Ezekiel 7;1-27
7 Ndien uyo Jehovah ọtọn̄ọ ntak esịm mi, ete:
2 “Ndien amaedi afo, O eyen owo, ntem ke Jehovah Akakan Ọbọn̄ Andikara ọdọhọ isọn̄ Israel ete, ‘Utịt, kpa utịt emedi ọnọ utịt isọn̄ mbinan̄.+
3 Ke emi utịt emesịm fi,+ ndien ami nyọdọn̄ iyatesịt mi etiene fi, nyonyụn̄ n̄kpe ikpe fo nte ekemde ye mme usụn̄+ fo nnyụn̄ nda kpukpru mbubiam n̄kpọ fo ndori fi ke idem.
4 Ndien enyịn mi idituaha fi mbọm, ami ndinyụn̄ ntuaha fi mbọm,+ koro ami nyada mme usụn̄ fo ndori fi ke idem, mme mbubiam n̄kpọ fo ẹyenyụn̄ ẹdi ẹdidu ke ufọt fo;+ ndien mbufo ẹyefiọk ẹte ke ami ndi Jehovah.’+
5 “Ntem ke Jehovah Akakan Ọbọn̄ Andikara ọdọhọ ete, ‘Afanikọn̄, sese! afanikọn̄ eke mînyeneke mbiet, ke edi.+
6 Utịt enyene ndidi.+ Utịt enyene ndidi; enye enyene ndidemede mbịne fi. Sese! Enye ke edi.+
7 Anyanya ikọn̄ enyene ndidi mbịne fi, O andidụn̄ isọn̄, ini oro enyene ndidi, usen oro emekpere.+ Ndutịme odu, ndien idịghe n̄kpo ikpọ obot.
8 “‘Ndien ke mîbịghike, ami nyan̄wan̄a fi ifụtesịt mi ke idem,+ nyonyụn̄ nnam iyatesịt mi esịm utịt ke idemfo,+ ndien ami nyekpe ikpe fo nte ekemde ye mme usụn̄+ fo nnyụn̄ nda kpukpru mbubiam n̄kpọ fo ndori fi ke idem.
9 Enyịn mi idituaha mbọm,+ ami ndinyụn̄ ntuaha mbọm.+ Nyọnọ fi nte ekemde ye mme usụn̄ fo, ndien mme mbubiam n̄kpọ fo ẹyedi ẹdidu ke ufọt fo;+ ndien mbufo ẹyefiọk ẹte ke ami Jehovah mmia mbufo.+
10 “‘Sese! Usen oro! Sese! Enye ke edi.+ Anyanya ikọn̄ ọmọwọrọ aka.+ Eto emesehe.+ Iseri amafiari.+
11 Afai ọmọkọri akabade eto idiọkido.+ Itoho mmọ inyụn̄ itoho inyene mmọ; ndien emi itoho idemmọ, ubọn̄ ekededi inyụn̄ idụhe mmọ ke idem.
12 Ini oro enyene ndidi, usen oro enyene ndidi ndisịm. Ndien yak andidep okûdat esịt;+ yak andinyam okûnyụn̄ ofụhọ, koro ẹmefụt esịt ẹban̄a kpukpru mme otuowo esie.
13 Koro andinyam mîdifiakke ikọbọ se ama akanyam, ke adan̄aemi uwem mmọ osụk odude ke otu mme odu-uwem; koro n̄kukụt aban̄a kpukpru mme otuowo esie. Baba owo kiet idifiakke, ndien mmọ ididaha ndudue mmọ ibọ uwem mmọ inyene.
