Jeremiah 32;1-44
32 Uyo emi okoto Jehovah esịm Jeremiah ke ọyọhọ isua duop emi Zedekiah edidem Judah akarade,+ oro edi, ọyọhọ isua efịteta emi Nebuchadrezzar akarade.+
2 Ke ini oro udịmekọn̄ edidem Babylon ẹma ẹkan Jerusalem ẹkụk;+ ndien amaedi prọfet Jeremiah, ẹma ẹkọbi enye ẹbaha ke Okụre Ufọk Ukpeme+ emi odude ke ufọk edidem Judah;
3 koro Zedekiah edidem Judah ama akpan enye,+ ete:
“Ntak emi afo etịn̄de ntịn̄nnịm ikọ+ ete, ‘Ntem ke Jehovah ọdọhọ ete: “Sese ami mmọn̄ nyak obio emi nsịn ke ubọk edidem Babylon, enye idinyụn̄ itreke ndikan enye;+
4 ndien Zedekiah, edidem Judah, idifeheke ibọhọ ubọk mbon Chaldea, koro owo iditreke ndiyak enye nsịn ke ubọk edidem Babylon, ndien inua esie eyetịn̄ ikọ ye inua enye oro, enyịn esie oyonyụn̄ okụt enyịn enye oro”’;+
5 ‘ndien enye ayada Zedekiah aka Babylon, enye oyonyụn̄ odu do tutu ami n̄wọn̄ọde ntịn̄enyịn mi nnọ enye,’+ uyo Jehovah edi emi; ‘okposụkedi mbufo ẹdin̄wanade ye mbon Chaldea, mbufo idikwe unen’?”+
6 Ndien Jeremiah ọdọhọ ete: “Uyo Jehovah emesịm mi, ete,
7 ‘Sese Hanamel eyen Shallum, eyeneka ete fo eren, ke edi ebịne fi edidọhọ ete: “Dep in̄wan̄ mi emi odude ke Anathoth+ nọ idemfo, koro edi afo enyene unen ndifak ke ndidep enye.”’”+
8 Ekem Hanamel eyen eyeneka ete mi odụk ebịne mi, nte ekemde ye uyo Jehovah, ke Okụre Ufọk Ukpeme,+ onyụn̄ edidọhọ mi ete: “Mbọk, dep in̄wan̄ mi emi odude ke Anathoth,+ emi odude ke isọn̄ Benjamin,+ koro unen udeme inyene edi okwo, afo onyụn̄ enyene unen ndifak enye. Dep enye nọ idemfo.” Ntem ke mfiọk ke emi ekedi uyo Jehovah.+
9 Ndien ami mbọ Hanamel,+ eyen eyeneka ete mi, in̄wan̄ oro odude ke Anathoth+ ndep. Ami nnyụn̄ ndomo okụk+ nnọ enye, shekel itiaba ye mbak silver duop.
10 Ekem ami n̄wet ke n̄wed ediomi+ nnyụn̄ ndian ufịkn̄kpọ+ ke esịt ndien nda mme ntiense+ ke ini ndomode+ okụk oro ke udomon̄kpọ.
11 Ke oro ebede ami nda n̄wed ediomi udep oro, enye oro ẹkediande ufịkn̄kpọ nte ekemde ye ibet ye mme ewụhọ,+ ye enye oro owo mîkadianke ufịkn̄kpọ;
12 ndien ekem ami nyak n̄wed ediomi udep oro nnọ Baruch+ eyen Neriah+ eyen Mahseiah ke iso Hanamel eyen eyeneka ete mi ye ke iso mme ntiense, mmọ oro ẹwetde ke n̄wed ediomi udep,+ ke iso kpukpru mme Jew emi ẹketiede ke Okụre Ufọk Ukpeme.+
13 Ekem nteme Baruch ke iso mmọ, nte:
14 “Ntem ke Jehovah mme udịm, Abasi Israel, ọdọhọ ete, ‘Da n̄wed ediomi emi, n̄wed ediomi udep emi, enye oro ẹdiande ufịkn̄kpọ, ye n̄wed ediomi oro owo mîdianke ufịkn̄kpọ,+ nyụn̄ dọn̄ mmọ ke aban̄ mbat, man mmọ ẹkpebịghi ke ediwak usen.’
