Ezekiel 47;1-23
47 Ndien enye ada mi sụn̄sụn̄ afiak edi enyịnusụn̄ Ufọk oro,+ ndien, sese! mmọn̄+ oto idak asan̄udọk Ufọk oro ke n̄kan̄ edem usiahautịn+ ewet ọwọrọ, koro iso Ufọk oro odude ke edem usiahautịn. Ndien mmọn̄ oro oto idak ewet osụhọde, ọtọn̄ọ ke n̄kan̄ nnasia Ufọk oro, ke edem usụk itieuwa.
2 Ndien enye ada mi sụn̄sụn̄ ọwọrọ edi, asan̄a usụn̄ inuaotop edem edere+ onyụn̄ ada mi ọwọn̄ọde asan̄a usụn̄ an̄wa emi akade inuaotop an̄wa oro esede n̄kan̄ edem usiahautịn,+ ndien, sese! mmọn̄+ ewet oto n̄kan̄ nnasia.
3 Ke ini owo oro ọwọrọde aka n̄kan̄ edem usiahautịn, akama urụk udomon̄kpọ ke ubọk,+ enye n̄ko odomo cubit tọsịn kiet onyụn̄ anam mi nsan̄a ke mmọn̄ oro mbe, mmọn̄ oro ọdọk esịm itọn̄ukot.
4 Ndien enye odomo tọsịn kiet ndien ekem anam mi nsan̄a ke mmọn̄ oro mbe, mmọn̄ oro ọdọk esịm edọn̄.
Ndien enye odomo tọsịn kiet, ndien anam mi nsan̄a mbe—mmọn̄ oro ọdọk esịm isịn.
5 Ndien enye odomo tọsịn kiet. Enye edi mmọn̄ emi mmen̄kemeke ndisan̄a mbe, koro mmọn̄ oro okponde, mmọn̄ emi ẹkemede ndiwọk, mmọn̄ emi owo mîkemeke ndisan̄a mbe.
6 Ntem enye ọdọhọ mi ete: “Nte afo omokụt emi, O eyen owo?”
Ekem enye anam mi mfiak nsan̄a ndi mben mmọn̄ oro.
7 Ke ini mfiakde ndi, sese! ata ediwak eto ẹdu ke mben mmọn̄ oro, ke n̄kan̄ emi ye ke n̄kan̄ oko.+
8 Ndien enye ọdọhọ mi ete: “Mmọn̄ emi ewet aka ikpehe edem usiahautịn, enye oyonyụn̄ ebe Arabah+ osụhọde. Ndien enye eyewet okodụk inyan̄.+ Sia ẹnamde enye ewet okodụk inyan̄,+ ẹkọk mmọn̄ esie n̄ko.
9 Ndien ama ekem, kpukpru ukpọn̄ eke ẹdude uwem emi ẹyọhọde+ ke kpukpru ebiet emi mmọn̄ oro okponde utịm ikaba mi ewetde ekesịm, ẹyenyene uwem. Ndien ediwak iyak ẹyedu do, koro edi do ke mmọn̄ emi ediwet ekesịm, ẹyenyụn̄ ẹkọk mmọn̄ inyan̄ oro,+ ndien kpukpru n̄kpọ ẹyedu uwem ke ebiet emi mmọn̄ oro ewetde ekesịm.
10 “Ndien mme ọkọiyak ẹyeda ke mben esie ọtọn̄ọde ke En-gedi+ tutu esịm En-eglaim. Itie un̄wan iyịre oyodu. Iyak mmọ ẹdidi ke orụk ke orụk, nte iyak Akwa Inyan̄,+ ẹwak etieti.
