Haggai 1;1-15
1 Ke ọyọhọ isua iba emi Darius akarade nte edidem,+ ke ọyọhọ ọfiọn̄ itiokiet, ke akpa usen ke ọfiọn̄ oro, uyo Jehovah oto prọfet Haggai+ esịm Zerubbabel+ eyen Shealtiel+ kpa andikara Judah,+ onyụn̄ esịm Joshua+ eyen Jehozadak+ akwa oku, ete:
2 “Ntem ke Jehovah mme udịm+ ọdọhọ ete, ‘Mbio emi ẹdọhọ ẹte: “Ini ikemke kan̄a, ini emi ẹkpebọpde ufọk Jehovah ikemke kan̄a.”’”+
3 Ndien uyo Jehovah oto prọfet Haggai ọdọhọ ete:
4 “Nte ini edi emi eke mbufo ẹkpedụn̄de ke mme ufọk emi ẹdade ndiye eto ẹbana,+ ke adan̄aemi ufọk emi edide n̄wụre?+
5 Ndien, ke emi, Jehovah mme udịm ọdọhọ ete, ‘Mbufo ẹtịm ẹkere usụn̄ mbufo.+
6 Mbufo ẹmetọ ediwak n̄kpasịp, edi ẹdọk esisịt.+ Ẹmedia n̄kpọ, edi ikopke uyụhọ. Ẹmen̄wọn̄ n̄kpọ, edi mbufo iyụhọke.+ Ẹmesịne ọfọn̄, edi mbufo ndomokiet ikopke ufiop; ndien owo eke ẹkpede utom ọbọ okụk esịn ke ekpat eke etịbede ndudu.’”+
7 “Ntem ke Jehovah mme udịm ọdọhọ ete, ‘Mbufo ẹtịm ẹkere usụn̄ mbufo.’+
8 “Jehovah ọdọhọ ete, ‘Mbufo ẹdọk obot ẹkeda eto ẹdi.+ Mbufo ẹnyụn̄ ẹbọp ufọk emi,+ man esịt enem mi,+ man ẹnyụn̄ ẹnọ mi ubọn̄.’”+
9 “‘Mbufo ẹkedori enyịn ndinyene ediwak, edi sese ẹnyene esisịt;+ mbufo ẹmenyụn̄ ẹda enye ẹdụk ẹdi ufọk, ndien ami mfri enye nduọn̄ọ+—ntak-a?’+ Jehovah mme udịm ọdọhọ. ‘Koro ufọk mi emi edide n̄wụre, ke adan̄aemi mbufo ẹsịnde idem ẹse ẹban̄a ufọk mbufo.+
10 Ntem ikpaenyọn̄ emetre ndinọ mbufo mbara esie, isọn̄ omonyụn̄ etre ndin̄wụm mbun̄wụm.+
11 Ndien ami n̄kot ndaeyo nnọ isọn̄, ye mme obot, ye n̄kpasịp, ye obufa wine,+ ye aran, ye se in̄wụmde ke isọn̄, ye owo, ye ufene, ye kpukpru utom ubọkowo.’”+
12 Ndien Zerubbabel+ eyen Shealtiel, ye Joshua eyen Jehozadak+ akwa oku, ye kpukpru mmọ emi ẹsụhọde ẹkop uyo Jehovah Abasi mmọ,+ ye ikọ prọfet Haggai,+ emi Jehovah Abasi mmọ ọkọdọn̄de enye; ndien kpukpru owo ẹkop ndịk ke ntak Jehovah.+
13 Ndien Haggai isụn̄utom+ Jehovah ọdọhọ mmọ kpa nte Jehovah ọkọdọn̄de enye,+ ete: “‘Ami ndodu ye mbufo,’+ ntem ke Jehovah ọdọhọ.”
14 Ndien Jehovah edemede spirit+ Zerubbabel eyen Shealtiel andikara Judah, ye spirit Joshua+ eyen Jehozadak akwa oku, ye spirit kpukpru owo emi ẹsụhọde; ndien mmọ ẹdụk ẹkenam utom ke ufọk Jehovah mme udịm, kpa Abasi mmọ.+
15 Emi ekedi ke ọyọhọ usen edịp ye inan̄ ke ọyọhọ ọfiọn̄ itiokiet, ke ọyọhọ isua iba emi Darius+ akarade nte edidem.
