Isaiah 10;1-34
10 Mbọm mbon oro ẹwụkde idiọk ewụhọ+ ye mbon oro ẹwetde afanikọn̄ kpukpru ini,
2 man ẹnụk mme usụhọde owo ẹfep ke ikpe ẹnyụn̄ ẹbọ mbon ukụt ke otu ikọt mi unenikpe,+ man mme ebeakpa ẹkabade ẹdi mbụme mmọ, man mmọ ẹkpenyụn̄ ẹbụme nditọakpa!+
3 Mbufo ẹdinam didie ke usen emi ẹdiwọn̄ọrede enyịn ẹse mbufo+ ye ke ini nsobo, ke ini enye otode anyan ebiet edi?+ Mbufo ẹdifehe ẹbịne anie ẹkeyom un̄wam,+ ẹdinyụn̄ ẹkpọn̄ ubọn̄ mbufo ẹnịm ke m̀mọ̀n̄,+
4 ke mîbọhọke owo ndinụhọ ke idak mbon n̄kpọkọbi, mme owo ndinyụn̄ nduọn̄ọ ke idak mbon oro ẹwotde?+ Ke ntak kpukpru emi iyatesịt esie ifiakke edem, edi enye osụk anyanyan ubọk esie.+
5 “Kamse, owo Assyria,+ eto iyatesịt mi,+ ye eto oro odude mmọ ke ubọk ndida n̄wụt ifụtesịt mi!
6 Nyọdọn̄ enye aka ebịne idụt mfiakedem,+ nyonyụn̄ nnọ enye ewụhọ ọsọk mbon emi nyatde esịt ye mmọ,+ man enye obụme ediwak mbụme onyụn̄ atan̄ ediwak n̄kpọ mbụme onyụn̄ anam enye edi ebiet emi ẹdịghide nte mbat efak.+
7 Okposụkedi enye mîtiehe ntre, ọyọdọn̄ enye ndinam ntre; okposụkedi esịt esie mîtiehe ntre, enye ayaduak ndinam, koro odude enye ke esịt ndisobo+ ndinyụn̄ nsịbe ediwak idụt mfep.+
8 Koro enye ọyọdọhọ ete, ‘Nte mbọn̄ mi idịghe ndidem n̄ko?+
9 Nte Calno+ itiehe nte Carchemish?+ Nte Hamath+ itiehe nte Arpad?+ Nte Samaria+ itiehe nte Damascus?+
10 Ke ini ubọk mi esịmde mme obio ubọn̄ oro mme abasi mmọ mînyeneke ufọn, emi ndisọi mbiet mmọ ẹwakde ẹkan mbon oro ẹdude ke Jerusalem ye ke Samaria,+
11 nte ndinamke Samaria ye mme abasi esie oro mînyeneke ufọn,+ kpa nte ndinamde ye Jerusalem ye ndisọi mbiet esie?’+
12 “Ndien ama ekem ke ini Jehovah etrede kpukpru utom esie ke Obot Zion ye ke Jerusalem, nyanam ibat mban̄a mbun̄wụm esịt emiom edidem Assyria ye ntan̄idem enyịn iseri esie.+
13 Koro enye ọdọhọde ete, ‘Nyada odudu ubọk mi ye ọniọn̄ mi nnam n̄kpọ,+ koro mmenyene ifiọk; ndien nyesịk mme adan̄a mme owo,+ nnyụn̄ mbụme mme n̄kpọ oro mmọ ẹkebonde,+ ndien nte owo emi okopde odudu, nyosụhọde mme andidụn̄ nnịm.+
14 Ukem nte ubọk esịmde efọk inuen,+ ubọk mi eyesịm inyene+ mme owo; ndien kpa nte edide ke ini owo atan̄de nsen eke ẹkpọn̄de, ami nyatan̄ ofụri isọn̄, ndien ididụhe owo eke amiade mba esie m̀mê atatde inua esie m̀mê adiaride.’”
15 Nte ekụri ekeme ndikpon n̄kan owo emi adade enye ekpi n̄kpọ, mîdịghe nte uyọkn̄kpọ ekeme ndimenede idem ke enyọn̄ n̄kan owo emi adade enye ọyọk n̄kpọ, nte n̄kpọ eke esan̄ emende andikama enye asan̄a aka iso afiak edem, nte n̄kpọ eke ọkọeto emenerede enye emi mîdịghe eto anyan ke enyọn̄? +
16 Mmọdo, ata Ọbọn̄, Jehovah mme udịm, ọyọdọdiọn̄ ọdọn̄ ndiọkidem utom ke ọtọ ikọt esie emi ẹkponde ubom,+ ndien n̄kpọ emi asakde ayasak ke idak ubọn̄ esie nte ikan̄ emi asakde.+
17 Ndien Un̄wana+ Israel ayakabade ikan̄,+ Edisana Abasi esie oyonyụn̄ akabade edemeikan̄;+ ndien enye oyobụbede asak onyụn̄ ata mbiet esie ye eto n̄kukịm+ esie ke usen kiet.
