Ezekiel 32;1-32
32 Ndien edikem ke ọyọhọ isua duopeba, ke ọyọhọ ọfiọn̄ duopeba, ke akpa usen ke ọfiọn̄ oro, uyo Jehovah ọtọn̄ọ ntak esịm mi, ete:
2 “Eyen owo, sio ikwọ mfụhọ kwọ ban̄a Pharaoh edidem Egypt, nyụn̄ dọhọ enye ete, ‘Ẹmesobo fi nte abak ayara ekpe mme idụt.+
“‘Ndien afo etie nte akamba unam mmọn̄ ke mme inyan̄,+ afo onyụn̄ obụmede ọwọrọ ke mme akpa fo onyụn̄ ada ikpat fo obiohode mmọn̄ onyụn̄ anam mme akpa mmọ ẹdehe.’
3 “Ntem ke Jehovah Akakan Ọbọn̄ Andikara ọdọhọ ete, ‘Ami n̄ko nyada esop ediwak owo ntat iyịre+ mi mfụk fi, ndien mmọ ẹyeda fi ẹdi ke iyịre+ mi.
4 Ndien ami nyadaha n̄kpọn̄ fi ke obot. Nyonyụn̄ nsio fi nduọk ke iso isọn̄.+ Ndien ami nyanam kpukpru mme edibotn̄kpọ emi ẹfede ke enyọn̄ ẹdidụn̄ fi ke idem, ami nyonyụn̄ nda fi nyụhọ mme unam ikọt ofụri isọn̄.+
5 Ndien ami nyenịm obụk fo ke ikpọ obot nnyụn̄ nda mbio eke otode fi nyọhọ mme itịghede.+
6 Ami nyonyụn̄ nnam isọn̄ ọn̄wọn̄ se iwọrọde fi ke idem, ke iyịp+ fo, ke mme obot; nyonyụn̄ nda se itode fi nyọhọ mme isọn̄ mmọn̄.’
7 “‘Ndien ke ini ẹnịmede fi, ami nyofụk ikpaenyọn̄ nnyụn̄ nnam mme ntantaọfiọn̄ mmọ ẹkịm. Nyada obubịt enyọn̄ mfụk utịn, ndien ọfiọn̄ idiyakke un̄wana esie ayama.+
8 Ndien kpukpru se inọde un̄wana ke ikpaenyọn̄—ami nyanam mmọ ẹkịm ke ntak fo, nyonyụn̄ nsịn ekịm ke isọn̄ fo,’ uyo Jehovah Akakan Ọbọn̄ Andikara edi emi.
9 “‘Ndien ami nyanam esịt ediwak owo ayat ke ini ndade mbuotekọn̄ nto fi ke otu mme idụt n̄ka mme idụt emi afo mûfiọkke.+
10 Nyonyụn̄ nnam n̄kpen̄eyen̄ omụm ediwak owo aban̄a fi,+ ndien ọkpọsọn̄ ndịk ayanam ndidem mmọ ẹnyek idem ẹban̄a fi ke ini mfụn̄de akan̄kan̄ mi ke iso mmọ,+ ndien mmọ ẹyenyek idem kpukpru ini, owo mmọ kiet kiet eyenyek idem aban̄a ukpọn̄ esie, ke usen iduọ fo.’+
11 “Koro ntem ke Jehovah Akakan Ọbọn̄ Andikara ọdọhọ ete, ‘Akan̄kan̄ edidem Babylon oyodoro fi ke idem.+
12 Ndien ami nyanam otuowo fo ẹduọn̄ọ ke akan̄kan̄ n̄kpọsọn̄ owo, kpa mbon ufịk mme idụt, kpukpru mmọ;+ ndien mmọ ẹyebụme se Egypt adade atan̄ idem, ẹyenyụn̄ ẹsobo kpukpru otuowo esie.+
13 Ndien ami nyosobo kpukpru ufene esie mfep ke mben ediwak mmọn̄,+ ukot owo idinyụn̄ ibiohokede+ mmọ aba, ikpat ufene idinyụn̄ ibiohokede mmọ.’
14 “‘Ke ini oro ami nyanam mmọn̄ mmọ asana, nyonyụn̄ nnam mme akpa mmọ ẹfiọrọ nte aran,’ uyo Jehovah Akakan Ọbọn̄ Andikara edi emi.
15 “‘Ke ini nnamde isọn̄ Egypt edi ndon ẹnyụn̄ ẹsobode kpukpru se iyọhọde ke isọn̄,+ ke ini n̄wotde kpukpru mme andidụn̄ ke esịt, mmọ ẹyefiọk n̄ko ẹte ke ami ndi Jehovah.+
16 “‘Emi edi ikwọ mfụhọ, ndien mme owo ẹyekwọ enye. Nditọiban mme idụt ẹyekam ẹkwọ enye; mmọ ẹyekwọ enye ẹban̄a Egypt ye ofụri otuowo esie,’+ uyo Jehovah Akakan Ọbọn̄ Andikara edi emi.”
17 Edikem ke ọyọhọ isua duopeba, ke ọyọhọ usenọfiọn̄ efịt, uyo Jehovah esịm mi, ete:
18 “Eyen owo, seme ban̄a otuowo Egypt nyụn̄ nam enye osụhọde,+ enye ye nditọiban ikpọ idụt, ke isọn̄ emi odude ke idak,+ ye mbon oro ẹsụhọrede ẹka obube.+
19 “‘Ke ẹmende ẹdomo, afo enem itie akan anie?+ Sụhọde ka, ndien ẹyenam fi osụhọde ana ye mbon oro mînaha mbobi!’+
20 “‘Mmọ ẹyeduọn̄ọ ke otu mbon oro ẹwotde ke akan̄kan̄.+ Ẹmeyak enye ẹnọ akan̄kan̄. Mbufo ẹdụri enye ye kpukpru otuowo esie ẹdaha.
