Genesis 26;1-35
26 Ekem akan̄ odu ke idụt oro, kpa nte ekebemde iso odu ke eyo Abraham,+ tutu Isaac adaha etiene Abimelech, edidem mbon Philistia ke Gerar.+
2 Ndien Jehovah owụt enye idem onyụn̄ ọdọhọ ete:+ “Kûsụhọde uka Egypt. Dụn̄ ke isọn̄ oro ndimekde nnọ fi.+
3 Dụn̄ nte esenowo ke idụt emi,+ ndien nyodu ye afo nnyụn̄ ndiọn̄ fi, koro nyọnọ fi ye mfri fo ofụri isọn̄ emi,+ ndien nyanam se n̄kọn̄wọn̄ọde nnọ Abraham ete fo,+
4 ‘Ndien nyanam mfri fo awak nte ntantaọfiọn̄ ke ikpaenyọn̄ nyonyụn̄ nnọ mfri fo ofụri isọn̄ emi;+ ndien kpukpru mme idụt isọn̄ ẹyebọ edidiọn̄ eke otode ke mfri fo,’+
5 koro Abraham okokopde uyo mi okonyụn̄ anamde se n̄kọdọhọde, onyụn̄ okop uyo mi, enịm mme ewụhọ ye mme ibet mi.”+
6 Ntre Isaac odụn̄ ke Gerar.+
7 Ndien mbon obio oro ẹbụp ẹban̄a n̄wan esie, edi enye ọbọrọ ete: “Enye edi eyeneka mi an̄wan.”+ Koro enye okokopde ndịk ndidọhọ, “Enye edi n̄wan mi” koro, ke nditịn̄ nte enye eketịn̄de, mbak “mbon obio emi ẹdiwot mi ke ntak Rebekah,” koro enye ama eye etieti.+
8 Edikem nte enye osụk odude do, Abimelech, edidem mbon Philistia, anyan iso ke window ese an̄wa, ndien sese, enye okụt nte Isaac ebrede ima ye Rebekah n̄wan esie.+
9 Inikiet inikiet Abimelech okot Isaac ọdọhọ ete: “Ke akpanikọ, enye edi n̄wan fo! Ntem ntak emi ọkọdọhọde ete, ‘Enye edi eyeneka mi an̄wan’?” Edi Isaac ọbọrọ enye ete: “N̄ketịn̄ ntem sia n̄kefehede ndịk mbak ndikpa ke ntak esie.”+
10 Edi Abimelech ete: “Nso ke afo anam emi ye nnyịn?+ Ke akpanikọ, ayak esisịt owo kiet akpadan̄ ye n̄wan fo, ndien afo akpanam nnyịn inyene ubiomikpe!”+
11 Ekem Abimelech owụk kpukpru owo, ete: “Ke akpanikọ ẹyewot owo ekededi eke otụkde owo emi ye n̄wan esie!”
12 Ekem Isaac ọtọn̄ọ ndisuan n̄kpasịp ke isọn̄ oro,+ ndien ke isua oro enye enyene udomo n̄kpasịp ikie ke kpukpru udomo n̄kpasịp kiet oro enye akasuande,+ koro Jehovah ọkọdiọn̄de enye.+
13 Ndien enye okpon onyụn̄ ọdọdiọn̄ oforo, enen̄ede okpon onyụn̄ enyene n̄kpọ etieti.+
14 Ndien enye enyene ediwak erọn̄ ye enan̄ ye ata ediwak mme asan̄autom,+ tutu mbon Philistia ẹtọn̄ọ ndisịn enye enyịn.+
15 Ndien mbon Philistia ẹdọn̄ ntan ẹsịri kpukpru mme obube mmọn̄+ oro mme asan̄autom ete esie ẹketịbide ke eyo Abraham ete esie.+
