Ezekiel 4;1-17
4 “Ndien afo, O eyen owo, da kọrikọri ke idemfo, nyụn̄ nịm enye ke iso fo nyụn̄ kap ndise obio, kpa Jerusalem, ke esịt.+
2 Nyụn̄ kan enye kụk,+ bọp ibibene kanade enye,+ kịbi ibombom kanade enye+ nyụn̄ nam nnaekọn̄ kan enye kụk nyụn̄ nịm n̄kpọ uwụri ibibene kan enye kụk.+
3 Ndien da akpan̄kpan̄ ukwak nịm nte ibibene ukwak ke ufọt fo ye obio oro, nyụn̄ wụk iso fo se enye, ndien ẹnyene ndikan enye n̄kụk, afo nyụn̄ kan enye kụk. Emi edi idiọn̄ọ ọnọ ufọk Israel.+
4 “Afo nyụn̄ na ke n̄kan̄ ufien fo, nyụn̄ dori ndudue ufọk Israel ke enye.+ Koro afo edibiom ndudue mmọ ke ibat usen emi afo edinade ke n̄kan̄ fo.
5 Ndien ami nyọnọ fi usen ikie ita ye anan̄ ye duop+ ke isua ndudue mmọ,+ afo onyụn̄ enyene ndibiom ndudue ufọk Israel.
6 Ndien afo enyene ndikụre mmọ.
“Ndien ke isan̄ enye emi afo enyene ndina ke n̄kan̄ nnasia fo, afo onyụn̄ enyene ndibiom ndudue ufọk Judah ke usen aba.+ Usen kiet ke isua kiet, usen kiet ke isua kiet, ke ami nnọ fi.+
7 Ndien afo enyene ndiwụk iso fo nse nte ẹkande Jerusalem ẹkụk,+ kpan̄ ubọk ọfọn̄ fo, afo onyụn̄ enyene nditịn̄ ntịn̄nnịm ikọ mban̄a enye.
8 “Ndien, sese! ami nyada urụk+ mbọp fi mbak afo uduwọn̄ọde ke n̄kan̄ kiet una ke n̄kan̄ eken, tutu mme usen oro afo edikande obio okụk ẹkụre.
9 “Afo nyụn̄ da wheat+ ye barley ye ikpọ ọkọti+ ye lentil+ ye millet ye spelt,+ dọn̄ ke n̄kpọ udọn̄n̄kpọ kiet nyụn̄ da mmọ nam uyo nọ idemfo, ke ibat usen oro afo anade ke n̄kan̄ fo; afo edita enye ke usen ikie ita ye anan̄ ye duop.+
10 Ndien udia emi afo edidiade edidi ke udomo—shekel edịp ke usen.+ Afo edita enye ke ini ke ini.
11 “Ndien afo edin̄wọn̄ mmọn̄ ke udomo, mbahade hin kiet ke itie itiokiet. Afo edin̄wọn̄ enye ke ini ke ini.
12 “Ndien afo edita enye nte ekara uyo barley;+ ndien afo edida nsat ifuọ+ owo asan̄ enye ke iso mmọ.”
13 Ndien Jehovah ọdọhọ ete: “Kpa ntem ke nditọ Israel ẹdita ndedehe+ uyo mmọ ke otu mme idụt emi ndisuande mmọ ndọn̄.”+
14 Ndien ami ndọhọ nte: “O Jehovah Akakan Ọbọn̄ Andikara! Sese! Akanam nsabakede ukpọn̄ mi;+ toto ke uyen mi+ tutu esịm emi, akanam ntaha unam eke akpade ikpọn̄ m̀mê unam eke unam efen awaide, obụk emi edehede inyụn̄ idụkke mi inua.”+
15 Ntre enye ọdọhọ mi ete: “Sese, mmọnọ fi ifuọ enan̄ utu ke nsat ifuọ owo, afo onyụn̄ enyene ndida enye nsan̄ uyo fo.”
16 Ndien enye ọdọhọ mi ete: “Eyen owo, sese ami mmọn̄ mbụn̄ eto emi ẹyịride+ ekara uyo ke Jerusalem, ndien mmọ ẹdita uyo ke udomo ye ke nnyekidem,+ mmọ ẹdinyụn̄ ẹn̄wọn̄ mmọn̄ ke udomo ye ke ọkpọsọn̄ ndịk,+
17 man mmọ ẹkpenana uyo ye mmọn̄, mmọ ẹkpenyụn̄ ẹse kiet eken ke n̄kpaidem ẹnyụn̄ ẹyemede ke ndudue mmọ.+
