Ezekiel 31;1-18
31 Ndien edikem ke ọyọhọ isua duopekiet, ke ọyọhọ ọfiọn̄ ita, ke akpa usen ke ọfiọn̄ oro, uyo Jehovah esịm mi, ete:
2 “Eyen owo, dọhọ Pharaoh edidem Egypt ye otuowo esie ete,+
“‘Afo ebiet anie ke ubom fo?
3 Sese! Owo Assyria, cedar ke Lebanon,+ emi eyede n̄kọk,+ onyụn̄ enyenede ediwak ikọn̄ emi ẹnọde mfụt, onyụn̄ okon̄de ke idaha,+ tutu etịn̄e esie esịm obubịt enyọn̄.+
4 Mmọn̄ akanam enye okpon;+ mmọn̄ udem akanam enye ọkọri ọniọn̄. Mme idịm esie ẹma ẹsan̄a ẹkan̄ade ebiet emi enye ọtọde n̄kpọ; ndien enye anam mme udiọn̄ mmọn̄ esie ẹwet ẹsịm kpukpru eto in̄wan̄.
5 Oro edi ntak emi enye ọkọride okon̄ ke idaha akan kpukpru mme eto in̄wan̄ eken.+
“‘Ndien mme n̄kọk esie ẹwak, n̄kpri n̄kọk esie ẹnyụn̄ ẹniọn̄ ke ntak emi ediwak mmọn̄ odude ke mme usụn̄ mmọn̄ esie.+
6 Kpukpru mme edibotn̄kpọ emi ẹfede ke enyọn̄ ẹbọp efọk mmọ ke mme n̄kọk esie,+ ndien kpukpru unam ikọt ẹman nditọ ke idak n̄kpri n̄kọk esie,+ ndien mme idụt oro ẹwakde owo ẹyedụn̄ ke mfụt esie.
7 Ndien enye eye ke ubom esie,+ ke uniọn̄ n̄kọk esie, koro enye ọkọdọn̄de orụn̄ esie ke ediwak mmọn̄.
8 Mme cedar eken ikemenke udomo ye enye ke in̄wan̄esa Abasi.+ Amaedi mme eto juniper, n̄kọk mmọ ikebietke mme n̄kọk esie. N̄kpri n̄kọk eto plane ikebietke esie. Idụhe baba eto kiet ke in̄wan̄esa Abasi emi ekebietde enye ke uyai.+
9 Mma nnam enye eye ke uwak ikọn̄ esie,+ ndien kpukpru mme eto eken ke Eden oro ẹkedude ke in̄wan̄esa ata Abasi ẹma ẹfịbe enye ufụp.’+
10 “Mmọdo ntem ke Jehovah Akakan Ọbọn̄ Andikara ọdọhọ ete, ‘Ke ntak emi afo okokon̄de ke idaha, tutu enye anam etịn̄e esie esịm obubịt enyọn̄+ ndien esịt esie emenede ke enyọn̄ ke ntak uniọn̄ esie,+
11 ami nyayak enye nsịn okopodudu andikara mme idụt ke ubọk.+ Enye iditreke ndinam n̄kpọ mbiọn̄ọ enye. Nyebịn enye mfep nte ekemde ye idiọkido esie.+
12 Ndien isenowo, kpa mbon ufịk mme idụt, ẹyekpi enye ẹduọk, ndien mme owo ẹyedaha ẹkpọn̄ enye ke enyọn̄ ikpọ obot; ndien mme ikọn̄ esie ẹyeduọn̄ọ ke kpukpru mme itịghede, ẹyenyụn̄ ẹbụn̄ n̄kpri n̄kọk esie ke kpukpru mme isọn̄ mmọn̄ ke isọn̄.+ Ndien kpukpru owo ke isọn̄ ẹyewọn̄ọ ke mfụt esie ẹsụhọde ẹdi ẹnyụn̄ ẹdaha ẹkpọn̄ enye.+
13 Kpukpru mme edibotn̄kpọ emi ẹfede ke enyọn̄ ẹyedụn̄ ke ekpat esie oro ọduọde, ndien kpukpru unam ikọt ẹyedi ẹdidu ke n̄kpri n̄kọk esie;+
14 mbak baba eto kiet emi ẹduọkde mmọn̄ edikeme ndikon̄ ke idaha, m̀mê ndinam mme etịn̄e mmọ ẹkam ẹsịm obubịt enyọn̄, mbak baba eto kiet emi ọn̄wọn̄de mmọn̄ edinyụn̄ ekeme ndidaha nda ndomo idem ye mmọ ke uniọn̄ mmọ, koro ẹyeyak kpukpru mmọ ẹnọ n̄kpa,+ ẹyak ẹnọ isọn̄ emi odude ke idak,+ ke otu nditọ owo, ẹyak ẹnọ mbon oro ẹsụhọrede ke obube.’
15 “Ntem ke Jehovah Akakan Ọbọn̄ Andikara ọdọhọ ete, ‘Ami nyanam mfụhọ odu ke usen emi enye edisụhọrede ke Udi.*+ Nyofụk udem ke ntak esie, man n̄kpomụm mme idịm esie n̄kama n̄kponyụn̄ mbiọn̄ọ ediwak mmọn̄; ndien nyanam Lebanon ekịm ke ntak esie, nyonyụn̄ nnam kpukpru mme eto ikọt ẹyemede ke ntak esie.
16 Nyanam mme idụt ẹnyek ke uyom iduọ esie, ke ini nnamde enye osụhọde ke Udi* ye mbon oro ẹsụhọrede ke obube,+ ndien ke isọn̄ emi odude ke idak, kpukpru eto Eden,+ ata nti ye mfọnn̄kan eto Lebanon, kpukpru mbon oro ẹn̄wọn̄de mmọn̄, ẹyekop ndọn̄esịt.+
17 Mmọ n̄ko ẹmesụhọde ye enye ke Udi,*+ ẹbịne mbon oro ẹkewotde ke akan̄kan̄, ye mbon oro ẹdụn̄de ke mfụt esie ke otu mme idụt nte mfri esie.’+
18 “‘Ntem afo ebiet anie ke otu mme eto Eden+ ke ubọn̄+ ye ke ubom? Edi ẹyenam fi ye mme eto Eden ẹsụhọde ke isọn̄ emi odude ke idak.+ Afo oyosụhọde ana ye mbon oro ẹkewotde ke akan̄kan̄, ke otu mbon oro mînaha mbobi. Emi edi Pharaoh ye ofụri otuowo esie,’ uyo Jehovah Akakan Ọbọn̄ Andikara edi emi.”
