Hosea 5;1-15
5 “Mbufo mme oku+ ẹkop ikọ emi, mbufo ufọk Israel ẹnyụn̄ ẹtịn̄ enyịn, mbufo ufọk edidem+ ẹkpan̄ utọn̄, koro ikpe emi aban̄a mbufo; mbufo ẹmekabade ẹdi afia+ ẹnọ Mizpah ye iyịre emi ẹtopde ẹfụk Tabor.+
2 Mbon oro ẹwahade ẹkpọn̄ usụn̄ ẹmeduọ ẹnyịne ke uduọkiyịp,+ edi mmasua nnọ kpukpru mmọ.+
3 Ami mmọfiọk Ephraim,+ Israel inyụn̄ idịbeke mi.+ O Ephraim, afo amadan̄ ye iban nte adan̄ ye mme akpara;+ Israel amasabade idemesie.+
4 Mme edinam mmọ iyakke mmọ ẹfiak ẹtiene Abasi mmọ,+ koro spirit use+ odude mmọ ke idem; ndien mmọ ifiọkke Jehovah.+
5 Ndien ntan̄idem Israel edi ntiense ke iso esie;+ ẹnyụn̄ ẹnam Israel ye Ephraim ẹtuak ukot ẹduọn̄ọ ke ndudue mmọ.+ Judah n̄ko etiene mmọ atuak ukot ọduọ.+
6 Mmọ ẹkesan̄a ye otuerọn̄ mmọ ye otu enan̄ mmọ ẹka ndiyom Jehovah, edi mmọ ikemeke ndikụt enye.+ Enye ama ọwọn̄ọde ọkpọn̄ mmọ.
7 Mmọ ẹnam n̄kpọ abian̄a abian̄a ye Jehovah,+ koro mmọ ẹbonde isen nditọ.+ Mmọ ye udeme mmọ ẹyetak ke ufan̄ ọfiọn̄ kiet.+
8 “Mbufo ẹfri nnụk+ ke Gibeah+ ye obukpon̄ ke Ramah! Ẹfiori n̄kpo ekọn̄ ke Beth-aven+—nnyịn iyetiene fi O Benjamin!+
9 O Ephraim, afo ayakabade edi n̄kpọ n̄kpaidem ke usen eke ẹdisuade ẹnọ fi.+ Mmatan̄a akpanikọ nnọ mme esien Israel.+
10 Mbọn̄ Judah ẹmekabade ẹtie nte mbon oro ẹsịkde adan̄a.+ Nyan̄wan̄a ifụtesịt mi nduọk mmọ ke idem nte mmọn̄.
11 Ẹmefịk Ephraim, ẹmenyụn̄ ẹtụk enye ke ikpe,+ koro enye amade ndidian idem ye asua esie.+
12 Ndien ami n̄ketie nte utan̄kpọ+ nnọ Ephraim ye nte n̄wụre nnọ ufọk Judah.
13 “Ephraim ama okụt udọn̄ọ esie, Judah ama onyụn̄ okụt inia+ esie. Ndien Ephraim adaha aka Assyria+ onyụn̄ ọdọn̄ isụn̄utom ọnọ akwa edidem.+ Edi enye ikekemeke ndinam udọn̄ọ okụre mbufo,+ ikonyụn̄ ikemeke ndikọk inia mbufo.+
14 Koro nyetie nte eyen ekpe nnọ Ephraim+ ye abak ayara ekpe nnọ ufọk Judah. Ami nyawai mbai mbai nyonyụn̄ mmen mmọ mfep, ndien baba owo kiet eke anyan̄ade ididụhe.+
15 Nyaka, nyafiak ke ọtọ mi tutu mmọ ẹbiom ubiomikpe mmọ;+ ndien mmọ iditreke ndiyom iso mi.+ Ke ini mmọ ẹdude ke nnanenyịn,+ mmọ ẹyeyom mi.”+
