọ turquoise,+ idet erọn̄ emi enyenede uduot mmọn̄ibọn̄ ye ọfọn̄ eke enyenede nsio nsio uduot ye eti ọfọn̄ ye mme eme ye mme ruby.
17 “‘“Judah ye idụt Israel ẹkedi mme anyamurua fo. Ẹma ẹnọ+ mme n̄kpọurua fo ẹbọ wheat+ Minnith+ ye san̄asan̄a n̄kpọudia ye aranọkwọk+ ye aran ye balsam.+
18 “‘“Damascus+ ekedi owourua fo ke uwak utom fo, ke ntak kpukpru ọsọn̄urua inyene fo emi ẹwakde, ọkọrọ ye wine+ Helbon ye nsan̄nsan̄ idet erọn̄.
19 Vedan ye Javan emi ẹtode Uzal ẹma ẹnọ fi n̄kpọ ẹbọ se ọkọkọde obon. Ẹnọ ukwak eke ẹdomde, cassia ye cane+—koro mmọ ẹkedi mme n̄kpọurua fo.
20 Dedan+ ekedi anyamurua fo emi anyamde ọfọn̄ uwat eke ẹdọkde-dọk.
21 Mbon Arab+ ye kpukpru mbọn̄ Kedar+ ẹkedi mbonurua emi ẹnamde utom ẹnọ fi. Mmọ ẹkedi mbonurua fo emi ẹnyamde nyara nditọerọn̄ ye mme okukịm erọn̄ ye mme okpo ebot.+
22 Mme anyamurua oro ẹtode Sheba+ ye Raamah+ ẹkedi mme anyamurua fo; koro ẹma ẹnọ+ mme n̄kpọ oro afo ọkọkọde obon ẹbọ kpukpru orụk ata nti ufuọn̄n̄kpọ ye kpukpru orụk ọsọn̄urua itiat ye gold.
23 Haran+ ye Canneh ye Eden,+ mme anyamurua oro ẹtode Sheba,+ Asshur+ ye Chilmad ẹkedi mme anyamurua fo.
24 Mmọ ẹkedi mme anyamurua fo emi ẹnyamde ata ndiye ọfọn̄idem, blu blu ọfọn̄ emi ẹwan̄de-wan̄ ye ọfọn̄ emi enyenede nsio nsio uduot, ẹnyụn̄ ẹnyamde ubrin̄kpọ isọn̄ufọk emi enyenede uduot iba ẹnyụn̄ ẹnyam mme urụk emi ẹwan̄de-wan̄ ẹnyụn̄ ẹnamde ọsọn̄ idem, ke an̄waurua fo.
25 “‘“Mme nsụn̄ikan̄ Tarshish+ ẹkedi mme n̄kpọ mbiomo eke ẹbiomde mme n̄kpọurua fo, tutu afo ọyọhọ onyụn̄ akabade enyene ubọn̄ etieti ke esịt akpa inyan̄.+
26 “‘“Mmọ eke ẹwatde fi ẹmeda fi ẹdi akamba mmọn̄.+ Ofụm edem usiahautịn omobụn̄ fi ke esịt akpa inyan̄.+
27 Ọsọn̄urua inyene fo ye mme n̄kpọ oro afo ọkọkọde obon,+ mme n̄kpọurua fo,+ mme awat-inyan̄ fo ye mme awat nsụn̄ikan̄+ fo, ye mme andisịri ndudu+ fo ye mbon eke ẹkpụhọde n̄kpọurua fo ye kpukpru mbonekọn̄+ fo, emi ẹdude ke esịt fo ye ke ofụri esop fo, emi ẹdude ke ufọt fo,—mmọ ẹyeduọn̄ọ ke esịt akpa inyan̄ ke usen iduọ fo.+
28 “‘“Obio emi owo mîsịnke ibibene eyenyek ke ini ẹkopde uyom eseme mme awat nsụn̄ikan̄ fo.+
29 Ndien kpukpru mbon oro ẹkamade uden̄, mme awat-inyan̄, kpukpru mme awat nsụn̄ikan̄ ke inyan̄, ẹyeto ke nsụn̄ikan̄ mmọ ẹsụhọde; mmọ ẹyeda ke isọn̄.+
30 Ndien mmọ ẹyenam ẹkop uyo mmọ ẹban̄a fi, ẹyenyụn̄ ẹtua idiọk idiọk.+ Ndien mmọ ẹyeduọk ntan ke ibuot mmọ.+ Mmọ ẹyewere ke ntọn̄.+
31 Ndien mmọ ẹyenam idemmọ ibọ ẹnyụn̄ ẹkwọhọ ibọ ẹban̄a fi,+ ẹsịne ọfọn̄ ntuan̄a+ ẹnyụn̄ ẹtua ẹban̄a fi ye mfụhọ ukpọn̄,+ ye ndotndot eseme.
32 Ndien ke eseme mmọ, mmọ ẹyesio ikwọ mfụhọ ẹban̄a fi ẹnyụn̄ ẹkwọ ẹban̄a fi ẹte,+
“‘“‘Anie ebiet Tyre,+ anie ebiet enye emi ẹnamde odobo ke ufọt inyan̄?+
33 Ke ini mme n̄kpọ oro afo ọkọkọde obon+ ẹketode ke akpa inyan̄ ẹwọrọ,+ afo ama anam ediwak owo ẹyụhọ.+ Afo ama anam ndidem isọn̄ ẹforo ke uwak ọsọn̄urua inyene fo ye ke mme n̄kpọurua fo.+
34 Ke emi akpa inyan̄ omobụn̄ fi ke udem.+ Amaedi mme n̄kpọurua fo ye ofụri esop fo, mmọ ẹmeduọn̄ọ ke ufọt fo.+
35 Kpukpru mme andidụn̄ ke mme isuo+—mmọ ẹyese fi ke n̄kpaidem, ndien ọkpọsọn̄ ndịk ayanam ndidem mmọ ẹnyek idem.+ Mme iso ẹyekpai.+
36 Amaedi mbonurua emi ẹdude ke otu mme owo, mmọ ẹyefri inụk ẹban̄a fi.+ Afo ayakabade edi mbabuat n̄kpọndịk, afo udunyụn̄ udụhe aba ke nsinsi.’”’”+
Mme Ikọ Idakisọn̄
^ At. Ed., “ukpọn̄ ubonowo.”