15 Koro ntem ke Jehovah mme udịm, kpa Abasi Israel, ọdọhọ ete, ‘Ẹyetọn̄ọ ntak ẹdep mme ufọk ye mme in̄wan̄ ye mme in̄wan̄ vine ke isọn̄ emi.’”+
16 Ndien ke mma n̄kayak n̄wed ediomi udep oro nnọ Baruch+ eyen Neriah,+ ami mbọn̄ akam+ nnọ Jehovah nte:
17 “O Jehovah Akakan Ọbọn̄ Andikara!+ Sese, edi afo akada akwa odudu+ fo ye edinyanade ubọk+ fo anam enyọn̄ ye isọn̄. Ofụri n̄kpọ emi isọn̄ke ikan fi,+
18 Enye emi owụtde ediwak tọsịn owo ima-mfọnido,+ onyụn̄ emende usiene ndudue mme ete esịn ke ikpanesịt nditọ mmọ emi ẹtienede mmọ edem,+ ata Abasi, akwa Abasi,+ ọkpọsọn̄ Abasi,+ Jehovah mme udịm+ edi enyịn̄+ esie,
19 emi uduak+ esie okponde, mme edinam esie ẹnyụn̄ ẹwakde,+ afo emi atatde enyịn ese kpukpru usụn̄ nditọ owo,+ man ọnọ owo kiet kiet nte ekemde ye mme usụn̄ esie ye nte ekemde ye utịp utom esie;+
20 afo emi enịmde mme idiọn̄ọ ye mme utịben̄kpọ ke isọn̄ Egypt tutu esịm mfịn emi onyụn̄ enịmde ke Israel ye ke otu mme owo,+ man akpanam enyịn̄ ọnọ idemfo, kpa nte edide mfịn emi.+
21 Ndien afo ada mme idiọn̄ọ ye mme utịben̄kpọ+ ye ọkpọsọn̄ ubọk ye edinyanade ubọk ye ikpọ n̄kpọndịk+ osion̄o ikọt fo Israel ke isọn̄ Egypt.+
22 “Nte ini akade afo ama ọnọ mmọ isọn̄ emi ọkọn̄wọn̄ọde ndinọ mme ete ete mmọ,+ kpa isọn̄ emi ọfiọrọde mmọn̄eba ye aranọkwọk.+
23 Ndien mmọ ẹdụk ẹdida enye ẹnyene,+ edi mmọ ikopke uyo fo inyụn̄ isan̄ake ke ibet fo.+ Kpukpru n̄kpọ oro afo okowụkde mmọ ete ẹnam mmọ inamke,+ ntre afo anam kpukpru afanikọn̄ emi ẹsịm mmọ.+
24 Sese! Mme owo ẹmedi ndikịbi ibombom+ n̄kan obio emi n̄kụk nnyụn̄ n̄kan enye,+ ẹyenyụn̄ ẹyak obio emi esịn ke ubọk mbon Chaldea emi ẹn̄wanade ye enye,+ ke ntak akan̄kan̄+ ye akan̄+ ye idiọk udọn̄ọ;+ ndien se afo ọkọdọhọde emetịbe, afo omonyụn̄ okụt enye.+
25 Edi afo, O Jehovah Akakan Ọbọn̄ Andikara, ọdọhọ mi ete, ‘Da okụk+ dep in̄wan̄ nọ idemfo nyụn̄ da mme ntiense,’+ okposụkedi emi ẹdiyakde obio emi ẹsịn ke ubọk mbon Chaldea.”+
26 Ndien uyo Jehovah esịm Jeremiah, ete:
27 “Sese ami ndi Jehovah, Abasi kpukpru obụkidem.+ Nte odu n̄kpọ ekededi eke ọsọn̄de akan mi?+
28 Mmọdo ntem ke Jehovah ọdọhọ ete, ‘Sese ami mmọn̄ nyak obio emi nsịn ke ubọk mbon Chaldea ye ke ubọk Nebuchadrezzar edidem Babylon, ndien enye ayakan enye.+
29 Ndien mbon Chaldea emi ẹn̄wanade ye obio emi ẹyedụk ẹdikịm ikan̄ ke obio emi ẹnyụn̄ ẹfọp+ enye ye mme ufọk emi ẹdude ke enyọn̄ ọkọm, emi mmọ ẹsinamde nsụn̄ikan̄ uwa ọwọrọ ọdọk ọnọ Baal ẹnyụn̄ ẹn̄wan̄ade edin̄wọn̄ uwa ẹduọk ẹnọ mme abasi efen man ẹyat mi esịt.’+
30 “‘Koro nditọ Israel ye nditọ Judah ẹmekabade ẹdi mbon oro ẹnamde se idiọkde ke enyịn mi toto ke uyen mmọ;+ koro nditọ Israel ke ẹkam ẹda utom ubọk mmọ ẹyat mi esịt,’+ uyo Jehovah edi emi.
