Isaiah 48;1-22
48 Ẹkop emi, O ufọk Jacob, mbufo emi ẹkerede enyịn̄ ẹdian Israel,+ emi ẹnyụn̄ ẹwọrọde ke mmọn̄ Judah+ ẹdi, mbufo emi ẹtomode enyịn̄ Jehovah+ ẹnyụn̄ ẹkotde enyịn̄ Abasi Israel,+ edi ikotke ke akpanikọ ye ke edinen ido.+
2 Koro mmọ ẹmesio idemmọ enyịn̄ nte n̄kpọ eke ẹtode edisana obio,+ mmọ ẹmenyụn̄ ẹberi edem ke Abasi Israel,+ emi Jehovah mme udịm edide enyịn̄ esie.+
3 “Mmetịn̄ mme akpa n̄kpọ idem toto ke ini oro, mmọ ẹkenyụn̄ ẹto mi inua ẹwọrọ, ami nnyụn̄ nnam ẹkop+ mmọ. Ndien nnam n̄kpọ ke mbuari, mme n̄kpọ oro ẹnyụn̄ ẹdụk ẹdi.+
4 Sia mfiọkde nte ke afo edi owo nsọn̄ibuot+ ye nte ke esịp itọn̄ fo edi ukwak,+ ọkpọiso fo onyụn̄ edi okpoho,+
5 mma nnyụn̄ nsian fi ini oro. Mbemiso enye okodụkde edi, mma nnam fi okop,+ mbak afo ududọhọ ute, ‘Edisọi n̄kpọ mi anam mmọ, edisọi mbiet mi ye editara mbiet mi ẹwụk mmọ.’+
6 Afo omokop.+ Omokụt kpukpru.+ Amaedi mbufo, nte mbufo iditịn̄ke?+ Ami mmanam mbufo ẹkop mbufa n̄kpọ idahaemi, idem ye mme n̄kpọ oro n̄komụmde nnịm, oro mbufo mîkọfiọkke.+
7 Ẹyebot mmọ idahaemi, ndien idịghe toto ke ini oro, idem ye mme n̄kpọ oro afo mûkokopke mbemiso mfịn, mbak afo ududọhọ ute, ‘Sese! Mma mfọfiọk mmọ.’+
8 “Akan oro, afo ukopke,+ unyụn̄ ufiọkke, utọn̄ fo inyụn̄ isịrekede toto ke ini oro. Koro mmetịm mfiọk ke afo ukûtreke ndibian̄a abian̄a,+ ẹkenyụn̄ ẹkot fi ‘abiatibet toto ke idịbi.’+
9 Nyakara iyatesịt mi ke ntak enyịn̄ mi,+ ndien ke ntak itoro mi nyomụm idem n̄kama mban̄a fi mbak ẹdisịbe fi ẹfep.+
10 Sese! Mmanam fi asana, edi idịghe nte ẹnamde silver asana.+ Mmemek fi ke akwa ikan̄ ukụt.+
11 Ke ntak mi, ke ntak mi,+ ami nyanam n̄kpọ, koro owo anam didie ayak ẹsabade enye?+ Ndinyụn̄ nnọhọ baba owo kiet ubọn̄ mi.+
12 “Kpan̄ utọn̄ nọ mi, O Jacob, ye afo Israel, emi n̄kotde. Ami nsụk ndi Enye.+ Ami ndi akpa.+ Akan oro, ami ndi akpatre.+
13 Akan oro, ubọk mi ekesịn itiat idakisọn̄ ọnọ isọn̄,+ ubọk nnasia mi okonyụn̄ enen̄ede ikpaenyọn̄ enịm.+ Ami ke n̄kot mmọ, man kpukpru mmọ ẹkpesọn̄ọ ẹda.+
14 “Kpukpru mbufo ẹsop idem ọtọkiet ẹnyụn̄ ẹkop.+ Anie ke otu mmọ etịn̄ mme n̄kpọ emi? Jehovah ama enye.+ Enye ayanam ye Babylon nte enye amade,+ ubọk esie oyonyụn̄ odoro mbon Chaldea ke idem.+
15 Ami ndọhọ. Akan oro, mmokot enye.+ Mmada enye ndi, ẹyenyụn̄ ẹnam usụn̄ esie okụt unen.+
16 “Mbufo ẹsan̄a ẹkpere mi. Ẹkop emi. Toto ke editọn̄ọ ntiehe ke baba ebiet udịbe kiet ntịn̄ ikọ.+ Mmodu do toto ke ini enye eketịbede.”
Ndien ke emi Jehovah Akakan Ọbọn̄ Andikara ọmọdọn̄ mi ye spirit esie utom.+
17 Ntem ke Jehovah, Andifak+ fi, Edisana Abasi Israel,+ ọdọhọ ete: “Ami Jehovah, ndi Abasi fo, Enye emi ekpepde fi man afo ọbọ ufọn,+ Enye emi anamde fi asan̄a ke usụn̄ emi afo akpasan̄ade.+
18 Afo akpakam akpan̄ utọn̄ ke mme ewụhọ mi!+ Do emem fo ekpetie nte akpa mmọn̄,+ edinen ido fo okponyụn̄ etie nte mbufụt inyan̄.+
19 Ndien nditọ fo ẹkpekabade ẹwak nte ntan, ubon emi ẹwọrọde fi ke idịbi ẹkpenyụn̄ ẹwak nte n̄kwa ntan.+ Owo ikpesịbeke, ikponyụn̄ isọhike enyịn̄ owo ifep ke iso mi.”+
20 Mbufo ẹwọn̄ọ ke Babylon!+ Ẹfehe ẹbọhọ mbon Chaldea.+ Ẹtịn̄ ye n̄kpo idara, ẹnam ẹkop emi.+ Ẹnam enye ọwọrọ esịm utịt isọn̄.+ Ẹdọhọ ẹte: “Jehovah amafak Jacob asan̄autom esie.+
21 Ndien itọn̄ ikasatke+ mmọ ke ini emi enye akanamde mmọ ẹsan̄a ke desat+ ẹbe. Enye ama anam mmọn̄ ọwọrọ ke akwa itiat ọnọ mmọ, onyụn̄ asiak akwa itiat man mmọn̄ ọkpọwọrọ.”+
22 Jehovah ọdọhọ ete: “Emem idụhe inọ mme idiọkowo.”+
