Isaiah 36;1-22
36 Edikem ke ọyọhọ isua duopenan̄ emi Edidem Hezekiah akarade, Sennacherib+ edidem Assyria+ ọdọk edi en̄wan ye kpukpru mme obio ibibene Judah onyụn̄ akan mmọ okụk.+
2 Ndien ke akpatre edidem Assyria etie ke Lachish+ ọdọn̄ Rabshakeh+ ete asan̄a ye akwa udịmekọn̄ aka okosobo ye Edidem Hezekiah ke Jerusalem,+ ndien enye aka akatuak ada ke afan̄ mmọn̄+ ke n̄kan̄ enyọn̄ enyọn̄ n̄kpọdiọhọ mmọn̄+ ke ọkpọusụn̄ in̄wan̄ eyetọfọn̄.+
3 Ekem Eliakim,+ eyen Hilkiah, emi edide etubom mbonufọk, ye Shebna,+ ewetn̄wed ye Joah+ eyen Asaph,+ andiwet n̄kpọ nnịm,+ ẹwọrọ ẹdisobo ye enye.
4 Ntem Rabshakeh ọdọhọ mmọ ete: “Mbọk ẹdọhọ Hezekiah ẹte, ‘Ntem ke akwa edidem,+ kpa edidem Assyria,+ ọdọhọ ete: “Nso ibetedem idi emi eke afo ọbuọtde idem ke enye ntem?+
5 Afo ọdọhọ (edi, edi ikọ n̄kpọkinua) ete, ‘Mmenyene item ye odudu un̄wana ekọn̄.’+ Ndien afo ọbuọt idem ye anie eke esịnde fi ọsọn̄ ibuot ye ami?+
6 Sese! Afo ọbuọt idem ke un̄wam ọkpọ nnyanyan̄a emi anuahade,+ kpa Egypt,+ emi edide, edieke owo eberede ke enye, oyodụk enye ekaubọk onyụn̄ ekịm enye. Ntem ke Pharaoh+ edidem Egypt etie ye kpukpru mbon oro ẹbuọtde idem ye enye.+
7 Ndien edieke afo ọdọhọde mi ete, ‘Nnyịn ibuọt idem ye Jehovah Abasi nnyịn,’ nte idịghe enye ke Hezekiah okowụri+ mme edikon̄ ebiet+ ye mme itieuwa esie, ke adan̄aemi enye ọdọhọde Judah ye Jerusalem ete, ‘Mbufo ẹtuak ibuot ke iso itieuwa emi’?”’+
8 Ke emi, mbọk, mia ata+ ise ye ọbọn̄ mi, edidem Assyria,+ nyụn̄ yak mi nnọ fi enan̄-mbakara tọsịn iba man ise m̀mê afo eyekeme ndidori mme andiwat ke mmọ.+
9 Afo edikeme didie ndien ndinam andikara emi edide kiet ke otu n̄kpri-n̄kan mme asan̄autom ọbọn̄ mi afiak edem,+ ke adan̄aemi afo ọbuọtde idem ke Egypt oyom mme chariot ye mme andiwat enan̄-mbakara?+
10 Nte idịghe Jehovah ọnọ mi odudu ndidọk ndi mi man ndisobo obio emi? Jehovah ọkọdọhọ mi ete,+ ‘Dọk kan̄wana ye isọn̄ emi, nyụn̄ sobo enye.’”+
11 Ntem Eliakim+ ye Shebna+ ye Joah+ ẹdọhọ Rabshakeh ẹte:+ “Mbọk, tịn̄ ikọ ye mme asan̄autom fo ke usem Syrian,+ koro nnyịn ke ikop; kûtịn̄ ke usem mme Jew+ usịn ke utọn̄ mbon oro ẹdude ke ibibene.”+
12 Edi Rabshakeh ọdọhọ ete: “Nte ọbọn̄ mi ọkọdọn̄ mi nditịn̄ ikọ emi nnọ mbufo ye ọbọn̄ mbufo? Nte enye ikọdọn̄ke mi nditịn̄ ikọ emi nnọ mbon emi ẹtiede ke ibibene, man mmọ ẹtiene mbufo ẹdia ifuọ mmọ ẹnyụn̄ ẹn̄wọn̄ ikịm mmọ?”+
13 Ndien Rabshakeh osụk ada+ ofiori ke ọkpọsọn̄ uyo ke usem mme Jew,+ enye onyụn̄ ọdọhọ ete: “Mbufo ẹkop uyo akwa edidem, kpa edidem Assyria.+
14 Ntem ke edidem ọdọhọ ete, ‘Ẹkûyak Hezekiah abian̄a mbufo,+ koro enye ikemeke ndinyan̄a mbufo.+
15 Ẹkûnyụn̄ ẹyak Hezekiah anam mbufo ẹbuọt idem ye Jehovah,+ ọdọhọde ete: “Jehovah iditreke ndinyan̄a nnyịn.+ Owo idinyụn̄ iyakke obio emi isịn edidem Assyria ke ubọk.”+
16 Ẹkûkop se Hezekiah etịn̄de, koro ntem ke edidem Assyria ọdọhọ ete: “Mbufo ẹnam emem ye ami ẹnyụn̄ ẹwọn̄ọ ẹtiene mi,+ ndien yak owo kiet kiet adia vine esie, owo kiet kiet onyụn̄ adia fig esie,+ owo kiet kiet onyụn̄ ọn̄wọn̄ mmọn̄ obube udọn̄ mmọn̄ esie,+
17 tutu ndi ndida mbufo n̄ka isọn̄ emi ebietde isọn̄ mbufo,+ kpa isọn̄ wheat ye obufa wine, isọn̄ uyo ye mme in̄wan̄ vine;
18 mbak Hezekiah editap mbufo,+ ọdọhọ ete, ‘Jehovah ayanyan̄a nnyịn.’ Nte mme abasi mme idụt ẹma ẹnyan̄a idụt mmọ ẹsio ke ubọk edidem Assyria?+
19 Enye mme abasi Hamath+ ye Arpad?+ Enye mme abasi Sepharvaim?+ Nte mmọ ẹma ẹnyan̄a Samaria ẹsio mi ke ubọk?+
20 Ewe ke otu kpukpru mme abasi mme idụt emi ẹkenyan̄a idụt mmọ ẹsio mi ke ubọk,+ eke Jehovah akpanyan̄ade Jerusalem osio mi ke ubọk?”’”+
21 Ndien mmọ ẹsụk ẹdodop uyo inyụn̄ ibọrọke enye baba ikọ kiet,+ koro edidem okowụkde ete: “Mbufo ẹkûbọrọ enye.”+
22 Edi Eliakim,+ eyen Hilkiah, emi ekedide etubom mbonufọk,+ ye Shebna+ ewetn̄wed ye Joah+ eyen Asaph, andiwet n̄kpọ nnịm, ẹwak ọfọn̄idem+ mmọ ẹnyụn̄ ẹdi ke ọtọ Hezekiah ẹditịn̄ ẹnọ enye se Rabshakeh eketịn̄de.+
