Isaiah 17;1-14
17 Etop emi aban̄a Damascus:+ “Sese! Ẹmenam Damascus okûdi aba akwa obio, enye omonyụn̄ akabade ibombom n̄wụre.+
2 Mme obio Aroer+ emi ẹkekpọn̄de ẹmekabade ẹdi mme ebiet emi otu ufene ẹsụhọrede ẹna, ndien idụhe owo eke anamde mmọ ẹdịghe.+
3 Ndien ẹmenam obio ibibene okûdu ke Ephraim,+ ẹnam mme obio ubọn̄ ẹkûdu ke Damascus;+ ndien mmọ oro ẹsụhọde ke Syria ẹyekabade ẹtie nte ubọn̄ nditọ Israel,” uyo Jehovah mme udịm edi emi.+
4 “Ndien ama ekem ke usen oro ubọn̄ Jacob oyosụhọde,+ ubom emi enye okokponde ayakabade ndiọkidem.+
5 Ndien ama ekem ke ini owo ukpen̄e ekpen̄ede wheat* emi ẹdade ke etak, ubọk esie onyụn̄ ekpen̄ede mbuot wheat,+ enye ayakabade etie nte owo emi atan̄de nsụhọ mbuot wheat ke unaisọn̄ itịghede Rephaim.+
6 Ndien se ẹtan̄de oyosụhọ ke esịt esie nte ke ini emi ẹyịbide eto olive: ndatndat olive iba m̀mê ita ke enyọn̄ n̄kọk; inan̄ m̀mê ition ke n̄kọk oro osion̄ode mfri,” uyo Jehovah Abasi Israel edi emi.+
7 Ke usen oro owo eyese Andinam enye, onyụn̄ owụk enyịn esie ese Edisana Abasi Israel.+
8 Ndien enye idisehe mme itieuwa,+ utom ubọk esie;+ enye idinyụn̄ iwụkke enyịn ise se nnuenubọk esie anamde, edide eto utuakibuot m̀mê mme n̄kpọ udori incense.+
9 Ke usen oro mme obio emi ẹdide n̄kpọsọn̄ ebiet esie ẹyekabade ẹtie nte ebiet oro ẹkpọn̄de ofụri ofụri ke akai, kpa n̄kọk oro mmọ ẹkpọn̄de ofụri ofụri ke ntak nditọ Israel; enye oyonyụn̄ akabade ndon.+
10 Koro afo efrede+ Abasi edinyan̄a fo;+ afo unyụn̄ utịghi Akwa Itiat+ emi edide ọkpọsọn̄ ebiet fo. Oro edi ntak emi afo ọtọde eti in̄wan̄, onyụn̄ ọtọde emịne esenowo ke esịt esie.
11 Ke uwemeyo afo eyetịm esịn ọkọ akanade in̄wan̄ fo, ndien ke usenubọk afo ayanam n̄kpasịp fo etịbe, edi ukpen̄e eyefehe ke usen udọn̄ọ ye ubiak eke owo mîkemeke ndisụk.+
12 Kop nte ediwak owo ẹsịnde editịm, ẹnyụn̄ ẹyomode nte inyan̄ oyomode! Nyụn̄ kop uyom mme idụt, emi ẹnamde uyom nte uyom akamba mmọn̄!+
13 Mme idụt+ ẹyenam uyom nte uyom ediwak mmọn̄. Enye oyonyụn̄ asua ọnọ mmọ,+ ndien mmọ ẹyefen̄e anyan usụn̄ ẹyenyụn̄ ẹsuan mmọ nte mbio ke mme obot emi ofụm asuande ye nte mbaraekpe emi ọkpọsọn̄ ofụm oyụtde.+
14 Sese! mbabuat ndịk ke mbubreyo. Etisịm usenubọk—enye idụhe aba.+ Emi edi udeme mbon oro ẹwode nnyịn ye udeme emi enyenede mbon oro ẹbụmede nnyịn.+
Mme Ikọ Idakisọn̄
^ Mîdịghe, emi ekeme ndidi “barley.”
