Ezekiel 45;1-25
45 “‘Ndien ke ini mbufo ẹdemede isọn̄ nte udeme,+ mbufo ẹnyene ndinọ Jehovah etịbe,+ kpa edisana ubak isọn̄ emi ẹsiode ke isọn̄+ emi ẹdemede; uniọn̄ esie edidi cubit tọsịn edịp ye ition, ubom esie edinyụn̄ edi cubit tọsịn duop.+ Enye edidi edisana ubak isọn̄ ke kpukpru mme adan̄a esie akan okụk.
2 Mi ke ẹdinyene edisana ebiet, cubit ikie ition ke uniọn̄ ye cubit ikie ition ke ubom, ẹnam enye edi ukem ke edem mbinan̄ akanade;+ enye oyonyụn̄ enyene in̄wan̄ mbiet ufene emi edide cubit aba ye duop ke n̄kan̄ esie kiet kiet.+
3 Ndien ke udomo emi, afo enyene ndidomo uniọn̄ emi edide cubit tọsịn edịp ye ition ye ubom emi edide cubit tọsịn duop, ndien edi ke esịt esie ke edisana ebiet edidu, ata edisana n̄kpọ.+
4 Nte edisana ubak isọn̄ ke isọn̄ emi ẹdemede, enye edinyene mme oku,+ kpa mme asan̄autom temple, mbon oro ẹsan̄ade ẹkpere ndisan̄a utom nnọ Jehovah.+ Ndien enye edidi itie ọnọ mmọ ndibọp ufọk, onyụn̄ edi edisana ebiet ọnọ temple.
5 “‘Uniọn̄ emi edide cubit tọsịn edịp ye ition ye ubom emi edide tọsịn duop ẹyedu.+ Emi edinyene nditọ Levi,’ kpa mme asan̄autom Ufọk mi. Mmọ ẹyenyene ubet udia edịp+ nte inyene.
6 “‘Ndien nte inyene obio, mbufo ẹyenọ tọsịn ition ke ubom ye tọsịn edịp ye ition ke uniọn̄, ukem nte edisana etịbe.+ Enye edinyene ofụri ufọk Israel.
7 “‘Ndien eke ọbọn̄ edidu ke n̄kan̄ edisana etịbe+ emi ye eken ye ke n̄kan̄ inyene obio emi ye eken, ekpere edisana etịbe onyụn̄ ekpere inyene obio, n̄kpọ emi odude ke edem usoputịn ke n̄kan̄ edem usoputịn ye n̄kpọ emi odude ke edem usiahautịn ke n̄kan̄ edem usiahautịn. Ndien uniọn̄ esie edidi ukem nte kiet ke otu mme udeme, ọtọn̄ọde ke adan̄a n̄kan̄ edem usoputịn tutu esịm adan̄a n̄kan̄ edem usiahautịn.+
8 Amaedi isọn̄ oro, enye ayakabade edi esie nte inyene ke Israel. Ndien mbọn̄ mi idifiomoke aba ikọt mi,+ mmọ ẹyenyụn̄ ẹda isọn̄ oro ẹnọ ufọk Israel nte mme esien mmọ ẹdide.’+
9 “Ntem ke Jehovah Akakan Ọbọn̄ Andikara ọdọhọ ete, ‘Ekem mbufo adan̄aoro, O mbọn̄ Israel!’+
“‘Ẹsio afai ye n̄wo ẹfep,+ ẹnyụn̄ ẹnam unenikpe ye edinen ido.+ Ẹmenede ufịk mbufo ẹfep ke idem ikọt mi,’+ uyo Jehovah Akakan Ọbọn̄ Andikara edi emi.
10 ‘Mbufo ẹnyene ndinyene udomon̄kpọ eke enende ye ephah eke enende ye aban̄ udomon̄kpọ eke enende.+
11 Ephah ye aban̄ udomon̄kpọ enyene ndidi udomo kiet, man aban̄ kiet odụk mbahade homer kiet ke itie duop, mbahade homer kiet ke itie duop onyụn̄ edi ephah kiet;+ udomo esie enyene ndidi ke homer.
