Jeremiah 12;1-17
12 O Jehovah, afo emenen,+ ke ini ntọtde ikọ mi nnọ fi, idem ke ini ntịn̄de mban̄a mme ikọ ikpe ye afo. Ntak emi usụn̄ mme idiọkowo okụtde unen,+ kpukpru mbon oro ẹbian̄ade abian̄a ẹnyụn̄ ẹdide mmọ eke mînyeneke mfịna?
2 Afo ọmọtọ mmọ; mmọ ẹmenyụn̄ ẹdọn̄ n̄kam. Mmọ ẹka iso; mmọ ẹsion̄o mfri n̄ko. Afo emekpere mmọ inua, edi omodu oyom usụn̄ ọkpọn̄ ekpụt mmọ.+
3 Edi afo, O Jehovah emetịm ọfiọk mi;+ afo omokụt mi, omonyụn̄ odụn̄ọde esịt mi ete ise m̀mê enye ekem ye afo.+ Dian̄ade mmọ nịm nte erọn̄ emi ẹyomde ndiwot,+ nyụn̄ sio mmọ nịm nọ usen eke ẹdiwotde.
4 Adan̄a didie ke isọn̄ ediyemede,+ ikọn̄ edinyụn̄ asat ke ofụri in̄wan̄?+ Ke ntak idiọkn̄kpọ mbon oro ẹdụn̄de ke esịt, ẹmekpọri mme unam ikọt ye mme edibotn̄kpọ emi ẹfede ke enyọn̄ ẹfep.+ Koro mmọ ẹdọhọde ẹte: “Enye ikwe ini iso nnyịn.”
5 Koro afo emetiene mbon emi ẹsan̄ade ke ukot efehe, ndien mmọ ẹyenam fi akpa mba, didie, ndien, ke afo ekeme ndifehe itọk ye mme enan̄-mbakara?+ Ndien nte afo ọbuọt idem ke isọn̄ emem?+ Ntre didie ke afo edinam n̄kpọ ke otu mme ọtọwọk ikọt oro ẹban̄de ke mben Jordan?+
6 Koro nditọete fo ye mbonufọk usọ ẹmekam ẹnam n̄kpọ ye afo ke abian̄a.+ Mmọ ẹmekam ẹdu fi ke edem ẹfiori ke ọkpọsọn̄ uyo ẹkot fi. Kûbuọt idem ye mmọ ke ntak emi mmọ ẹsiande fi nti n̄kpọ.+
7 “Mmọkpọn̄ ufọk mi;+ mmonyụn̄ n̄kpọn̄ udeme+ mi; mmayak enye emi ukpọn̄ mi amade nsịn mme asua esie ke ekaubọk.+
8 Udeme mi amakabade etie ye ami nte ekpe ke akai. Enye omofiori mi n̄kpo. Ntak edi oro nsuade enye.+
9 Udeme+ mi etie ye ami nte inuen utaokpo emi enyenede ediwak uduot; inuen utaokpo ẹmekan enye ẹkụk.+ Ẹdi, ẹdisop idem ọtọkiet, kpukpru mbufo mme unam ikọt; ẹda mmọ ẹdi man ẹdita.+
10 Ediwak mme ekpemerọn̄+ ẹmebiat in̄wan̄ vine mi;+ mmọ ẹmedịghi udeme mi.+ Mmọ ẹmenam udeme mi emi mmade+ akabade edi wilderness emi anade ndon.
11 Owo amanam enye akabade edi ndon;+ enye emeyemede; enye amakabade edi ndon ọnọ mi.+ Ẹmenam ofụri isọn̄ ana ndon, koro esịt+ owo baba kiet mîkereke iban̄a.
12 Mme andibụme ẹmeto ke kpukpru afan̄usụn̄ wilderness ẹdi. Koro akan̄kan̄ Jehovah ke osobo ọtọn̄ọde ke utịt isọn̄ kiet esịm utịt isọn̄ eken.+ Baba owo kiet inyeneke emem.
13 Mmọ ẹmetọ wheat, edi ẹkpen̄e n̄kukịm.+ Mmọ ẹmenam utom tutu ẹdọn̄ọ; mmọ idibọhọ ufọn.+ Bụt oyonyụn̄ anam mmọ aban̄a mbun̄wụm mbufo ke ntak ikan̄-ikan̄ iyatesịt Jehovah.”
14 Ntem ke Jehovah ọdọhọ aban̄a kpukpru ndiọi mbọhọidụn̄ mi,+ emi ẹtụkde udeme inyene emi n̄kanamde ikọt mi, kpa Israel, ẹda ẹnyene,+ ete: “Sese ami mmọn̄ ndịbede mmọ ke isọn̄ mmọ mfep;+ nyonyụn̄ ndịbede ufọk Judah ke otu mmọ mfep.+
15 Ndien ama ekem ke mma n̄kedịbede mmọ mma nyọtọn̄ọ ntak ntua mmọ mbọm+ nnyụn̄ nda mmọ mfiak ndi, owo kiet kiet ke udeme inyene esie ye owo kiet kiet ke udeme isọn̄ esie.”+
16 “Ndien ama ekem edieke mmọ ẹditịmde ẹkpep mme usụn̄ ikọt mi ke nditomo enyịn̄ mi,+ ẹte, ‘Ma uwem Jehovah!’ kpa nte mmọ ẹkekpepde ikọt mi nditomo Baal,+ ẹyesọn̄ọ ẹwụk mmọ ke otu ikọt mi.+
17 Edi edieke mmọ mîdikopke, ami nyedịbede idụt oro n̄ko, nyedịbede nnyụn̄ nsobo enye,”+ uyo Jehovah edi emi.
