Galatia 6;1-18
6 Nditọete, okposụkedi owo odụkde idiọk afan̄+ mbemiso enye ọfiọkde aban̄a emi, mbufo emi ẹdotde ke n̄kan̄ eke spirit,+ ẹdomo ndinen̄ede utọ owo oro ke ifụre ifụre ido,+ nte mbufo owo kiet kiet n̄ko ẹtịn̄de enyịn ke idem mbufo,+ mbak ẹdidomo mbufo n̄ko.+
2 Ẹka iso ẹbiom mfịghe+ kiet eken, ndien ntem ke mbufo ẹdinịm ibet Christ.+
3 Koro edieke owo ekededi ekerede ke imọ idi n̄kpọ ke ini enye mîdịghe n̄kpọ,+ enye ababian̄a idem.
4 Edi yak owo kiet kiet owụt se utom esie edide,+ ndien adan̄aoro enye eyenyene ntak ndidat esịt mban̄a idemesie, idịghe ke ndimen idem ndomo+ ye owo en̄wen.
5 Koro owo kiet kiet oyobiom mbiomo idemesie.+
6 Akan oro, yak owo ekededi eke ẹkpepde+ enye ikọ Abasi abuana+ kpukpru nti n̄kpọ ye owo oro ọnọde enye utọ ukpep oro.+
7 Ẹkûyak ẹtụn mbufo usụn̄:+ Owo ikemeke ndibian̄a Abasi.+ Koro se ededi eke owo ọtọde, oro ke enye edinyụn̄ ọdọk;+
8 koro owo eke ọtọde ọnọ obụkidem ọyọdọk mbiara oto obụkidem,+ edi owo emi ọtọde ọnọ spirit+ ọyọdọk nsinsi uwem oto spirit.+
9 Ntre ẹyak nnyịn ikûkpa mba ke edinam eti n̄kpọ,+ koro ke edikem ini nnyịn iyọdọk mbun̄wụm edieke nnyịn mîkpaha mba.+
10 Mmọdo, adan̄a nte inyenede ifet,+ ẹyak nnyịn inam se ifọnde inọ kpukpru owo, edi akpan akpan mmọ emi ẹbuanade n̄kpọ ye nnyịn ke mbuọtidem.+
11 Ẹse utọ ikpọ abisi eke ndade n̄wet leta emi ke ubọk mi nnọ ẹsọk mbufo.+
12 Kpukpru mbon oro ẹyomde uma enyịn owo ẹdi mbon oro ẹdomode ndinyịk mbufo ẹte ẹna mbobi,+ mbak ẹdikọbọ mmọ ke ntak eto ndutụhọ Christ,+ Jesus.
13 Koro mbon emi ẹnade mbobi inịmke Ibet,+ edi mmọ ẹyom mbufo ẹna mbobi man mmọ ẹnyene ntak ndida mbụre mbụre ke obụkidem mbufo.
14 Nsa mi-o ndibụre mbụre, ibọhọke ke eto ndutụhọ+ Ọbọn̄ nnyịn Jesus Christ, emi otode ke enye ẹkọn̄ ererimbot ke eto ẹnọ mi+ ẹnyụn̄ ẹkọn̄ mi ke eto ẹnọ ererimbot.
15 Koro mbobi idịghe n̄kpọ, editre ndina mbobi+ inyụn̄ idịghe n̄kpọ, edi ndidi obufa edibotn̄kpọ+ edi n̄kpọ.
16 Ndien emem ye mbọm ẹkpekam ẹdu ye kpukpru mbon oro ẹditịmde ẹsan̄a ke ibet ido uwem emi, kpa Israel Abasi.+
17 Mmọdo yak owo ndomokiet okûfịna mi, koro nnyenede idiọn̄ọ+ ke idem nte ofụn Jesus.+
18 Nditọete, mfọnido Ọbọn̄ nnyịn Jesus Christ oro owo mîdotke akpakam odu ye edu+ emi mbufo ẹwụtde. Amen.