18 Ndien Enye ayanam ubọn̄ akai esie ye eke in̄wan̄ mfri esie esịm utịt,+ to ke ukpọn̄ esịm obụkidem, ndien enye ayakabade etie nte ndiọkidem owo udọn̄ọ.+
19 Ndien mme eto eken oro ẹsụhọde ke akai esie—mmọ ẹyekpri ke ibat tutu eyenọwọn̄ ekeme ndiwet mmọ nnịm.+
20 Ndien ama ekem ke usen oro, mbon Israel oro ẹsụhọde+ ye mbon ufọk Jacob oro ẹbọhọde iditọn̄ọke aba ntak iberi edem ke owo oro amiade mmọ,+ mmọ ẹdiberi edem ke Jehovah, Edisana Abasi Israel+ ke akpanikọ.+
21 Nsụhọ kpọt, kpa nsụhọ ufọk Jacob, ẹdifiak ẹnyọn̄ ẹtiene Ọkpọsọn̄ Abasi.+
22 Koro okposụkedi ikọt fo, O Israel, ẹdiwakde nte ntan inyan̄,+ nsụhọ kpọt ke otu mmọ ẹdifiak ẹnyọn̄ ẹdi.+ Nsobo+ oro ẹkebierede ọyọfiọrọ ebe ke edinen ido,+
23 koro Jehovah mme udịm, kpa Akakan Ọbọn̄ Andikara, ayada nsobo+ edi onyụn̄ anam se enye ekebierede ndinam ke ofụri isọn̄.+
24 Mmọdo ntem ke Akakan Ọbọn̄ Andikara,+ Jehovah mme udịm, ọdọhọ ete: “O ikọt mi emi ẹdụn̄de ke Zion,+ ẹkûfehe ndịk ke ntak owo Assyria, emi ekesidade eto eyịbi mbufo,+ emi ekesinyụn̄ emenerede esan̄ esie amia mbufo kpa nte Egypt akanamde.+
25 Koro osụk kan̄a ata esisịt ini—ifụtesịt+ eyesịm utịt, ndien iyatesịt mi eyesịn idem ọdiọk mmọ.+
26 Ndien Jehovah mme udịm oyofụn̄ enye ikpa+ ke iso kpa nte enye akanamde ke ini akande Midian ke akamba itiat Oreb;+ esan̄ esie oyonyụn̄ odoro ke inyan̄,+ enye oyonyụn̄ emenede enye ke enyọn̄ kpa nte enye akanamde Egypt.+
27 “Ndien ama ekem ke usen oro mbiomo esie oyodorode fi ke afara,+ ọkpọnọ esie oyonyụn̄ ọkọn̄ọde fi ke itọn̄,+ ndien ẹyebụn̄ ọkpọnọ+ oro ke ntak aran.”
28 Enye edisịm Aiath;+ enye asan̄a ebe Migron; enye obon n̄kpọ esie ke Michmash.+
29 Mmọ ẹmebe ebiet ube mmọn̄, Geba+ edi ebiet emi mmọ ẹdan̄de ke okoneyo, Ramah+ emenyek, Gibeah+ Saul emefehe.
30 O eyenan̄wan Gallim,+ fiori ke ọkpọsọn̄ uyo. O Laishah, kpan̄ utọn̄. O afo Anathoth,+ owo ukụt!
31 Madmenah emefehe. Mme andidụn̄ Gebim ẹmeyom ebiet ubọhọ.
32 Eyo ke osụk eweme ke Nob+ ndituak nda. Enye ofụn̄ ubọk esie ndisịn akamba obot eyenan̄wan Zion ndịk ke idem, kpa obot Jerusalem.+
33 Sese! Ata Ọbọn̄, Jehovah mme udịm, ke esịbe n̄kọk efep ye akamba iduọ;+ ke ẹnyụn̄ ẹsịbe mbon oro ẹkon̄de idaha, ndien ikpọ owo ẹmekabade mme usụhọde owo.+
34 Ndien enye amada n̄kpọutom ukwak etem ọtọwọk akai, owo emi okopde odudu oyonyụn̄ anam Lebanon ọduọ.+