16 Ekem Abimelech ọdọhọ Isaac ete: “Wọrọ ke mbọhọ nnyịn, koro afo ọmọsọn̄ odudu akan nnyịn.”+
17 Ntem Isaac ọwọrọ ọkpọn̄ do akanam itienna ke itịghede mmọn̄ Gerar+ onyụn̄ odụn̄ do.
18 Ndien Isaac ọtọn̄ọ ntak etịbi mme obube mmọn̄ oro mmọ ẹketịbide ke eyo Abraham, ete esie, edi emi mbon Philistia ẹkesịride ke Abraham ama akakpa;+ ndien enye afiak okot mmọ enyịn̄ oro ete esie okokotde mmọ.+
19 Ndien mme asan̄autom Isaac ẹtịbi itịghede mmọn̄ emi tutu mmọ ẹkekụt obube emi eti mmọn̄ odude.
20 Ndien mme ekpemerọn̄ Gerar ẹtọhọ ye mme ekpemerọn̄ Isaac,+ ẹdọhọ ẹte: “Obube mmọn̄ emi edi eke nnyịn!” Ntem enye okot obube mmọn̄ oro Esek, koro mmọ ẹketọhọde ye enye.
21 Ekem mmọ ẹtịbi obube mmọn̄ efen, ndien mmọ ẹfiak ẹtọhọ ẹban̄a enye. Ntem enye okot enye oro Sitnah.
22 Ekem enye ọwọrọ ọkpọn̄ do onyụn̄ eketịbi obube mmọn̄ efen,+ edi mmọ itọhọke aba iban̄a enye emi. Ntem enye okot enye Rehoboth onyụn̄ ọdọhọ ete: “Ke emi Jehovah ọmọnọ nnyịn ebiet oro okponde,+ omonyụn̄ anam nnyịn itọt ke isọn̄.”+
23 Ekem enye oto do ọdọk aka Beer-sheba.+
24 Ndien Jehovah owụt enye idem ke okoneyo oro onyụn̄ ọdọhọ ete: “Ami ndi Abasi Abraham usọ.+ Kûfehe ndịk,+ koro ami ndude ye afo, nyọdiọn̄ fi nnyụn̄ nnam mfri fo ọtọt ke ntak Abraham, asan̄autom mi.”+
25 Ndien enye ọbọp itieuwa do onyụn̄ okot enyịn̄ Jehovah+ onyụn̄ owụk tent esie do,+ ndien mme asan̄autom Isaac ẹtịbi obube mmọn̄ do.
26 Ekem Abimelech asan̄a ye Ahuzzath akpan ufan esie ye Phicol etubom mbonekọn̄ esie+ ẹto Gerar ẹdi ẹtiene enye.
27 Ndien Isaac ọdọhọ mmọ ete: “Ntak emi mbufo ẹdide ẹtiene mi, ke emi mbufo ẹsuade mi tutu ẹbịn mi ẹfep ke mbọhọ mbufo?”+
28 Ndien mmọ ẹbọrọ ẹte: “Nnyịn imenen̄ede ikụt ke Jehovah omodu ye afo.+ Ntem nnyịn idọhọ ite, ‘Mbọk yak nnyịn ida un̄wọn̄ọ,+ yak nnyịn inyụn̄ inam ediomi ye afo,+
29 ite ke afo udunamke nnyịn idiọk ukem nte nnyịn mînamke fi idiọk, kpa nte inamde eti kpọt ye afo, inyụn̄ inọde fi ọnyọn̄ ke emem.+ Ndien ke emi Jehovah ọmọdiọn̄ fi.’”+
30 Ekem enye esịn usọrọ ọnọ mmọ, ndien mmọ ẹdia udia ẹnyụn̄ ẹn̄wọn̄ n̄kpọ.+
31 Ndien mmọ ẹbak ẹdemede ke usenubọk ẹda un̄wọn̄ọ.+ Ekem Isaac osio mmọ unyọn̄ ndien mmọ ẹnyọn̄ọ ke emem.+
32 Ndien ke usen oro, mme asan̄autom Isaac ẹdisian enye ẹban̄a obube mmọn̄ oro mmọ ẹketịbide,+ ẹnyụn̄ ẹdọhọ ẹte: “Nnyịn imokụt mmọn̄!”
33 Ntem enye okot obube emi Shibah. Ntak edi oro ẹkotde obio oro Beer-sheba+ tutu esịm mfịn emi.
34 Ndien Esau esịm isua aba. Ekem enye ọdọ Judith eyen Beeri, eyen Hittite, ye Basemath eyen Elon, eyen Hittite.+
35 Ndien nditọiban emi ẹnam uwem odorode Isaac ye Rebekah.+
