Jeremiah 3;1-25
3 Ẹsidọhọ ẹte: “Edieke owo osiode n̄wan esie ndọ ndien n̄wan oro ọkpọn̄ enye ọkọdọ owo en̄wen, nte enye akpafiak ọkọdọ n̄wan oro?”+
Nte owo inamke isọn̄ oro edehe?+
“Ndien afo amasan̄a akpara ye ediwak nsan̄a;+ ndien nte akpafiak etiene mi?”+ uyo Jehovah edi emi.
2 “Menede enyịn fo se mme afan̄usụn̄.+ M̀mọ̀n̄ ke owo mîdan̄ke fi ke n̄kanubọk?+ Afo emetie ke mbenusụn̄ ebet mmọ, kpa nte owo Arabia etiede ke wilderness;+ ndien afo ada mme edinam usan̄a akpara fo ye idiọkn̄kpọ fo edehe isọn̄.+
3 Ntre ẹmemụm edịm ẹkama,+ edịm ini utọ inyụn̄ idepke.+ Ndien ọkpọiso fo amakabade etie nte ọkpọiso n̄wan akpara. Afo emesịn nditie nte owo eke ẹsuenede.+
4 Afo ke emi ọmọtọn̄ọ ndikot mi, ‘Ete mi,+ afo edi akpan ufan ini uyen+ mi!
5 Nte owo okposụk ayat esịt ke nsinsi, m̀mê osụk ese n̄kpọ ke nsinsi?’+ Sese! Afo ọmọdọhọ, omonyụn̄ aka akanam ndiọi n̄kpọ onyụn̄ okụt unen.”+
6 Ndien Jehovah ọdọhọ mi ke eyo edidem Josiah,+ ete: “‘Nte omokụt se Israel oro mînamke akpanikọ anamde?+ Enye ke ọdọk kpukpru mme edikon̄ obot+ onyụn̄ odụk idak kpukpru eto eke ẹsehede,+ man enye akpasan̄a akpara do.+
7 Ndien ke enye ama akanam kpukpru n̄kpọ emi ama, mma ndọhọ enye afiak etiene mi, edi enye ikafiakke idi;+ ndien Judah osụk esese abian̄a-abian̄a eyeneka esie an̄wan.+
8 Ke ini n̄kokụtde oro, ke ntak oro Israel emi mînamke akpanikọ ekesịnde efịbe, ami mma mbịn enye mfep+ nnyụn̄ nnọ enye n̄wed usiondọ ndisio enye ndọ ọyọhọ ọyọhọ,+ kpa ye oro Judah, abian̄a-abian̄a eyeneka esie an̄wan, ikefeheke ndịk, edi enye n̄ko ama ọtọn̄ọ ndiwọrọ nsan̄a akpara.+
9 Ndien ndisịme ekikere esie ekesịn enye asan̄a akpara, enye onyụn̄ edehe isọn̄+ onyụn̄ esịn efịbe ye mme itiat ye mme eto;+
10 ndien kpukpru emi ikakam inamke Judah, abian̄a-abian̄a eyeneka esie an̄wan, afiak etiene mi ke ofụri esịt+ esie, ibọhọke ke abian̄a,’+ uyo Jehovah edi emi.”
11 Ndien Jehovah ọdọhọ mi ete: “Israel oro mînamke akpanikọ owụt ke ukpọn̄ imọ enen akan Judah emi abian̄ade abian̄a.+
12 Ka, katan̄a mme ikọ emi ke edem edere+ nyụn̄ dọhọ ete:
“‘“Fiak di, O Israel mbon nsọn̄ibuot,” uyo Jehovah edi emi.’+ ‘“Ami ndibọpke iso ye mbufo ke iyatesịt,+ koro ami ndide owo nsọn̄ọnda,”+ uyo Jehovah edi emi.’ ‘“Ami ndikaha iso nyat esịt ke nsinsi.+
13 Kam kere ban̄a ndudue fo, koro edi Jehovah Abasi fo ke afo edue.+ Ndien afo asuan mme usụn̄ fo esịm isenowo+ ke idak kpukpru eto eke ẹsehede,+ edi mbufo ikopke uyo mi,” uyo Jehovah edi emi.’”
