Isaiah 23;1-18
23 Etop emi aban̄a Tyre:+ Mbufo mme nsụn̄ikan̄ Tarshish,+ ẹtuan̄a! koro ẹmesobo enye man okûdi aba itiembehe, okûnyụn̄ edi ebiet emi ẹdụkde.+ Ke isọn̄ Kittim+ ke ẹyarade emi ẹnọ mmọ.
2 Mbufo mme andidụn̄ mbeninyan̄ ẹdop uyo. Mbonurua emi ẹtode Sidon,+ mbon oro ẹwatde ẹbe inyan̄—mmọ ẹmeyọhọ fi ke esịt.
3 Ndien n̄kpasịp Shihor,+ kpa ukpen̄e Nile, emi edide usụn̄ ukọ okụk esie, odu ke ediwak mmọn̄; enye ama onyụn̄ akabade edi udori mme idụt.+
4 Yak bụt anam fi, O Sidon;+ koro inyan̄, O afo emi edide ọkpọsọn̄ ebiet inyan̄, ọdọhọde ete: “Akanam n̄kopke ubiak uman, akanam mmanke eyen, nnyụn̄ mbọkke n̄kparawa, m̀mê mme n̄kaiferi.”+
5 Kpa nte etop oro aban̄ade Egypt,+ kpa ntre ke etop oro aban̄ade Tyre edinam mme owo ẹkop ọkpọsọn̄ ubiak.+
6 Ẹbe ẹka Tarshish; mbufo mme andidụn̄ mbeninyan̄ ẹtuan̄a.
7 Nte emi edi obio mbufo oro akadatde esịt toto ke eyo oko, toto ke ntọn̄ọ esie? Ikpat esie ama esida enye oto anyan ebiet edi man enye edidụn̄ nte esenowo.
8 Anie ebiere+ emi ọnọ Tyre, kpa andiyara owo anyanya, emi mbonurua esie ẹkedide mbọn̄, mbon mbubehe esie ẹkenyụn̄ ẹdide mmọ eke ẹdotde ukpono ke isọn̄?+
9 Jehovah mme udịm ọnọ ubiere+ emi, man asabade ntan̄idem ofụri uyai,+ man esịn kpukpru mbon oro ẹdotde ukpono ke isọn̄ ke ndek.+
10 San̄a be isọn̄ fo nte Akpa Nile, O eyenan̄wan Tarshish.+ Itiembehe nsụn̄ikan̄ idụhe aba.+
11 Enye amanyan ubọk esie ke enyọn̄ inyan̄; enye amanam mme obio ubọn̄ ẹnyek.+ Jehovah ọmọnọ ewụhọ aban̄a Phoenicia, man osobo n̄kpọsọn̄ ebiet esie.+
12 Ndien enye ọdọhọ ete: “Afo ududarake aba,+ O enye emi ẹfịkde, eyenan̄wan Sidon.*+ Daha ke enyọn̄, be ka Kittim.+ Afo udunyụn̄ unyeneke nduọkodudu do.”
13 Sese! Isọn̄ mbon Chaldea.+ Mbon emi—idịghe Assyria+—ẹkesiak enye ẹnọ mme andidụn̄ desat.+ Mmọ ẹmebọp mme tọwa ekọn̄+ mmọ; mmọ ẹmenịm mme tọwa ufọkidụn̄+ esie iferi; owo emenịm enye nte n̄wụre.+
14 Mbufo mme nsụn̄ikan̄ Tarshish ẹtuan̄a, koro ẹmesobo n̄kpọsọn̄ ebiet mbufo.+
15 Ndien ama ekem ke usen oro ẹyefre Tyre ke isua ata ye duop,+ ukem nte mme usen edidem kiet. Ke utịt isua ata ye duop, Tyre eyetie nte akpara emi ẹkwọde ke ikwọ ẹte:
16 “Men harp, san̄a kanade obio, O akpara emi ẹfrede.+ Sịn ofụri ukeme fo bre ndido; nam ikwọ fo ẹwak, man ẹkpeti fi.”
17 Ndien ama ekem ke utịt isua ata ye duop Jehovah ọyọwọn̄ọde ntịn̄enyịn esie ọnọ Tyre, enye oyonyụn̄ afiak ọbọ okụk esie+ onyụn̄ asan̄a akpara ye kpukpru mme obio ubọn̄ isọn̄ ke iso isọn̄.+
18 Ndien udori esie ye okụk esie+ ẹyekabade ẹdi ndisana n̄kpọ ẹnọ Jehovah. Owo iditan̄ke enye ibon idinyụn̄ iyakke enye inịm, koro okụk esie ayakabade edi eke mbon oro ẹdụn̄de ke iso Jehovah,+ ndida ndia n̄kpọ nyụhọ nnyụn̄ nsịne ata eti edisịnen̄kpọ.+
Mme Ikọ Idakisọn̄
^ At. Ed., “eyenan̄wan emi mîfiọkke erenowo.”