12 Ndien shekel+ edi gerah edịp.+ Shekel edịp, shekel edịp ye ition, shekel efịt edidi maneh ọnọ mbufo.’
13 “‘Emi edi etịbe oro mbufo ẹdinọde, ẹsio ephah kiet ke homer wheat, ẹda mbahade kiet ke itie itiokiet, ẹnyụn̄ ẹsio ephah kiet ke homer barley, ẹda mbahade kiet ke itie itiokiet;
14 ndien amaedi udeme aran, aban̄ udomo aran odu. Aban̄ edi mbahade cor kiet ke itie duop. Aban̄ duop ẹdi homer kiet; koro aban̄ duop ẹdide homer kiet.
15 Ye erọn̄ kiet eke ẹsiode ke otuerọn̄, ke otu ufene ikie iba eke ẹtode ke otu ufene Israel,+ kaban̄a uwa n̄kpasịp+ ye ofụri edifọp uwa+ ye uwa ebuana,+ man ẹsio isop ẹnọ mmọ,’+ uyo Jehovah Akakan Ọbọn̄ Andikara edi emi.
16 “‘Edidi mbiomo kpukpru mbio obio nditịp etịbe+ emi nnọ ọbọn̄ ke Israel.+
17 Ẹdiyak ofụri edifọp uwa+ ye uwa n̄kpasịp+ ye edin̄wọn̄ uwa+ ẹnọ ọbọn̄+ ke mme ini usọrọ+ ye ke mbufa ọfiọn̄+ ye ke mme sabbath,+ ke kpukpru ini usọrọ ufọk Israel.+ Edi enye edinọ uwa idiọkn̄kpọ ye uwa n̄kpasịp ye ofụri edifọp uwa ye uwa ebuana, man ẹsio isop ẹnọ ufọk Israel.’
18 “Ntem ke Jehovah Akakan Ọbọn̄ Andikara ọdọhọ ete, ‘Ke akpa ọfiọn̄, ke akpa usen ke ọfiọn̄ oro, afo enyene ndida abak ayara enan̄, kpa ayara eyen enan̄ eke eyede idem,+ ndien afo enyene ndinam edisana ebiet asana ọbọhọ idiọkn̄kpọ.+
19 Ndien oku enyene ndida ndusụk iyịp uwa idiọkn̄kpọ nyet ke obubọk enyịnusụn̄+ Ufọk oro ye ke inụk mben mbinan̄ oro ẹkande ẹkụk, emi ẹdude ke itieuwa+ ye ke obubọk enyịnusụn̄ inuaotop okụre emi odude ke esịt esịt.
20 Ndien ntem ke afo edinam ke ọyọhọ usen itiaba ke ọfiọn̄ oro ke ntak owo ekededi eke anamde ndudue+ ye ke ntak owo ekededi eke anamde n̄kpọ ke unana ifiọk; ndien mbufo ẹnyene ndisio isop nnọ Ufọk oro.+
21 “‘Ke akpa ọfiọn̄, ke ọyọhọ usen duopenan̄ ke ọfiọn̄ oro, mbufo ẹnyene ndinịm passover.+ Nte usọrọ usen itiaba, mbufo ẹdita uyo eke leaven mîdụhe.+
22 Ndien ke usen oro, ọbọn̄ ọyọnọ abak ayara enan̄ nte uwa idiọkn̄kpọ+ ke ibuot esie ye ke ibuot mbio obio.
23 Ndien ke usen itiaba ke ini usọrọ+ oro enye ọyọnọ Jehovah abak nyara enan̄ itiaba ye okukịm erọn̄ itiaba eke ẹyede idem, nte ofụri edifọp uwa, kpukpru usen, ke usen itiaba,+ ye okpo ebot kpukpru usen nte uwa idiọkn̄kpọ.+
24 Ndien amaedi uwa n̄kpasịp enye edinọ ephah kiet adian ye abak ayara enan̄ onyụn̄ ọnọ ephah kiet adian ye okukịm erọn̄, ndien amaedi aran, enye edinọ hin kiet adian ye ephah kiet.+
25 “‘Ke ọyọhọ ọfiọn̄ itiaba, ke ọyọhọ usen efịt ke ọfiọn̄ oro, ke ini usọrọ,+ enye ọyọnọ ukem emi ke usen itiaba,+ ukem nte uwa idiọkn̄kpọ, ukem nte ofụri edifọp uwa, ye ukem nte uwa n̄kpasịp ye aran.’”