21 “‘Mme ebeiso ke otu n̄kpọsọn̄ owo ẹyedu ke ufọt Udi* ẹtịn̄ ikọ ye enye, ọkọrọ ye mme andin̄wam enye.+ Mmọ ẹyesụhọde ẹka;+ mmọ ẹyesụhọde ẹna nte mbon oro mînaha mbobi, emi ẹwotde ke akan̄kan̄.
22 Do ke Assyria ye ofụri esop esie ẹdu.+ Mme itie ubụkowo esie ẹkan enye ẹkụk. Ẹwot kpukpru mmọ, mbon oro ẹduọn̄ọde ke akan̄kan̄.+
23 Koro ẹmenịm mme itie ubụkowo esie ke ata esịt obube,+ ndien esop esie akan udi esie okụk, ẹwot kpukpru mmọ, mmọ ẹduọn̄ọ ke akan̄kan̄, koro mmọ ẹkenamde ndịk odu ke isọn̄ mme odu-uwem.
24 “‘Elam+ ye ofụri otuowo esie ẹkan udi esie ẹkụk, kpukpru mmọ oro ẹwotde, mbon oro ẹduọn̄ọde ke akan̄kan̄, oro mînaha mbobi ẹnyụn̄ ẹsụhọrede ke isọn̄ emi odude ke idak, mbon emi ẹnamde ndịk mmọ odu ke isọn̄ mme odu-uwem; ndien mmọ ẹyebiom esuene mmọ ye mbon emi ẹsụhọrede ke obube.+
25 Ke ufọt mbon oro ẹwotde, mmọ ẹmenịm bed+ ẹnọ enye ke otu ofụri otuowo esie. Mme itie ubụkowo esie ẹkan enye ẹkụk. Kpukpru mmọ ẹdi mbon oro mînaha mbobi, emi ẹwotde ke akan̄kan̄,+ koro ẹma ẹnam ndịk mmọ odu ke isọn̄ mme odu-uwem; ndien mmọ ẹyebiom esuene mmọ ye mbon emi ẹsụhọrede ke obube. Ẹmesịn enye ke otu mbon oro ẹwotde.
26 “‘Do ke Meshech+ ye Tubal+ ye kpukpru otuowo esie ẹdu. Mme itie ubụkowo esie ẹkan enye ẹkụk. Kpukpru mmọ ẹdi mbon oro mînaha mbobi, emi ẹkịmde ke akan̄kan̄, koro mmọ ẹnamde ndịk mmọ odu ke isọn̄ mme odu-uwem.
27 Ndien nte mmọ idisụhọkede ina ye n̄kpọsọn̄ owo,+ emi ẹtode ke otu mbon oro mînaha mbobi ẹduọn̄ọ, emi ẹsụhọrede ke Udi* ye mme n̄kpọekọn̄ mmọ? Ndien mmọ ẹyenịm mme akan̄kan̄ mmọ ke idak ibuot mmọ, ndien mme ndudue mmọ ẹyedi ẹdidu ke mme ọkpọ mmọ,+ koro n̄kpọsọn̄ owo ẹkedide n̄kpọndịk ke isọn̄ mme odu-uwem.+
28 Ndien amaedi afo, ẹyebụn̄ fi ke otu mbon oro mînaha mbobi, afo oyonyụn̄ osụhọde ana ye mbon oro ẹwotde ke akan̄kan̄.
29 “‘Do ke Edom+ ye ndidem esie ye kpukpru mbọn̄ esie ẹdu, emi kpa ye odudu mmọ, ẹkenịmde mmọ ye mbon oro ẹwotde ke akan̄kan̄;+ mmọ ẹyesụhọde ẹna ye mbon oro mînaha mbobi+ ọkọrọ ye mbon oro ẹsụhọrede ke obube.
30 “‘Do ke mbọn̄ edem edere ẹdu, kpukpru mmọ, ye kpukpru mbon Sidon,+ emi ẹdade bụt ẹsụhọde ye mbon oro ẹkewotde, kpa ye ndịk oro odudu mmọ anamde ẹkop. Ndien mbon oro mînaha mbobi ẹyesụhọde ẹna ye mbon oro ẹkewotde ke akan̄kan̄, mmọ ẹyenyụn̄ ẹbiom esuene mmọ ye mbon emi ẹsụhọrede ke obube.+
31 “‘Mmọ emi ẹdi mbon oro Pharaoh edikụtde, enye oyonyụn̄ okop ndọn̄esịt aban̄a ofụri otuowo esie.+ Ẹyewot Pharaoh ye ofụri udịmekọn̄ esie ke akan̄kan̄,’ uyo Jehovah Akakan Ọbọn̄ Andikara edi emi.
32 “‘Koro enye amanam ndịk esie odu ke isọn̄ mme odu-uwem,+ ndien ẹyenam enye osụhọde ana ke ufọt mbon oro mînaha mbobi, ye mbon oro ẹwotde ke akan̄kan̄, ih Pharaoh ye ofụri otuowo esie,’ uyo Jehovah Akakan Ọbọn̄ Andikara edi emi.”