14 “‘Mmọ ẹmefri obukpon̄+ ẹmenyụn̄ ẹtịm kpukpru owo idem, edi baba owo kiet ikaha ekọn̄, koro ifụtesịt mi odorode kpukpru otuowo esie.+
15 Akan̄kan̄+ odu ke an̄wa, idiọk udọn̄ọ ye akan̄ ẹnyụn̄ ẹdu ke esịtufọk.+ Owo ekededi eke odude ke in̄wan̄ ayakpa ke akan̄kan̄, mmọ eke ẹdude ke obio, akan̄ ye idiọk udọn̄ọ ẹyedia mmọ.+
16 Ndien ikọt mmọ emi ẹfehede ẹbọhọ ẹyebọhọ+ ẹkedu ke ikpọ obot nte mme ibiom emi ẹdude ke mme itịghede,+ kpukpru mmọ ẹnyụn̄ ẹseme, owo kiet kiet ke ndudue esie.
17 Koro kpukpru ubọk ẹmemde;+ kpukpru edọn̄ ẹnyụn̄ ẹtọide mmọn̄.+
18 Ndien mmọ ẹmesịne ọfọn̄ ntuan̄a,+ idem omonyụn̄ enyek mmọ;+ ndien bụt omofụk kpukpru iso,+ kpukpru ibuot mmọ ẹmenyụn̄ ẹkwọhọ ibọ.+
19 “‘Mmọ ẹyetomo silver mmọ ẹduọn̄ọ ke efak, gold mmọ oyonyụn̄ akabade n̄kpọ itekesịt. Silver mmọ m̀mê gold mmọ idikemeke ndinyan̄a mmọ ke usen ifụtesịt Jehovah.+ Mmọ idiyụhọke ukpọn̄ mmọ, idinyụn̄ iyọhọke nsia mmọ, koro enye amakabade edi n̄kpọ iduọ emi anamde mmọ ẹdue.+
20 Ndien ediye n̄kpọmbana owo—owo amanam enye edi ntak ntan̄idem; mmọ ẹmeda enye ẹnam mme mbubiam mbiet+ mmọ, mme n̄kpọ itekesịt+ mmọ. Oro edi ntak emi ndinamde enye akabade edi n̄kpọ itekesịt ọnọ mmọ.+
21 Ndien nyayak enye nsịn ke ubọk isenowo nte n̄kpọ mbụme nnyụn̄ nyak nsịn ke ubọk mme idiọkowo ke isọn̄ nte n̄kpọ n̄wo,+ mmọ ẹyenyụn̄ ẹsabade enye.
22 “‘Ndien nyọwọn̄ọde iso mi n̄kpọn̄ mmọ,+ mmọ ẹyenyụn̄ ẹsabade ndedịbe ebiet mi, ndien mbon n̄wo ẹyedi ẹdisabade enye.+
23 “‘Nam n̄kpọkọbi,+ koro ikpe iyịp+ ọmọyọhọ isọn̄, afai omonyụn̄ ọyọhọ obio.+
24 Ndien ami nyada ata mme idiọkowo ke otu mme idụt ndi,+ ndien mmọ ẹyeda mme ufọk mmọ ẹnyene,+ ami nyonyụn̄ nnam ntan̄idem n̄kpọsọn̄ owo etre,+ ndien ẹyesabade ndisana ebiet mmọ.+
25 Ndutụhọ eyedi, ndien mmọ ẹyeyom emem edi ididụhe.+
26 Afanikọn̄ eyetiene afanikọn̄,+ mbụk etiene mbụk, mme owo ẹyenyụn̄ ẹka ẹkebụp prọfet n̄kukụt,+ ndien ibet ayatak ke ubọk oku, item oyonyụn̄ atak ke ubọk n̄kani iren.+
27 Edidem oyodu ke mfụhọ;+ ọbọn̄ n̄ko eyesịne nsobo ke idem,+ ubọk oyonyụn̄ enyek mbio obio. Nyanam ye mmọ nte ekemde ye usụn̄ mmọ,+ nyonyụn̄ nda ubiereikpe mmọ mbiere ikpe nnọ mmọ;+ ndien mmọ ẹyefiọk ẹte ke ami ndi Jehovah.’”+
