Jeremiah 19;1-15
19 Ntem ke Jehovah ọdọhọ ete: “Ka kada aban̄ mbat oboteso+ ye ndusụk mbiowo ke otu mbio obio ye ndusụk mbiowo ke otu mme oku.
2 Nyụn̄ wọrọ ka itịghede eyen Hinnom,+ emi odude ke usụn̄ oro ẹsan̄ade ẹdụk Inuaotop Mbai Usiọn̄. Ndien do ke afo editan̄a mme ikọ oro nditịn̄de nnọ fi.+
3 Ndien afo enyene ndidọhọ ete, ‘Ẹkop uyo Jehovah, O mbufo ndidem Judah ye mbufo mme andidụn̄ Jerusalem.+ Ntem ke Jehovah mme udịm,+ Abasi Israel, ọdọhọ ete:
“‘“Sese ami mmọn̄ nda afanikọn̄ ntiene ebiet emi, emi edinamde utọn̄ aduat+ owo ekededi eke okopde;
4 ke ntak oro mmọ ẹkpọn̄de mi+ mînyụn̄ iyakke owo ọdiọn̄ọ+ ebiet emi, ẹnyụn̄ ẹnamde nsụn̄ikan̄ uwa ọwọrọ do ọdọk ọnọ mme abasi efen emi mmọ ye mme ete ete mmọ ye ndidem Judah mîkọfiọkke;+ mmọ ẹmenyụn̄ ẹda iyịp mbon oro mîduehe ẹyọhọ ebiet emi.+
5 Mmọ ẹnyụn̄ ẹbọp mme edikon̄ ebiet Baal man ẹfọp nditọiren mmọ ke ikan̄ ẹnọ Baal nte ofụri edifọp uwa,+ kpa n̄kpọ oro ami mmen̄kowụkke, mmen̄konyụn̄ ndọhọke,+ oro mîkonyụn̄ idụkke mi esịt.”’+
6 “‘“Mmọdo, sese! mme usen ke ẹdi,” uyo Jehovah edi emi, “oro owo mîdikotke aba ebiet emi Topheth+ ye itịghede eyen Hinnom,+ edi ẹdikot itịghede uwot owo.
7 Ndien ami nyanam uduak Judah ye eke Jerusalem okpu ke ebiet emi,+ nyonyụn̄ nnam mmọ ẹduọn̄ọ ke akan̄kan̄ ke iso mme asua mmọ ye ke ubọk mbon oro ẹyomde ukpọn̄ mmọ.+ Ndien nyada okpo mmọ nnọ mme edibotn̄kpọ emi ẹfede ke enyọn̄ ye unam ikọt ke isọn̄ nte udia.+
8 Nyonyụn̄ nnam obio emi edi n̄kpọ n̄kpaidem ye n̄kpọ oro ẹfride inụk ẹban̄a.+ Kpukpru owo oro ẹsan̄ade ẹbe ẹyese enye ke n̄kpaidem ẹnyụn̄ ẹfri inụk ẹban̄a kpukpru ufen esie.+
9 Ndien ami nyanam mmọ ẹta obụk nditọiren mmọ ye obụk nditọiban mmọ; mmọ kiet kiet ẹyeta obụk ekemmọ owo, ke ntak mbaba ye afanikọn̄ emi mme asua mmọ ye mbon oro ẹyomde ukpọn̄ mmọ ẹdikụkde mmọ ẹsịn.”’+
10 “Ndien afo enyene ndibom aban̄ oro ke iso mbon oro ẹsan̄ade ye afo.
11 Afo nyụn̄ dọhọ mmọ ete, ‘Ntem ke Jehovah mme udịm ọdọhọ ete: “Kpa ntem ke ami ndibom mme owo emi ye obio emi kpa nte owo obomde eso oboteso tutu owo ikemeke aba ndidiọn̄ enye;+ ndien mmọ ẹyebụk owo ke Topheth+ tutu itie idụhe aba ndibụk owo.”’+
12 “‘Ntem ke ndinam ye ebiet emi ye mme andidụn̄ ke esịt,’ uyo Jehovah edi emi, ‘nyanam ye obio emi kpa nte n̄kanamde ye Topheth.+
13 Ndien mme ufọk Jerusalem ye mme ufọk ndidem Judah ẹyekabade ẹtie nte ebiet Topheth,+ mbon oro ẹdehede, oro edi, kpukpru ufọk ke mme enyọn̄ ọkọm emi mmọ ẹnamde nsụn̄ikan̄ uwa ọwọrọ ọdọk ọnọ ofụri udịm enyọn̄,+ ẹnyụn̄ ẹn̄wan̄ade edin̄wọn̄ uwa ẹduọk ẹnọ mme abasi efen.’”+
14 Ndien Jeremiah oto Topheth+ emi Jehovah ọkọdọn̄de enye eketịn̄ ntịn̄nnịm ikọ edi, onyụn̄ edida ke okụre ufọk Jehovah ọdọhọ kpukpru owo ete:+
15 “Ntem ke Jehovah mme udịm, Abasi Israel, ọdọhọ ete, ‘Sese ami mmọn̄ nda kpukpru afanikọn̄ oro n̄kọdọhọde mban̄a obio emi ye kpukpru mme obio esie ntiene enye, koro mmọ ẹmesọn̄ obotitọn̄ man ẹkûkop ikọ mi.’”+