31 ‘Koro obio emi, toto ke usen oro ẹkebọpde enye tutu esịm mfịn emi, idịghe n̄kpọ ndomokiet inọ mi ikan n̄kpọ iyatesịt+ ye n̄kpọ ifụtesịt, man ẹmen enye ẹfep ke iso mi,+
32 ke ntak kpukpru mme idiọkn̄kpọ emi nditọ Israel+ ye nditọ Judah+ ẹnamde man ẹyat mi esịt,+ mmọ ye ndidem+ mmọ ye mbọn̄+ mmọ ye mme oku+ mmọ ye mme prọfet+ mmọ ye irenowo Judah ye mme andidụn̄ Jerusalem.
33 Ndien mmọ ẹwọn̄ọde edem ẹwụt mi iwọn̄ọkede iso;+ okposụkedi emi ẹkenọde mmọ ukpep, ẹbabak ẹdemede ẹnọ mmọ ukpep, edi baba owo mmọ kiet ikpan̄ke utọn̄ man ọbọ ntụnọ.+
34 Ndien mmọ ẹnịm mbubiam n̄kpọ mmọ ke ufọk oro ẹkotde ẹdian enyịn̄ mi, man ẹsabade enye.+
35 N̄ko-n̄ko, mmọ ẹma ẹbọp mme edikon̄ ebiet Baal+ emi ẹdude ke itịghede eyen Hinnom,+ man ẹfọp nditọiren mmọ ye nditọiban ke ikan̄*+ ẹnọ Molech,+ kpa n̄kpọ oro mmen̄kewụkke mmọ+ mîkonyụn̄ idụkke mi esịt ite ẹnam mbubiam n̄kpọ emi,+ man ẹnam Judah anam idiọkn̄kpọ.’+
36 “Ndien ke emi, ntem ke Jehovah Abasi Israel ọdọhọ aban̄a obio emi, emi mbufo ẹdọhọde ke ẹyeyak ẹsịn edidem Babylon ke ubọk ebe ke akan̄kan̄ ye ke akan̄ ye ke idiọk udọn̄ọ,+
37 ‘Sese ami mmọn̄ ntan̄ mmọ ke kpukpru mme idụt oro iyatesịt mi ye ifụtesịt mi ye akwa ikpahaesịt mi akanamde mbịn mmọ ndọn̄, mbon ọtọkiet;+ ndien nyada mmọ mfiak ndi ebiet emi nnyụn̄ nnam mmọ ẹdụn̄ ke ifụre.+
38 Ndien mmọ ẹyedi ikọt mi,+ ami nyonyụn̄ ndi Abasi mmọ.+
39 Ndien ami nyọnọ mmọ esịt+ kiet ye usụn̄ kiet man mmọ ẹkpebak mi kpukpru ini, man ọkpọfọn ye mmọ ye nditọ mmọ emi ẹtienede mmọ edem.+
40 Ndien ami nyodiomi nsinsi ediomi ye mmọ,+ nte ke ndiwọn̄ọkede n̄kpọn̄ mmọ, man nnam se ifọnde ye mmọ;+ nyonyụn̄ nsịn ndịk mi ke esịt mmọ mbak mmọ ẹdiwọn̄ọde ẹkpọn̄ mi.+
41 Ndien nyadara mban̄a mmọ man nnam se ifọnde ye mmọ,+ nyonyụn̄ ntọ mmọ ke isọn̄+ emi ke akpanikọ ke ofụri esịt mi ye ke ofụri ukpọn̄ mi.’”
42 “Koro ntem ke Jehovah ọdọhọ ete, ‘Kpa nte n̄kadade ofụri akwa afanikọn̄ emi ntiene mbon emi, kpasụk ntre ke ami ndida ofụri nti n̄kpọ oro ndọhọde mban̄a mmọ ntiene mmọ.+
43 Ndien ẹyedep mme in̄wan̄ ke isọn̄+ emi, emi mbufo ẹdidọhọde ẹte: “Enye edi ndon,+ owo ye ufene inyụn̄ idụhe ke esịt. Ẹmeyak enye ẹsịn ke ubọk mbon Chaldea.”’+
44 “‘Mme owo ẹyeda okụk ẹdep in̄wan̄, ẹnyụn̄ ẹwet ke n̄wed ediomi+ ẹnyụn̄ ẹdian ufịkn̄kpọ ẹnyụn̄ ẹda mme ntiense+ ke isọn̄ Benjamin+ ye ke n̄kann̄kụk Jerusalem+ ye ke mme obio Judah+ ye ke mme obio oro ẹdude ke ikpehe emi etiede obot obot ye ke mme obio unaisọn̄+ ye ke mme obio edem usụk,+ koro ami nyada ikọt mmọ emi ẹkemụmde nte mbuotekọn̄ mfiak ndi,’+ uyo Jehovah edi emi.”
Mme Ikọ Idakisọn̄
^ At. Ed., “anam nditọiren esie ye nditọiban esie ẹbe ke ikan̄.”
