Hosea 7;1-16
7 “Ke ini ndomode ndikọk unan Israel,+ ndudue Ephraim ayarade,+ ye ukwan̄n̄kpọ Samaria;+ koro mmọ ẹnamde abian̄a,+ inọ onyụn̄ obụn̄de odụk; otu mbon n̄wo ẹbụmede ẹwo n̄wo ke an̄wa.+
2 Ndien mmọ ikereke ke esịt+ mmọ ite ke nyeti kpukpru idiọkn̄kpọ mmimọ.+ Ke emi idiọkido mmọ amakan mmọ okụk.+ Mmọ ẹdu mi ke iso.+
3 Mmọ ẹda idiọkn̄kpọ mmọ ẹdat edidem esịt, ẹnyụn̄ ẹda abian̄a mmọ ẹdat mbọn̄ esịt.+
4 Kpukpru mmọ ẹdi mme esịn efịbe,+ ẹnyụn̄ ẹbiet ikan̄ itie usan̄uyo emi asan̄uyo abarade, emi enye anamde etre ndisak ke ini ebuende ndomuyo tutu ebok uyo ofụt.
5 Mbọn̄ ẹmeduọ udọn̄ọ ke usen edidem nnyịn+—ifụtesịt onyụn̄ odu ke ntak wine.+ Enye etiene mbon nsahi anyan ubọk esie.
6 Koro mmọ ẹdade esịt mmọ ẹsan̄a ẹkpere nte n̄kpọ eke ẹdade ẹsan̄a ẹkpere ikan̄ itie usan̄uyo;+ enye ke asak ke esịt mmọ.+ Asan̄uyo mmọ ede idap ke ofụri okoneyo; ndien ke usenubọk itie usan̄uyo asak nte edemeikan̄.+
7 Kpukpru mmọ ẹfiop nte ikan̄ itie usan̄uyo, ẹnyụn̄ ẹta mme ebiereikpe mmọ. Kpukpru ndidem mmọ ẹmeduọn̄ọ;+ idụhe owo mmọ ndomokiet oro ofioride okot mi.+
8 “Amaedi Ephraim, enye abuak idem ye mme idụt.+ Ephraim akabade edi ekara uyo emi owo mîkabakede n̄kan̄ eken.+
9 Isenowo ẹmebọ enye odudu,+ ndien enye ifiọkke.+ N̄ko iwat ẹmetịbe ẹyọhọ enye ibuot, edi enye ifiọkke.
10 Ntan̄idem Israel edi ntiense ke iso esie,+ ndien mmọ ifiakke itiene Jehovah Abasi mmọ,+ kpukpru emi inyụn̄ inamke mmọ ẹyom enye.+
11 Ndien Ephraim etie nte ndisịme ibiom+ eke mînyeneke ifiọk.+ Mmọ ẹfiori ẹkot Egypt;+ ẹnyụn̄ ẹfehe ẹka Assyria.+
12 “Usụn̄ ekededi eke mmọ ẹsan̄ade ẹka, nyotop iyịre mi mfụk mmọ.+ Nyanam mmọ ẹduọn̄ọ nte mme edibotn̄kpọ emi ẹfede ke enyọn̄.+ Nyọnọ mmọ ntụnọ nte ekemde ye ntọt eke ẹnọde esop mmọ.+
13 Mbọm mmọ,+ koro mmọ ẹfehede ẹkpọn̄ mi!+ Nsobo eyesịm mmọ koro mmọ ẹduede mi! Edi ami n̄kafak mmọ,+ edi mmọ ẹsu nsu ẹdian mi.+
14 Mmọ ikesemeke ke esịt mmọ ikot mi iyom un̄wam,+ okposụkedi mmọ ẹnade ke bed mmọ ẹtuan̄a. Ndien mmọ ẹbiat ini ẹsụhọde ẹtie ẹta wheat ẹnyụn̄ ẹn̄wọn̄ edinem wine;+ mmọ ẹnyụn̄ ẹsọn̄ ibuot ye ami.+
15 Ndien ami ntụnọ mmọ;+ nnam ubọk mmọ ẹsọn̄,+ edi mmọ ẹduak idiọk uduak ẹban̄a mi.+
16 Ndien mmọ ẹfiak ẹtiene se mîkam ikon̄ke ikan;+ ẹnyụn̄ ẹkabade ẹtie nte utịgha oro ọkpọhọde.+ Mbọn̄ mmọ ẹyeduọn̄ọ ke iso akan̄kan̄ koro mmọ ẹdade edeme mmọ ẹsụn̄i isụn̄i.+ Ẹyeda emi ẹsak mmọ ke isọn̄ Egypt.”+
