Genesis 15;1-21
15 Ke n̄kpọ emi ẹma ẹkebe, Jehovah ọdọhọ Abram ke n̄kukụt,+ ete: “Abram, kûfehe ndịk.+ Ami ndi otuekọn̄ fo.+ Utịp fo oyokpon etieti.”+
2 Ndien Abram obụp ete: “Jehovah, Akakan Ọbọn̄ Andikara, nso ke afo edinọ mi, ke emi mmenyeneke eyen, ndien owo eke edidade ufọk mi enyene edi Eliezer+ owo Damascus?”
3 Ndien Abram adian do ete: “Sese! Afo unọhọ mi baba mfri+ kiet, ndien, sese! eyen+ ufọk mi ayakabade edi adiakpa mi.”
4 Edi, sese! Jehovah ọdọhọ enye ete: “Idịghe owo emi edidi adiakpa ufọk fo, edi enye emi editode fi ke idem iwọrọ edidi adiakpa ufọk fo.”+
5 Ndien enye ada enye ọwọrọ an̄wa onyụn̄ ọdọhọ ete: “Mbọk, menede enyịn ke enyọn̄ nyụn̄ bat mme ntantaọfiọn̄ emi edieke ekemede ndibat mmọ.”+ Ndien ọdọhọ enye ete: “Ntem ke mfri fo editie.”+
6 Ndien enye ọbuọt idem ye Jehovah;+ enye onyụn̄ abat oro ọnọ enye ke edinen ido.+
7 Ekem enye ọdọhọ ete: “Ami ndi Jehovah emi n̄kadade fi n̄wọrọ ke Ur mbon Chaldea man nda isọn̄ emi nnọ fi enyene.”+
8 Ndien enye ọdọhọ ete: “Jehovah, Akakan Ọbọn̄ Andikara, ami ndida nso mfiọk ke nyada isọn̄ emi nnyene?”+
9 Ekem enye ọbọrọ ete: “Da abak enan̄ isua ita ye uman ebot isua ita ye okukịm erọn̄ isua ita ye mbomon̄kuku kiet ye eyen ibiom+ kiet sọk mi.”
10 Ntre enye ada kpukpru n̄kpọ emi edi onyụn̄ asiak mmọ abahade ukem ukem, mbak iba iba, onyụn̄ enịm mbak kiet ukem nte enye eken, edi enye ibahakede mme inuen.+
11 Ndien mme inuen utaokpo ẹsụhọde ẹtiene mme okpo emi,+ edi Abram ebịn mmọ efep.
12 Ekem utịn ekpere ndisụhọde, ndien ọkpọsọn̄ idap omụm Abram,+ ndien, sese! ọkpọsọn̄ ekịm oro enyenede ndịk ofụk enye.
13 Ndien enye ọdọhọ Abram ete: “Tim fiọk ete ke mfri fo eyedi esenowo ke esenidụt,+ ndien mmọ ẹyenam n̄kpọ ẹnọ idụt oro, idụt oro oyonyụn̄ efịk mmọ ke isua ikie inan̄.+
14 Edi nyekpe ikpe+ idụt oro mmọ ẹdinamde n̄kpọ ẹnọ, ekem mmọ ẹyesan̄a ye ediwak inyene ẹwọn̄ọ.+
15 Amaedi afo, afo ayakpa etiene mme ete ete fo ke emem; ndien ẹyebụk fi ke ini usọn̄.+
16 Edi ke ọyọhọ emana inan̄, mmọ ẹyenyọn̄ọ ẹdi mi,+ koro ndudue mme Amorite iyọhọke kan̄a.”+
17 Ekem utịn osop, makmak ekịm onyụn̄ ofụk isọn̄, ndien, sese! itie ubara utịm oro osiode nsụn̄ikan̄ ye nsadan̄ emi asakde ikan̄ ẹsan̄a ke ufọt mbai unam emi ẹbe.+
18 Ke usen oro ke Jehovah akanam ediomi+ ye Abram, ete: “Nyọnọ mfri fo isọn̄+ emi, ọtọn̄ọde ke akpa Egypt tutu esịm akwa akpa, kpa Akpa Euphrates:+
19 mme Kenite ye mme Kenizzite+ ye mme Kadmonite
20 ye mme Hittite+ ye mme Perizzite+ ye mme Rephaim+
21 ye mme Amorite ye mbon Canaan ye mme Girgashite ye mbon Jebus.”+
