Ezekiel 46;1-24
46 “Ntem ke Jehovah Akakan Ọbọn̄ Andikara ọdọhọ ete, ‘Amaedi inuaotop okụre oro odude ke esịt esịt, emi esede edem usiahautịn,+ ẹnyene ndibeberi+ enye ke usen utom itiokiet,+ ndien ẹnyene ndiberede enye ke usen sabbath, ẹnyụn̄ ẹnyene ndiberede enye ke usen obufa ọfiọn̄.+
2 Ndien ọbọn̄ enyene ndito an̄wa nsan̄a usụn̄ etehe inuaotop ndụk,+ nnyụn̄ ndida n̄kpere obubọk enyịnusụn̄ inuaotop;+ ndien mme oku ẹnyene ndiwa ofụri edifọp uwa esie ye mme uwa ebuana esie, ndien enye enyene ndinụhọ ke iso asan̄udọk inuaotop,+ ndien enye ọwọrọ, edi owo inyeneke ndiberi inuaotop tutu mbubreyo.
3 Ndien mbio obio ẹnyene ndinụhọ ke enyịnusụn̄ inuaotop oro ke mme sabbath ye ke mbufa ọfiọn̄, ke iso Jehovah.+
4 “‘Ndien ofụri edifọp uwa emi ọbọn̄ edinọde Jehovah ke usen sabbath enyene ndidi nyara nditọerọn̄ itiokiet emi ẹyede idem ye okukịm erọn̄ oro eyede idem;+
5 ndien amaedi uwa n̄kpasịp, enye edinọ ephah kiet adian ye okukịm erọn̄,+ ndien amaedi eke nyara nditọerọn̄ enye edinọ uwa n̄kpasịp nte enye ekemede ndinọ,+ ndien, amaedi aran, enye edinọ hin kiet adian ye ephah kiet.+
6 Ndien ke usen obufa ọfiọn̄+ enye edinọ abak ayara enan̄, ayara eyen ufene, emi eyede idem, nyara nditọerọn̄ itiokiet ye okukịm erọn̄; mmọ ẹnyene ndidi mbon oro ẹyede idem.+
7 Ndien enye edinọ ephah kiet adian ye abak ayara enan̄ onyụn̄ ọnọ ephah kiet adian ye okukịm erọn̄ ndien awa enye nte uwa n̄kpasịp, ndien eke nyara nditọerọn̄ ẹdidi nte enye ekemede ndinọ; ndien, amaedi aran, enye edinọ hin kiet adian ye ephah kiet.+
8 “‘Ndien ke ini ọbọn̄+ odụkde edi, enye enyene ndisan̄a usụn̄ etehe inuaotop ndụk, enye onyụn̄ enyene ndisan̄a usụn̄ oro n̄wọrọ.+
9 Ndien ke ini mbio obio ẹdụkde ẹdi ke iso Jehovah ke mme ini usọrọ,+ owo eke asan̄ade usụn̄ inuaotop edem edere+ odụk man edinụhọ enyene ndisan̄a usụn̄ inuaotop edem usụk n̄wọrọ;+ ndien owo eke asan̄ade usụn̄ inuaotop edem usụk odụk enyene ndisan̄a usụn̄ inuaotop emi esede n̄kan̄ edem edere, n̄wọrọ. Baba owo kiet inyeneke ndisan̄a usụn̄ inuaotop emi enye okotode odụk, n̄wọrọ, koro enye enyene ndibe nnennen n̄ka iso iso n̄kọwọrọ.
10 Ndien amaedi ọbọn̄ emi odude ke otu mmọ, ke ini mmọ ẹdụkde ẹdi, enye enyene ndidụk ndi; ndien ke ini mmọ ẹwọrọde, enye enyene ndiwọrọ.+
11 Ndien ke mme usọrọ+ ye ke mme ini usọrọ, uwa n̄kpasịp enyene ndidi ephah kiet emi enye ọnọde adian ye abak ayara enan̄ ye ephah kiet emi enye ọnọde adian ye okukịm erọn̄, ndien eke nyara nditọerọn̄ edidi nte enye ekemede ndinọ; ndien, amaedi aran, enye edinọ hin kiet adian ye ephah kiet.+
12 “‘Ndien edieke ọbọn̄ ọnọde ofụri edifọp uwa+ nte uwa unyịmesịt m̀mê ọnọde mme uwa ebuana nte uwa unyịmesịt emi ẹwade ẹnọ Jehovah, owo enyene ndiberede inuaotop emi esede edem usiahautịn nnọ enye,+ ndien enye enyene ndinọ ofụri edifọp uwa esie ye mme uwa ebuana esie kpa nte enye esinamde ke usen sabbath.+ Ndien enye enyene ndiwọrọ, owo onyụn̄ enyene ndiberi inuaotop ke enye ama ọkọwọrọ.+
13 “‘Afo onyụn̄ enyene ndinọ ayara eyenerọn̄ isua kiet emi eyede idem, nte ofụri edifọp uwa emi ẹwade ke usen ke usen ẹnọ Jehovah.+ Afo enyene ndinọ enye kpukpru usenubọk.
