Habakkuk 3;1-19
3 Akam mfụhọ prọfet Habakkuk:
2 O Jehovah, mmokop etop fo.+ O Jehovah, utom fo anam mi ndịk.+
O nam ẹfiọk utom fo ke ufọt mme isua! Afo akpakam anam ẹdiọn̄ọ enye ke ufọt mme isua. Ti nditua mbọm ke ini iyatesịt.+
3 Abasi oto Teman edi, Enye emi edide Edisana oto ke Obot Paran+ edi. Seʹlah.+
Uku esie ofụk ikpaenyọn̄;+ itoro esie onyụn̄ ọyọhọ isọn̄.+
4 Ndien uyama esie ebiet un̄wana.+ Un̄wana iba ẹsiaha ke ubọk esie, ndien do ke odudu esie odu.+
5 Idiọk udọn̄ọ asan̄a enye ke iso,+ ọkpọsọn̄ ufiopidem onyụn̄ odu enye ke idak ikpat.+
6 Enye atuak ada, man akpanam isọn̄ enyen̄e.+ Enye okụt onyụn̄ anam mme idụt ẹnyek.+
Ndien nsinsi ikpọ obot ẹsuana;+ n̄kpri obot emi ẹdude ke nsinsi ẹnụhọ.+ Enye anam n̄kpọ nte ekesinamde ke eset.
7 Ndien n̄kụt nte mme tent Cushan ẹdude ke nnanenyịn. Mme ọfọn̄ tent isọn̄ Midian+ ẹnyụn̄ ẹnyek.+
8 O Jehovah, nte afo ayat esịt ye akpa mmọn̄,+ m̀mê afo ofụt esịt ye inyan̄ibom?+ Koro afo akawatde ke mme enan̄-mbakara+ fo; mme chariot fo ẹnyụn̄ ẹnọ edinyan̄a.+
9 Ẹmefụhọde mme utịgha fo iferi.+ Ẹtịn̄ se afo ọkọn̄wọn̄ọde ọnọ mme esien.+ Seʹlah. Afo ada mme akpa mmọn̄ abahade isọn̄.+
10 Ikpọ obot ẹkụt fi; mmọ ẹdu ke ọkpọsọn̄ ubiak.+ Edịm ukwọ emi asiakde obuma edep ebe. Udem onyụn̄ osioro uyo.+ Enye emenede ubọk esie ke enyọn̄.
11 Utịn—ọfiọn̄—ẹtuak ẹda+ ke edikon̄ ebietidụn̄.+ Mme idan̄ fo ẹsan̄a nte un̄wana.+ Emịnen̄mịnen̄ emi otode eduat fo ọnọ un̄wana.+
12 Afo ada ifụtesịt fo asan̄a akanade isọn̄. Afo emedịghi mme idụt ke iyatesịt fo.+
13 Afo ọwọrọ edi man edinyan̄a ikọt fo,+ man anyan̄a enye emi afo eyetde aran. Afo anuak etubom ufọk idiọkowo n̄ken̄e n̄ken̄e.+ Ẹfụhọde ọtọn̄ọde ke itiat idakisọn̄ tutu esịm ọkọm.+ Seʹlah.
14 Afo ada mme esan̄ esie ekịm+ mbonekọn̄ esie ibuot ke ini mmọ ẹbụmerede ẹte isuan mi.+ Akwa idatesịt mmọ ebiet eke mbon oro ẹyomde ndita owo ukụt ke ebiet udịbe.+
15 Afo ada mme enan̄-mbakara fo asan̄a ke inyan̄ ebe, asan̄a ke akamba mmọn̄ ebe.+
16 N̄kop, ndien idịbi mi anam uyom; uyom esie anam n̄kpọkinua mi enyek; mme ọkpọ mi ẹyap;+ idaha mi anam esịt etịmede mi, ndien nyetie sụn̄ mbet usen nnanenyịn,+ ntie mbet ini emi enye edidọkde ebịne mme owo,+ man enye an̄wana ye mmọ.
17 Idem edieke eto fig etrede ndisehe,+ vine onyụn̄ etrede ndin̄wụm mbun̄wụm; utom emi ẹnamde ke eto olive onyụn̄ okpude, in̄wan̄ mînyụn̄ inọhọ udia;+ erọn̄ mînyụn̄ idụhe aba ke ufọkerọn̄, enan̄ mînyụn̄ idụhe aba ke ufọk enan̄;+
18 Amaedi ami, nyadat esịt ke Jehovah;+ ami nyadara ke Abasi edinyan̄a mi.+
19 Jehovah Akakan Ọbọn̄ Andikara edi odudu mi;+ ndien enye ayanam ukot mi ọsọp nte eke uman edop,+ onyụn̄ anam mi nsan̄a ke mme edikon̄ ebiet.+
