James 5;1-20
5 Ke emi, ẹdi, mbufo mbon inyene,+ ẹtuan̄a, ẹfiori ẹban̄a nditaha oro edisịmde mbufo.+
2 Inyene mbufo omobu, utan̄kpọ omonyụn̄ ata ewụra mbufo.+
3 N̄karafan̄ amata gold ye silver mbufo, ndien n̄karafan̄ mmọ edidi ntiense aban̄a mbufo oyonyụn̄ ata mbufo obụkidem. N̄kpọ eke etiede nte ikan̄+ ke mbufo ẹbon+ ẹnọ mme akpatre usen.+
4 Sese! Okụkutom mme anamutom emi ẹkekpen̄ede ukpen̄e ke in̄wan̄ mbufo emi mbufo ẹmụmde ẹkama,+ ke ofiori,+ ndien mfiori emi mme ekpen̄e ukpen̄e ẹfioride ẹyom un̄wam+ odụk Jehovah mme udịm utọn̄.+
5 Mbufo ẹmedu inem uwem ke isọn̄ ẹnyụn̄ ẹbịne ndiyụhọ udọn̄ obụkidem.+ Mbufo ẹmebọk esịt mbufo ẹnam enyene isek ke usen n̄kpan̄a afai.+
6 Mbufo ẹmebiom edinen owo ikpe ẹnyụn̄ ẹwot enye. Nte enye ibiọn̄ọke mbufo?+
7 Ke ntre, nditọete, ẹme ime tutu esịm ini edidu+ Ọbọn̄. Sese! Ọtọin̄wan̄ etie ebet eti mbun̄wụm isọn̄, onyụn̄ eme ime ebet tutu enye okụt akpa edịm ye ukperedem edịm.+
8 Mbufo n̄ko ẹme ime;+ ẹnam esịt mbufo enyene iwụk, koro ini edidu Ọbọn̄ amasan̄a ekpere.+
9 Ẹkûkụni ẹban̄a kiet eken, nditọete, mbak owo edibiere ikpe+ ọnọ mbufo. Sese! Ebiereikpe ke adada ke enyịnusụn̄.+
10 Nditọete, ẹda mme prọfet+ emi ẹketịn̄de ikọ ke enyịn̄ Jehovah+ nte uwụtn̄kpọ+ ke ndibiom ukụt+ nnyụn̄ mme ime.+
11 Sese! nnyịn idọhọ ite ke mbon oro ẹkeyọde ukụt ẹkop inemesịt.+ Mbufo ẹmekop nte Job+ ọkọyọde ukụt, ẹmenyụn̄ ẹkụt utịp oro Jehovah ọkọnọde enye,+ nte ke Jehovah enen̄ede enyene esịt ima onyụn̄ atua owo mbọm.+
12 Ke akande kpukpru n̄kpọ, nditọete mi, ẹtre nditomo n̄kpọ; ẹkûtomo heaven m̀mê isọn̄ m̀mê n̄kpọ efen ekededi.+ Edi yak Ih mbufo edi Ih, Ihih mbufo onyụn̄ edi Ihih, mbak mbufo ẹdinyene ubiomikpe.+
13 Nte odu owo ekededi oro okụtde ukụt ke otu mbufo? Yak enye ọbọn̄ akam.+ Nte odu owo ekededi oro okopde inemesịt? Yak enye ọkwọ ikwọ itoro.+
14 Nte odu owo ekededi oro ọdọn̄ọde ke otu mbufo?+ Yak enye okot mbiowo+ esop ẹdi ẹbịne enye, ndien yak mmọ ẹbọn̄ akam ẹnọ enye, ẹda aran+ ẹyet enye ke enyịn̄ Jehovah.
15 Ndien akam mbuọtidem ayanam idem ọsọn̄ owo udọn̄ọ oro,+ ndien Jehovah eyemenede enye ke enyọn̄.+ N̄ko, edieke enye akanamde idiọkn̄kpọ, ẹyefen enye.+
16 Ke ntre ẹyarade+ idiọkn̄kpọ mbufo an̄wan̄wa ẹnọ kiet eken ẹnyụn̄ ẹbọn̄ akam ẹban̄a kiet eken, man ẹkọk udọn̄ọ mbufo.+ N̄kpeubọk edinen owo enyene odudu etieti ndinam n̄kpọ.+
17 Elijah ekedi owo emi n̄kpọ esitụkde nte nnyịn,+ edi enye ama ọbọn̄ akam ete edịm okûdep;+ ndien edịm ikedepke ke isọn̄ ke isua ita ye ọfiọn̄ itiokiet.
18 Enye afiak ọbọn̄ akam, ndien enyọn̄ edep edịm, isọn̄ onyụn̄ osion̄o mbun̄wụm.+
19 Nditọete mi, edieke ẹnamde owo ekededi ke otu mbufo otụn usụn̄ ọkpọn̄ akpanikọ ndien owo efen ada enye afiak edisịn,+
20 ẹfiọk ẹte ke owo emi anamde anamidiọk ọwọn̄ọde ọkpọn̄ ndudue+ esie ayanyan̄a ukpọn̄ esie osio ke n̄kpa+ oyonyụn̄ ofụk ekese idiọkn̄kpọ.+
