Jeremiah 20;1-18
20 Ndien Pashhur eyen Immer,+ oku, emi ekedide n̄ko akpan etubom ke ufọk Jehovah,+ osụk akpan̄ utọn̄ ọnọ Jeremiah ke adan̄aemi enye etịn̄de ntịn̄nnịm ikọ emi.
2 Ekem Pashhur amia prọfet+ Jeremiah onyụn̄ esịn enye ke ebuka+ oro okodude ke Enyọn̄ Enyọn̄ Inuaotop Benjamin, emi okodude ke ufọk Jehovah.
3 Edi ke ndan̄nsiere Pashhur osio Jeremiah ke ebuka,+ ndien Jeremiah ọdọhọ enye ete:
“Jehovah ikotke fi aba ke enyịn̄+ fo Pashhur, edi okot Ndịk odu akan okụk.*+
4 Koro ntem ke Jehovah ọdọhọ ete, ‘Sese ami mmọn̄ nnam fi edi n̄kpọndịk ọnọ idemfo ye kpukpru mbon ima fo, ndien mmọ ẹyeduọn̄ọ ke akan̄kan̄ mme asua+ mmọ ke adan̄aemi enyịn fo osụk esede;+ nyonyụn̄ nyak ofụri Judah nsịn ke ubọk edidem Babylon, ndien enye ayatan̄ mmọ aka ntan̄mfep ke Babylon onyụn̄ owot mmọ ke akan̄kan̄.+
5 Ndien ami nyayak kpukpru n̄kpọ emi ẹkebonde ke obio emi ye kpukpru n̄kpọ oro ẹkenamde ke esịt ye kpukpru mme ọsọn̄urua n̄kpọ esie nnọ; nyonyụn̄ nyak kpukpru n̄kpọuto ndidem Judah nsịn ke ubọk mme asua mmọ.+ Ndien mmọ ẹyebụme mmọ ẹnyụn̄ ẹtan̄ mmọ ẹnyụn̄ ẹda mmọ ẹka Babylon.+
6 Ndien amaedi afo, O Pashhur, ye kpukpru mbon oro ẹdụn̄de ke ufọk fo, mbufo ẹyeka ntan̄mfep;+ afo oyonyụn̄ aka Babylon ndien do ke afo edikpa, do ke ẹdinyụn̄ ẹbụk fi ye kpukpru mbon ima fo,+ koro afo etịn̄de nsunsu ntịn̄nnịm ikọ ọnọ mmọ.’”+
7 Afo amanam idem akpa mi, O Jehovah, tutu n̄kop n̄kpaidem. Afo amada odudu fo an̄wana ye ami, onyụn̄ akan.+ Mmakabade ndi n̄kpọ nsahi ofụri usen; kpukpru owo ke ẹsak mi.+
8 Koro adan̄a ini nte ntịn̄de ikọ, ami mfiori n̄kpo. Afai ye mbụme ke ami mfiori n̄kot.+ Koro ikọ Jehovah akabade edi se ẹdade ẹsuene mi ye se ẹdade ẹsak mi nsahi ofụri usen.+
9 Ndien ndọhọ nte: “Ami nditịn̄ke mban̄a enye, ndinyụn̄ ntịn̄ke aba ikọ ke enyịn̄ esie.”+ Ndien ke esịt mi enye akabade etie nte ikan̄ eke esịnede mi ke ọkpọ asak; ndien ami n̄kpa mba ndimụm enye n̄kama, nnyụn̄ n̄kemeke aba ndiyọ.+
10 Koro mmokop idiọk etop nto ediwak owo.+ Ndịk odu akan okụk. “Ẹtịn̄, man nnyịn ikpetịn̄ iban̄a enye.”+ Kpukpru owo eke ẹdọhọde mi “Emem!”—mmọ ke ẹse ẹyom ndikụt iduọ mi:+ “Ndusụk ẹyebian̄a enye,+ man nnyịn ikpakan enye inyụn̄ isio enye usiene.”
11 Edi Jehovah odu ye ami+ nte ọkpọsọn̄ owo oro enyenede ndịk.+ Ntak edi oro mmọ eke ẹkọbọde mi ẹdituakde ukot ẹduọn̄ọ mîdinyụn̄ ikanke.+ Ẹyenam mmọ ẹdia bụt, koro mmọ idikwe unen. Owo idifreke nsinsi esuene mmọ.+
12 O Jehovah mme udịm, edi afo odụn̄ọde edinen owo;+ afo omokụt mme ekpụt ye esịt.+ Ami n̄kpakam n̄kụt usiene emi afo osiode mmọ,+ koro edi afo ke nyarade ikpe mi nnọ.+
13 Mbufo ẹkwọ ẹnọ Jehovah! Ẹtoro Jehovah! Koro enye amanyan̄a ukpọn̄ ubuene osio ke ubọk mme anamidiọk.+
14 Ọdọdiọk ọnọ usen oro n̄kamanade! Yak ẹkûdiọn̄ usen oro eka mi akamande mi!+
15 Ọdọdiọk ọnọ owo oro akadade eti mbụk ọsọk ete mi, ete: “Eyeneren, erenowo, amana ọnọ fi!” Enye ama anam enye enen̄ede adat esịt.+
16 Ndien yak owo oro akabade etie nte mme obio oro Jehovah okosobode mînyụn̄ ituaha n̄kpọfiọk.+ Ndien enye oyokop eseme ke usenubọk ye n̄kpo ekọn̄ ke ufọt uwemeyo.+
17 Ntak emi enye mîkowotke mi ke itie eyen, man eka mi akpakabade edi udi mi, enye okponyụn̄ oyomo mi ke itie eyen ke nsinsi?+
18 Ntak emi n̄kọwọrọde ke itie eyen+ man ndikụt ọkpọsọn̄ utom ye mfụhọ,+ mme usen mi ẹkpenyụn̄ ẹsịm utịt ke bụt?+
Mme Ikọ Idakisọn̄
^ M̀mê, “Magormissabib.”
