Habakkuk 2;1-20
2 Ami nyada ke itie ukpeme mi,+ nyonyụn̄ ndoro ke ibibene ukpeme; ndien nyekpeme,+ man n̄kụt se enye edidade mi etịn̄+ ye se ndibọrọde ke nsuannọ oro enye edinọde mi.+
2 Ndien Jehovah ọbọrọ mi, onyụn̄ ọdọhọ ete: “Wet n̄kukụt emi nịm, nyụn̄ wet enye in̄wan̄-in̄wan̄ sịn ke itiatn̄wed,+ man andikot okpokot enye udọn udọn.+
3 Koro n̄kukụt emi anade ọnọ ini emi ẹnịmde,+ enye ayawara esịm utịt, idinyụn̄ isụhu nsu. Enye ekpebebịghi, bet enye; koro enye mîditreke ndisu.+ Enye idibehe ini.
4 “Sese! Ukpọn̄ esie amatan̄ idem;+ enye inenke. Edi edinen owo edidu uwem oto ke mbuọtidem esie.+
5 Koro wine abian̄ade abian̄a,+ anam owo okohode idem;+ ndien ikemeke ndinam uduak esie,+ enye anam ukpọn̄ esie an̄wan̄a nte Udi,* emi etiede nte n̄kpa emi mîkopke uyụhọ.+ Enye onyụn̄ atan̄ kpukpru mme idụt obon ọtọkiet, onyụn̄ ọkọ kpukpru owo ọnọ idemesie.+
6 Nte kpukpru mmọ emi iditohoke ufiet idinyụn̄ itịn̄ke ebetọ ikọ,+ kpa ekpọhọikọ iban̄a enye? Ndien owo ọyọdọhọ, ete,
“‘Mbọm owo eke ọkọde ediwak n̄kpọ eke mînyeneke enye+—O adan̄a didie!+—onyụn̄ anamde isọn emi enye akamade odobi akan enye!
7 Nte mbon oro ẹdiade udori ẹto fi ididahake ke enyọn̄ ke mbuari, nte mmọ eke ẹtuakde fi afai afai idinyụn̄ idemekede, ndien afo akabade edi n̄kpọ mbụme ọnọ mmọ?+
8 Koro afo okobụmede ediwak idụt, kpukpru mme idụt eke ẹsụhọde ẹyenyụn̄ ẹbụme fi+ ke ntak iyịp ubonowo eke ẹduọkde ye afai eke odude ke isọn̄, ke obio ye ke otu kpukpru mme andidụn̄ ke esịt.+
9 “‘Mbọm owo eke ọkọde idiọk udori ọnọ ufọk esie,+ man emen efọk esie okodori ke enyọn̄, man onyụn̄ ọbọhọ afanikọn̄!+
10 Afo amaduak n̄kpọ o-bụt ọnọ ufọk fo, omonyụn̄ esịbe ediwak owo efep;+ ukpọn̄ fo onyụn̄ anam idiọkn̄kpọ.+
11 Koro itiat eyesịne ke ibibene eseme, ndori ọkọmufọk oyonyụn̄ esịne ke ọkọm ọbọrọ.+
12 “‘Mbọm owo eke adade iyịp ọbọp obio, onyụn̄ ọsọn̄ọde owụk obio ke ukwan̄ido!+
13 Sese! Nte idịghe Jehovah mme udịm anam mme owo ẹkpa utom ẹnọ edemeikan̄, onyụn̄ esịn mme obio ẹkpa mba ke ikpîkpu?+
14 Koro ifiọk ubọn̄ Jehovah ọyọyọhọ isọn̄ kpa nte mmọn̄ ofụkde inyan̄.+
15 “‘Mbọm owo eke ọnọde mme nsan̄a esie n̄kpọ ẹn̄wọn̄, eke abuakde ifụtesịt ye iyatesịt,+ man anam mmọ ẹn̄wọn̄ ẹkpa, man enye okụt mmọ iferi.+
16 Afo udûtreke ndidia esuene utu ke ndinyene ubọn̄.+ Afo n̄wọn̄ enye n̄ko,+ nyụn̄ kabade tie nte owo eke mînaha mbobi.+ Cup ubọk nnasia Jehovah ayakanade esịm fi,+ ndien ubọn̄ fo ayadia esuene;
17 koro afai emi ẹnamde Lebanon+ oyofụk fi, ye nsobo emi esobode mme unam ikọt emi esịnde idem enyek mmọ, ke ntak iyịp ubonowo ye afai emi ẹnamde ye isọn̄,+ ye obio ye kpukpru mme andidụn̄ ke esịt.+
18 Edisọi mbiet ọnọ owo nso ufọn ke ini andisọi ọsọide enye,+ editara mbiet ye nsunsu anditeme ẹnyụn̄ ẹfọn owo nso+ ke ini andibot mbiet emi ọbuọtde idem ke enye+ tutu enye anam mme abasi eke mînyeneke ufọn, emi ẹdide imụm?+
19 “‘Mbọm owo eke ọdọhọde ubak eto ete: “Demede!” onyụn̄ ọdọhọde imụm itiat ete: “Daha ke enyọn̄! Enye eyeteme”!+ Sese! Ẹfụk enye gold ye silver,+ ibifịk inyụn̄ idụhe enye ke idem.+
20 Edi Jehovah odu ke edisana temple esie.+ Mbufo ofụri isọn̄, ẹdop uyo ke iso esie!’”+
Mme Ikọ Idakisọn̄
^ Heb., “Sheol.” Se N̄w. Ik. 5.
