Ezekiel 3;1-27
3 Ndien enye ọdọhọ mi ete: “Eyen owo, ta se afo okụtde. Ta ikpan̄wed+ emi, nyụn̄ ka ketịn̄ ikọ nọ ufọk Israel.”
2 Ntre ami ntat inua mi, ndien sụn̄sụn̄ enye anam mi nta ikpan̄wed+ emi.
3 Ndien enye ọdọhọ mi ete: “Eyen owo, ta enye sịn ke idịbi fo, man ikpan̄wed emi ami nnọde fi mi ọyọhọ fi nsia.” Ndien ami nta enye, enye onyụn̄ enịn̄e mi ke inua nte aranọkwọk.+
4 Ndien enye ọdọhọ mi ete: “Eyen owo, ka kodụk ke otu ufọk+ Israel, nyụn̄ tịn̄ mme ikọ mi nọ mmọ.
5 Koro mîdịghe mbon emi mîfiọkke usem+ m̀mê emi ẹdobide edeme+ ke ndọn̄ fi aka ebịne—afo aka ebịne ufọk Israel,
6 idịghe idụt emi ẹwakde emi mîfiọkke usem m̀mê emi ẹdobide edeme, emi usem mmọ mîn̄wan̄ake fi.+ Edieke n̄kpọdọn̄de fi aka ebịne mmọ, mmọ ẹkpekpan̄ utọn̄ ẹnọ fi.+
7 Edi ufọk Israel idinyịmeke ndikpan̄ utọn̄ nnọ fi, koro mmọ mîyomke ndikpan̄ utọn̄ nnọ mi;+ koro kpukpru mbon ufọk Israel ẹsọn̄de ibuot ẹnyụn̄ ẹsọn̄de esịt.+
8 Sese! Mmanam iso fo ọsọn̄ ukem nte iso+ mmọ nnyụn̄ nnam ọkpọiso fo ọsọn̄ ukem nte ọkpọiso mmọ.+
9 Mmanam ọkpọiso fo ọsọn̄ nte daimọn, ọsọn̄ akan itiat.+ Kûfehe mmọ,+ kûnyụn̄ uyak iso mmọ anam fi edịghe,+ koro mmọ ẹdide ufọk nsọn̄ibuot.”+
10 Ndien enye ọdọhọ mi ete: “Eyen owo, mụm kpukpru ikọ mi emi nditịn̄de nnọ fi sịn ke esịt+ fo nyụn̄ kop mmọ ke utọn̄ fo.
11 Ndien ka kodụk ke otu mbon ntan̄mfep,+ ke otu nditọ orụk fo, ndien tịn̄ nyụn̄ dọhọ mmọ ete, ‘Ntem ke Jehovah Akakan Ọbọn̄ Andikara ọdọhọ,’ edide mmọ ẹkop m̀mê ikopke.”+
12 Ndien spirit emenede mi,+ ami nnyụn̄ ntọn̄ọ ndikop akwa uyom ke edem mi, ete:+ “Yak ẹtoro ubọn̄ Jehovah ke ebietidụn̄ esie.”+
13 Ndien n̄kop uyom mba mme odu-uwem edibotn̄kpọ emi kiet otụkde eken,+ ye uyom wheel emi odude mmọ ke n̄kan̄,+ ye uyom akwa oyobio emi abarade.
14 Ndien spirit emen+ mi onyụn̄ ada mi asan̄a, ndien ami ntiene enye mfụhọ mfụhọ, ndien ubọk Jehovah odoro mi ke idem ọkpọsọn̄ ọkpọsọn̄.+
15 Ndien ami ndụk ke otu mbon ntan̄mfep ke Tel-abib, emi ẹdụn̄de+ ke mben Akpa Chebar,+ nnyụn̄ ndụn̄ ke ebiet emi mmọ ẹdụn̄de; ndien ami ndụn̄ do ke otu mmọ usen itiaba, idem onyụn̄ akpa mi.+
16 Ndien edikem ke utịt usen itiaba oro, uyo Jehovah esịm mi ete:
17 “Eyen owo, mmenịm fi ke owo ukpeme nnọ ufọk Israel,+ afo nyụn̄ kop ikọ eke otode mi inua nyụn̄ dụri mmọ utọn̄ nọ mi.+
18 Ke ini ndọhọde idiọkowo nte, ‘Afo udûtreke ndikpa,’+ ndien afo mûdụrike enye utọn̄ mûnyụn̄ usianke enye man odụri idiọkowo oro utọn̄ aban̄a idiọk usụn̄ esie man enịm enye uwem,+ sia enye ọdiọkde, enye ayakpa ke ndudue esie,+ edi nyobụp iyịp esie ke ubọk fo.+
19 Edi edieke afo odụride idiọkowo+ utọn̄ ndien enye iwọn̄ọkede ikpọn̄ idiọkido esie ye idiọk usụn̄ esie, enye ayakpa ke ndudue esie;+ edi amaedi afo, afo ayanyan̄a ukpọn̄ fo.+
20 Ndien ke ini edinen owo ọwọn̄ọrede ọkpọn̄ edinen ido+ esie onyụn̄ anamde se ikwan̄ade ndien ami nnịm enye n̄kpọ iduọ ke iso,+ enye ayakpa koro afo mûkudụrike enye utọn̄. Enye ayakpa ke idiọkn̄kpọ esie,+ ndinyụn̄ ntịghi ndinen edinam esie emi enye akanamde,+ edi nyobụp iyịp esie ke ubọk fo.+
21 Ndien edieke afo odụride edinen owo utọn̄ ete edinen owo oro okûnam idiọkn̄kpọ,+ ndien enye inyụn̄ inamke idiọkn̄kpọ, enye iditreke ndidu uwem koro ẹma ẹdụri enye utọn̄,+ ndien afo ayanyan̄a ukpọn̄ fo.”+
22 Ndien ubọk Jehovah odoro mi ke idem do, enye onyụn̄ ọdọhọ mi ete: “Daha ke enyọn̄ wọrọ ka unaisọn̄ itịghede,+ ndien nyetịn̄ ikọ nnọ fi do.”
23 Ntre ami ndaha ke enyọn̄ n̄wọrọ n̄ka unaisọn̄ itịghede, ndien, sese! ubọn̄ Jehovah ke adada do,+ nte ubọn̄ oro n̄kokụtde ke mben Akpa Chebar,+ ndien ami nduọ n̄kịbi iso ke isọn̄.+
24 Ekem spirit odụk mi idem+ onyụn̄ anam mi ndaha nda ke ukot mi,+ enye onyụn̄ ọtọn̄ọ nditịn̄ ikọ nnọ mi onyụn̄ ọdọhọ mi ete:
“Di, beri usụn̄ baha idem ke ufọk fo.
25 Ndien afo, O eyen owo, sese! mmọ ẹyeda urụk ẹbọp fi ndien afo udukemeke ndiwọrọ n̄kodụk ke otu mmọ.+
26 Ndien nyanam edeme fo adiana ke enyọn̄ esịt inua fo,+ ndien afo ayakabade imụm,+ udunyụn̄ udịghe owo emi ọnọde mmọ nsuannọ,+ koro mmọ ẹdide ufọk nsọn̄ibuot.+
27 Ndien ke ini ntịn̄de ikọ ye afo, nyatat fi inua, ndien afo ọyọdọhọ mmọ ete,+ ‘Ntem ke Jehovah Akakan Ọbọn̄ Andikara ọdọhọ.’ Yak owo emi okopde, okop,+ nyụn̄ yak owo eke mîkopke, okûkop, koro mmọ ẹdide ufọk nsọn̄ibuot.+