14 “Ẹfiak ẹdi, O mbufo nditọ nsọn̄ibuot,”+ uyo Jehovah edi emi. “Koro ami mmakabade ndi ebe mbufo;+ ndien ami nyada mbufo, owo kiet ke obio ye owo iba ke ubon, nyonyụn̄ nda mbufo ndi Zion.+
15 Ndien ami nyọnọ mbufo mme ekpemerọn̄ eke esịt mi amade,+ mmọ ẹyenyụn̄ ẹda ifiọk ye ikike ẹbọk mbufo.+
16 Ndien ama ekem, mbufo ẹyewak ẹnyụn̄ ẹn̄wụm mfri ke isọn̄ ke mme usen oro,” uyo Jehovah edi emi.+ “Mmọ ididọhọke aba ite, ‘Ekebe ediomi Jehovah!’+ enye idinyụn̄ idụkke mmọ esịt, mmọ iditịghi enye+ m̀mê ndiyom enye, owo idinyụn̄ inamke enye aba.
17 Ke ini oro mmọ ẹyekot Jerusalem ebekpo Jehovah;+ ẹyenyụn̄ ẹtan̄ kpukpru mme idụt ẹbon ọtọkiet ẹnọ enye,+ ẹnọ enyịn̄ Jehovah ke Jerusalem,+ ndien mmọ idisan̄ake aba ke itụn idiọk esịt mmọ.”+
18 “Ke mme usen oro ufọk Judah ẹyesan̄a kiet ye ufọk Israel,+ mmọ ẹyenyụn̄ ẹsan̄a kiet+ ẹwọrọ ke isọn̄ edem edere ẹdụk isọn̄ oro ami n̄kọnọde mme ete ete mbufo nte udeme inyene.+
19 Ndien ami ndọhọ nte, ‘Sese nte nnịmde fi ke otu nditọ nnyụn̄ nnọde fi eti isọn̄,+ kpa udeme inyene n̄kpọmbana udịmekọn̄ mme idụt!’ Ndien ami ndọhọ n̄ko nte, ‘Mbufo ẹyefiori ẹkot mi, “Ete mi!”+ mbufo idinyụn̄ ifiakke edem itre nditiene mi.’
20 ‘Ke akpanikọ kpa nte n̄wanndọ ke abian̄a ọkpọn̄de nsan̄a esie,+ kpasụk ntre ke mbufo, O ufọk Israel, ẹnam n̄kpọ ye ami ke abian̄a,’+ uyo Jehovah edi emi.”
21 Ẹmekop uyom, ntuan̄a, ye eseme nditọ Israel ke mme afan̄usụn̄. Koro mmọ ẹmekwan̄a usụn̄ mmọ;+ mmọ ẹmefre Jehovah Abasi mmọ.+
22 “Ẹfiak ẹdi, mbufo nditọ nsọn̄ibuot.+ Ami nyọkọk nsọn̄ibuot mbufo.”+
“Se nnyịn mi! Nnyịn imedi ibịne fi, koro afo, O Jehovah, edide Abasi nnyịn.+
23 Ke akpanikọ n̄kpri obot ọkọrọ ye ndutịme ke ikpọ obot+ ẹdi nsu.+ Ke akpanikọ Jehovah Abasi nnyịn edi edinyan̄a Israel.+
24 Edi n̄kpọ bụt+ amadia utom mme ete ete nnyịn toto ke ini uyen nnyịn, erọn̄ mmọ ye enan̄ mmọ, nditọiren mmọ ye nditọiban mmọ.
25 Nnyịn imosụhọde ina ke bụt+ nnyịn, esuene oro ẹsuenede nnyịn onyụn̄ ofụk nnyịn;+ koro edi Jehovah Abasi nnyịn ke nnyịn inam idiọkn̄kpọ idue,+ nnyịn ye mme ete nnyịn toto ke ini uyen nnyịn tutu esịm mfịn emi,+ nnyịn inyụn̄ ikopke uyo Jehovah Abasi nnyịn.”+
