Ezekiel 42;1-20
42 Ndien enye ada mi sụn̄sụn̄ ọwọrọ+ edi okụre an̄wa, asan̄a usụn̄ n̄kan̄ edem edere.+ Ndien enye ada mi edi ikpehe ubet udia+ emi odude ke iso ebiet oro ẹsiode ẹnịm+ onyụn̄ odude ke iso ufọk, ke n̄kan̄ edem edere.
2 Ndien enyịnusụn̄ edem edere odu ke n̄kan̄ emi ọniọn̄de cubit ikie, emi ubom onyụn̄ edide cubit aba ye duop.
3 Etehe+ ufọkenyọn̄ asak iso ese etehe ufọkenyọn̄, emi edide enyọn̄ ita ita, ke iso n̄kan̄ oro edide cubit edịp ke okụre+ esịt esịt ye ke iso mbot+ okụre an̄wa.
4 Ndien usụn̄ eke ẹsan̄ade emi edide cubit duop ke ubom odu ke esịt esịt ke iso mme ubet udia,+ usụn̄ emi edide cubit kiet onyụn̄ odu, ndien mme enyịnusụn̄ mmọ ẹse n̄kan̄ edem edere.
5 Ndien mme ubet udia oro ẹdude ke ọyọhọ enyọn̄ ita ẹkpri ẹkan, koro mme etehe ẹbọde mmọ ufan̄, ẹkan nte ẹbọde mbon oro ẹdude ke akpa enyọn̄ ye ọyọhọ enyọn̄ iba, ke ufọk oro.
6 Koro mmọ ẹdi enyọn̄ ita ita,+ mmọ inyụn̄ inyeneke mme adaha ndomokiet nte mme adaha emi ẹdude ke mme okụre. Ntak edi oro ufan̄ isọn̄ ufọk mîkponke nte eke akpa enyọn̄ ye ọyọhọ enyọn̄ iba.
7 Ndien ibibene itiat n̄kan̄ an̄wa odu ekpere mme ubet udia emi ẹdude ke n̄kan̄ okụre an̄wa, mbemiso mme ubet udia eken. Uniọn̄ esie edi cubit aba ye duop.
8 Koro uniọn̄ mme ubet udia emi ẹdude ke n̄kan̄ okụre an̄wa edi cubit aba ye duop, ndien, sese! enye edi cubit ikie ke n̄kan̄ emi esede temple.
9 Ndien ke idak mme ubet udia emi, usụn̄ oro ẹsan̄ade ẹdụk odu ke n̄kan̄ edem usiahautịn, ke ini owo otode okụre an̄wa odụk.
10 Mme ubet udia+ ẹdu ke ibibene itiat okụre ke n̄kan̄ edem usiahautịn, mbemiso ebiet oro ẹsiode ẹnịm+ ye mbemiso ufọk.
11 Ndien usụn̄ odu ke iso mmọ, ebiet usụn̄ mme ubet udia oro ẹdude ke n̄kan̄ edem edere,+ ntem ke edi ye uniọn̄ mmọ ye ubom mmọ; ndien kpukpru usụn̄ mmọ oro ẹsan̄ade ẹwọrọ ẹdi ukem, ndien nte ẹnamde mmọ ẹdi ukem, mme enyịnusụn̄ mmọ ẹnyụn̄ ẹdi ukem.
12 Ndien enyịnusụn̄ ibuot usụn̄, kpa usụn̄ emi odude mbemiso ukem ibibene itiat n̄kan̄ edem usiahautịn, ke ini owo odụkde edi,+ etie nte mme enyịnusụn̄ mme ubet udia n̄kan̄ edem usụk.
13 Ndien enye ọdọhọ mi ete: “Mme ubet udia edem edere ye mme ubet udia edem usụk oro ẹdude ke iso ebiet oro ẹsiode ẹnịm+ ẹdi ndisana ubet udia, emi mme oku oro ẹsan̄ade ẹkpere+ Jehovah ẹsidiade ata ndisana n̄kpọ.+ Do ke mmọ ẹsibon ata ndisana n̄kpọ ye uwa n̄kpasịp ye uwa idiọkn̄kpọ ye uwa ubiomikpe, koro ebiet oro edide edisana.+
14 Ke ini mmọ, mme oku, ẹdụkde ẹdi, mmọ n̄ko idiwọrọke ke edisana ebiet ika okụre an̄wa, edi do ke mmọ ẹdibon mme ọfọn̄ oro mmọ ẹsịnede ẹnam utom,+ koro mmọ ẹdide ndisana n̄kpọ. Mmọ ẹyesịne mme ọfọn̄ efen,+ ndien ẹsan̄a ẹkpere ebiet emi mme owo ẹdude.”
15 Ndien enye okụre ndidomo ufọk oro odude ke esịt esịt, onyụn̄ ada mi ọwọrọ asan̄a usụn̄ inuaotop emi esede n̄kan̄ edem usiahautịn,+ ndien enye odomo enye akanade.
16 Enye ada nnyanyan̄a udomon̄kpọ odomo n̄kan̄ edem usiahautịn. Enye edi nnyanyan̄a ikie ition, ke nnyanyan̄a udomon̄kpọ,+ akan okụk.
17 Enye odomo n̄kan̄ edem edere, nnyanyan̄a ikie ition, ke nnyanyan̄a udomon̄kpọ, akan okụk.
18 Enye odomo n̄kan̄ edem usụk, nnyanyan̄a ikie ition, ke nnyanyan̄a udomon̄kpọ.
19 Enye ọwọn̄ọde aka n̄kan̄ edem usoputịn. Odomo nnyanyan̄a ikie ition, ke nnyanyan̄a udomon̄kpọ.
20 Enye odomo n̄kan̄ mbinan̄. Enye enyene ibibene akan okụk,+ uniọn̄ edi nnyanyan̄a ikie ition, ubom onyụn̄ edi nnyanyan̄a ikie ition,+ man anam ubahade odu ke ufọt se idide edisana ye se ẹsabarede.+