11 “Enye enyene mme edep ye okpụk, ndien owo idikọkke mmọ.+ Ẹyeyak mmọ ẹnọ inụn̄.+
12 “Ndien kpukpru orụk eto udia+ ẹyekọri ke mben mmọn̄ oro, ke mben emi ye ke mben oko. Ikọn̄ mmọ idiyemekede,+ mfri mmọ idinyụn̄ ikụreke.+ Mmọ ẹyen̄wụm mbufa mfri ke mme ọfiọn̄ mmọ, koro mmọn̄ odude ọnọ mmọ—enye ọwọrọ oto edisana ebiet.+ Ndien mfri mmọ ẹdidi udia, ẹyenyụn̄ ẹda ikọn̄ mmọ ẹkọk udọn̄ọ.”+
13 Ntem ke Jehovah Akakan Ọbọn̄ Andikara ọdọhọ ete: “Ikpehe emi ke mbufo ẹdibahade ẹnọ idem mbufo nte udeme, nte isọn̄ emi enyenede esien Israel duopeba, ye mbak in̄wan̄ iba emi ẹnyenede Joseph.+
14 Ndien mbufo ẹyeda enye ẹnyene, owo kiet kiet ukem nte eke eyenete esie, kpa isọn̄ emi n̄kemenerede ubọk mi n̄n̄wọn̄ọ+ nte ke nyọnọ mme ete ete mbufo;+ ndien ẹdisịn afia ẹdeme isọn̄ emi ẹnọ mbufo nte udeme.+
15 “Ndien emi edi adan̄a isọn̄ oro ke n̄kan̄ edem edere, ọtọn̄ọde ke Akwa Inyan̄ esịm usụn̄ emi akade Hethlon,+ nte owo asan̄ade edi Zedad,+
16 Hamath,+ Berothah,+ Sibraim, emi odude ke ufọt adan̄a Damascus+ ye adan̄a Hamath; Hazer-hatticon, emi odude ke n̄kan̄ adan̄a Hauran.+
17 Ndien adan̄a emi ọtọn̄ọde ke inyan̄ edidi Hazar-enon,+ adan̄a Damascus ye edem edere—n̄kan̄ edem edere, ye adan̄a Hamath.+ Emi edi n̄kan̄ edem edere.
18 “Ndien n̄kan̄ edem usiahautịn ọtọn̄ọ ke ufọt Hauran+ ye Damascus,+ ye ke ufọt Gilead+ ye isọn̄ Israel; Jordan,+ mbufo ẹnyene ndidomo ọtọn̄ọde ke adan̄a tutu esịm inyan̄ n̄kan̄ edem usiahautịn. Emi edi n̄kan̄ edem usiahautịn.
19 “Ndien n̄kan̄ edem usụk odu ke edem usụk, ọtọn̄ọde ke Tamar+ tutu esịm mmọn̄ Meribath-kadesh,+ itịghede mmọn̄+ tutu esịm Akwa Inyan̄. Emi edi n̄kan̄ emi odude ke edem usụk, ke n̄kan̄ Negeb.
20 “Ndien n̄kan̄ edem usoputịn edi Akwa Inyan̄, ọtọn̄ọde ke adan̄a aka nnennen ekesịm ọtọ emi ẹtode ẹdụk Hamath.+ Emi edi n̄kan̄ edem usoputịn.”
21 “Ndien mbufo ẹnyene ndideme isọn̄ emi nnọ idem mbufo, nnọ esien Israel duopeba.
22 Ndien mbufo ẹnyene ndideme enye nnọ idem mbufo+ nte udeme nnyụn̄ ndeme nnọ isenowo emi ẹdụn̄de nte isenowo ke otu mbufo,+ emi ẹbonde nditọiren ke otu mbufo. Ndien mmọ ẹyekabade ẹtie nte mme amanaisọn̄ ke otu nditọ Israel. Mmọ ẹyetiene mbufo ẹnyene udeme emi ẹdade afia ẹdeme ke otu mme esien Israel.+
23 Ndien ama ekem, ke esien oro esenowo odụn̄de nte esenowo, do ke mbufo ẹnyene ndinọ enye udeme esie,” uyo Jehovah Akakan Ọbọn̄ Andikara edi emi.
