Genesis 39;1-23
39 Ekem ẹda Joseph ẹsụhọde ẹka Egypt,+ ndien Potiphar,+ eyen Egypt, emi edide adaidaha ke okụre Pharaoh onyụn̄ edide etubom mbon ukpeme, edep enye oto nditọ Ishmael+ emi ẹkedade enye ẹsụhọde ẹka do.
2 Edi Jehovah odu ye Joseph, enye onyụn̄ edi owo oro okụtde unen+ onyụn̄ akabade edi andise mban̄a ufọk eteufọk esie, kpa eyen Egypt.
3 Ndien eteufọk esie okụt ete ke Jehovah odu ye enye ye nte ke Jehovah amanam kpukpru se enye anamde okụt unen ke ubọk esie.
4 Ndien Joseph ọdọdiọn̄ okụt mfọn ke iso eteufọk esie onyụn̄ asan̄a utom ọnọ enye, oro esịn enye emekde Joseph ndise mban̄a ufọk esie,+ onyụn̄ ayakde kpukpru inyene esie esịn enye ke ubọk.
5 Ndien ọtọn̄ọde ke ini oro enye emekde Joseph nte andise mban̄a ufọk esie onyụn̄ enịmde enye ete ese aban̄a kpukpru se imọ inyenede, Jehovah ọdiọn̄ ufọk eyen Egypt oro ke ntak Joseph, Jehovah onyụn̄ ọdiọn̄ kpukpru se enye enyenede ke ufọk ye ke in̄wan̄.+
6 Ekem enye ayak kpukpru inyene esie esịn Joseph ke ubọk;+ inyụn̄ ifiọkke kpukpru se isịnede enye ke ubọk ke mîbọhọke udia emi enye adiade. Akan oro, Joseph ọkọri eye idem onyụn̄ eye iso.
7 Edikem ke n̄kpọ emi ama ekebe, n̄wan eteufọk esie ọtọn̄ọ ndimenede enyịn+ nse Joseph onyụn̄ ọdọhọ ete: “Di didan̄ ye ami.”+
8 Edi enye esịn+ onyụn̄ ọdọhọ n̄wan eteufọk esie ete: “Sese, eteufọk mi ifiọkke se idude ye ami ke ufọk emi, enye omonyụn̄ ayak kpukpru inyene esie esịn mi ke ubọk.+
9 Idụhe baba owo kiet eke okponde ke ufọk emi akan mi, enye inyụn̄ isịnke mi baba n̄kpọ kiet ke mîbọhọke fi, koro afo edide n̄wan esie.+ Ntre n̄keme didie ndinam utọ akwa idiọkn̄kpọ emi nnyụn̄ ndue Abasi?”+
10 Ntre enye ọdọhọ Joseph kwa usen kwa usen edi enye inyịmeke ndidan̄ ye enye, nnyụn̄ ndu ye enye.+
11 Edikem ke usen kiet Joseph odụk esịtufọk ndinam utom nte akam esinamde ke mme usen eken, nditọ ufọk ndomokiet ikonyụn̄ idụhe ke ufọk.+
12 N̄wan oro omụm enye ọfọn̄idem,+ ete: “Di didan̄ ye ami!”+ Edi enye ọkpọn̄ ọfọn̄idem esie ke ubọk n̄wan oro efehe ọwọrọ an̄wa.+
13 Ntre ke adan̄aemi enye okụtde ete ke Joseph ama ọkpọn̄ ọfọn̄idem esie ke ubọk imọ efehe ọwọrọ an̄wa,
14 enye ọtọn̄ọ ndifiori n̄kot nditọ ufọk esie onyụn̄ ọdọhọ mmọ ete: “Sese! Enye akada eyen Hebrew emi ọsọk nnyịn ndinam nnyịn ikabade idi n̄kpọ nsahi. Enye ekedi ndidan̄ ye ami, edi mfiori n̄kpo.+
15 Ndien ke ini enye okopde nte mmenerede uyo mfiori, enye ọkpọn̄ ọfọn̄idem esie ye ami efehe ọwọrọ an̄wa.”
16 Ndien enye enịm ọfọn̄idem oro ke n̄kan̄ esie tutu eteufọk esie ọnyọn̄ edi.+
17 Ekem enye etịn̄ ọnọ ebe esie, ete: “Ofụn Hebrew emi akadade ọsọk nnyịn ama edi ndinam mi ndi n̄kpọ nsahi.
18 Edi ke ndondo oro mmenerede uyo mfiori, enye ọkpọn̄ ọfọn̄idem esie ke n̄kan̄ mi efehe ọwọrọ an̄wa.”+
19 Ke adan̄aemi eteufọk esie okopde se n̄wan esie etịn̄de ọnọ enye, ete: “Ntem ye ntem ke ofụn fo akanam ye ami,” esịt ayat enye.+
20 Ntre eteufọk Joseph omụm enye esịn ke ufọk-n̄kpọkọbi, emi mbon n̄kpọkọbi edidem ẹdude, ndien enye odu do ke ufọk-n̄kpọkọbi.+
21 Edi Jehovah odu ye Joseph onyụn̄ owụt enye ima-mfọnido, onyụn̄ anam enye okụt mfọn ke iso etubom ufọk-n̄kpọkọbi.+
22 Ntre etubom ufọk-n̄kpọkọbi oro ayak kpukpru mbon n̄kpọkọbi emi ẹkedude ke ufọk-n̄kpọkọbi esịn Joseph ke ubọk; edi enye okonyụn̄ anam ẹnam kpukpru se ẹkenamde do.+
23 Etubom ufọk-n̄kpọkọbi oro isehe baba n̄kpọ kiet emi esịnede Joseph ke ubọk, koro Jehovah odude ye Joseph, Jehovah onyụn̄ anam se enye anamde okụt unen.+
