Ezra 3;1-13
3 Ke ọyọhọ ọfiọn̄ itiaba+ nditọ Israel ẹkedu ke mme obio mmọ. Ndien mbio obio ẹsop idem nte owo kiet+ ke Jerusalem.+
2 Ntem Jeshua+ eyen Jehozadak ye nditọete esie kpa mme oku ye Zerubbabel+ eyen Shealtiel+ ye nditọete esie ẹdaha ẹda ẹbọp itieuwa Abasi Israel, man ẹfọp mme edifọp uwa ke esịt, nte ekemde ye se ẹwetde+ ke ibet Moses owo ata Abasi.
3 Ntre mmọ ẹsọn̄ọ ẹwụk itieuwa ke itie esie,+ koro ndịk akanamde mmọ ke ntak mbio obio,+ mmọ ẹnyụn̄ ẹwa mme edifọp uwa do ẹnọ Jehovah, kpa mme edifọp uwa usenubọk ye eke mbubreyo.+
4 Ekem mmọ ẹnịm usọrọ mme ataya+ nte ekemde ye se ẹkewetde,+ ẹnyụn̄ ẹfọp edifọp uwa ke usen ke usen nte ekemde ye ibat emi ẹyomde ke usen kiet kiet.+
5 Ndien ke oro ebede, ẹwa edifọp uwa+ ofụri ini ye eke obufa ọfiọn̄+ ye eke kpukpru ndisana ini usọrọ+ Jehovah ye eke kpukpru owo emi ẹdade enọ unyịmesịt+ ẹsọk Jehovah ke edinyịme esịt.
6 Ọtọn̄ọde ke akpa usen ke ọyọhọ ọfiọn̄+ itiaba ka iso, mmọ ẹtọn̄ọ ndiwa mme edifọp uwa nnọ Jehovah, ke ini owo mîkam isịnke kan̄a itiat idakisọn̄ temple Jehovah.
7 Ndien mmọ ẹnọ mme asiak-itiat+ ye mme anamutom usọ+ okụk,+ ẹnyụn̄ ẹnọ mbon Sidon+ ye Tyre+ se ẹdiade+ ye se ẹn̄wọn̄de ye aran,+ ẹte ẹda eto cedar ke Lebanon+ ẹdi akpa Joppa,+ kpa nte Cyrus+ edidem Persia ọkọnọde mmọ unyịme.
8 Ndien ke ọyọhọ isua iba ke mmọ ẹma ẹkedi ufọk ata Abasi ke Jerusalem, ke ọyọhọ ọfiọn̄ iba,+ Zerubbabel+ eyen Shealtiel+ ye Jeshua+ eyen Jehozadak ye nditọete mmọ eken, mme oku ye nditọ Levi, ye kpukpru mbon oro ẹketode ntan̄mfep+ ẹdi Jerusalem ẹtọn̄ọ utom; ndien mmọ ẹnịm nditọ Levi+ ọtọn̄ọde ke owo isua edịp dọk ẹte ẹse ẹban̄a utom ufọk Jehovah.+
9 Ntem Jeshua,+ nditọ esie ye nditọete esie, ye Kadmiel ye nditọ esie, nditọ Judah, ẹdaha ẹda nte otu kiet man ẹdi mme eseutom ẹnọ mme andinam utom ufọk ata Abasi, n̄ko ye nditọ Henadad,+ nditọ mmọ ye nditọete mmọ, nditọ Levi.
10 Ke ini mme andibọp ufọk ẹsịnde itiat idakisọn̄+ temple Jehovah, mme oku emi ẹsịnede ọfọn̄+ oku, ẹnyụn̄ ẹkamade mme obukpon̄,+ ye nditọ Levi kpa nditọ Asaph,+ emi ẹkamade usan n̄kukwak,+ ẹdaha ẹda ẹtoro Jehovah kpa nte David edidem Israel eketemede.+
11 Ndien mmọ ẹtiene ẹkwọ ikwọ ẹtoro+ ẹnyụn̄ ẹkọm Jehovah, “koro enye ọfọnde,+ koro ima-mfọnido esie emi enye owụtde Israel odude ke nsinsi.”+ Ndien kpukpru owo ẹfiori akwa mfiori+ ẹtoro Jehovah ke emi mmọ ẹsịnde itiat idakisọn̄ ufọk Jehovah.
12 Ndien ediwak mme oku+ ye nditọ Levi ye mme etubom ke mme ufọk mme ete,+ kpa mbiowo emi ẹkekụtde akpa ufọk+ oro, ẹtua eyet+ ke ọkpọsọn̄ uyo ke adan̄aemi mmọ ẹkụtde nte ẹsịnde itiat idakisọn̄+ ufọk emi, ke ini ediwak mbon eken ẹmenerede uyo mmọ ẹsio n̄kpo idara.+
13 Ntem mme owo ikemeke ndidiọn̄ọ eke edide uyom idara+ ye eke edide uyom ntuan̄a, koro mme owo ẹkefioride ọkpọsọn̄ mfiori, ndien ẹda ke ata anyan ebiet ẹkop uyom oro.