14 Ndien nte uwa n̄kpasịp afo enyene ndinọ mbahade ephah kiet ke itie itiokiet kpukpru usenubọk ndian ye enye, ndien amaedi aran, enye edinọ mbahade hin kiet ke itie ita ndida nsịme ke eti ndomuyo.+ Uwa n̄kpasịp emi ẹwade ẹnọ Jehovah edi nsinsi ewụhọ, emi ẹwade kpukpru ini.
15 Ndien mmọ ẹnyene ndinọ ayara eyenerọn̄ ye uwa n̄kpasịp ye aran kpukpru usenubọk nte ofụri edifọp uwa oro ẹwade ofụri ini.’
16 “Ntem ke Jehovah Akakan Ọbọn̄ Andikara ọdọhọ ete, ‘Edieke ọbọn̄ ọnọde kiet kiet ke otu nditọiren esie enọ nte udeme esie, emi ayakabade edi inyene nditọiren esie. Emi edi inyene mmọ oro ẹnọde mmọ nte udeme.
17 Ndien edieke enye osiode enọ ke udeme esie ọnọ kiet ke otu mme asan̄autom esie, emi ayakabade edi esie tutu esịm isua uwọrọ-ufụn;+ ndien emi ayafiak ebịne ọbọn̄. Udeme esie kpọt—oro enye ọkọnọde nditọiren esie—edika iso edi eke mmọ.
18 Ndien ọbọn̄ inyeneke ndida udeme ekededi emi mbio obio ẹnyenede man ebịn mmọ osio ke inyene mmọ.+ Enye enyene ndisio inyene esie nnọ nditọiren esie nte udeme, mbak ikọt mi ẹdisuana ẹkpọn̄ inyene mmọ.’”+
19 Ndien enye ada mi edi usụn̄ emi ẹsan̄ade ẹdụk,+ oro ekperede n̄kan̄ inuaotop emi esede ndisana ubet udia, mmọ emi ẹnyenede mme oku, oro ẹsede edem edere,+ ndien, sese! ebiet odu do ke n̄kan̄ edem edem mbiba emi esede edem usoputịn.
20 Ndien enye ọdọhọ mi ete: “Emi edi ebiet oro mme oku ẹditemde uwa ubiomikpe+ ye uwa idiọkn̄kpọ,+ ye ebiet emi mmọ ẹdisan̄de uwa n̄kpasịp,+ mbak ẹdimen n̄kpọ ndomokiet ẹwọrọ ẹka okụre an̄wa ẹkenam mme owo ẹsana.”+
21 Ndien enye ada mi ọwọrọ edi okụre an̄wa onyụn̄ anam mi nsan̄a mbe n̄kesịm obubọk inụk mbinan̄ ke okụre, ndien, sese! okụre kiet odu ekpere obubọk inụk okụre n̄kan̄ emi, okụre kiet onyụn̄ odu ekpere obubọk inụk okụre n̄kan̄ eken.
22 Ndien n̄kpri okụre ẹdu ke obubọk inụk mbinan̄ ke okụre, cubit aba ke uniọn̄ ye cubit edịp ye duop ke ubom. Mmọ mbinan̄, ọkọrọ ye mme inụk ufọk mmọ, ẹnyene ukem udomo.
23 Ndien udịm odu akanade mmọ, akanade mmọ mbinan̄, mme ebiet utemn̄kpọ+ ẹnyụn̄ ẹdu emi ẹnamde ke idak mme udịm oro ẹdude ẹkanade.
24 Ekem enye ọdọhọ mi ete: “Mmọ emi ẹdi mme ufọk mbon oro ẹtemde n̄kpọ, ebiet emi mme asan̄autom Ufọk mi ẹtemde uwa emi mme owo ẹdade ẹdi.”+
