Jeremiah 39;1-18
39 Ke ọyọhọ isua usụkkiet emi Zedekiah edidem Judah akarade, ke ọyọhọ ọfiọn̄ duop,+ Nebuchadrezzar edidem Babylon ye ofụri udịmekọn̄ esie ẹdi Jerusalem ẹdikan enye ẹkụk.+
2 Ke ọyọhọ isua duopekiet emi Zedekiah akarade, ke ọyọhọ ọfiọn̄ inan̄, ke ọyọhọ usen usụkkiet ke ọfiọn̄ oro, ẹbụn̄ obio ẹdụk.+
3 Ndien kpukpru mbọn̄ edidem Babylon ẹdụk ẹdi, oro edi, Nergal-sharezer, Samgar-nebo, Sarsechim, Rabsaris, Nergal-sharezer kpa Rabmag ye kpukpru mbọn̄ edidem Babylon eken, ẹnyụn̄ ẹdisụhọde ẹtie ke Ufọt Inuaotop.+
4 Edikem ke ndondo oro Zedekiah edidem Judah ye kpukpru mbonekọn̄ ẹkụtde mmọ, mmọ ẹfen̄e ẹwọn̄ọ+ ke obio ke okoneyo, ẹsan̄a usụn̄ in̄wan̄esa edidem,+ ẹbe inuaotop emi odude ke ufọt ibibene iba; mmọ ẹnyụn̄ ẹsan̄a usụn̄ Arabah+ ẹwọn̄ọ.
5 Ndien udịmekọn̄ mbon Chaldea ẹbịne mmọ,+ ẹnyụn̄ ẹkesịm Zedekiah ke unaisọn̄ desat Jericho.+ Ekem mmọ ẹmụm enye ẹnyụn̄ ẹda enye ẹdọk ẹsọk Nebuchadrezzar edidem Babylon ke Riblah+ ke isọn̄ Hamath+ man enye ekpebiere ikpe ọnọ enye.+
6 Ndien edidem Babylon owot+ nditọiren Zedekiah ke Riblah ke iso esie,+ edidem Babylon onyụn̄ owot kpukpru mbọn̄ Judah.+
7 Ndien enye etịbi Zedekiah enyịn,+ ekem enye ọkọbi enye ke ebuka okpoho, man akpada enye edi Babylon.
8 Ndien mbon Chaldea ẹfọp ufọk edidem ye ufọk mme owo ke ikan̄,+ mmọ ẹnyụn̄ ẹwụri mme ibibene Jerusalem.+
9 Ndien amaedi mbon eken oro ẹkeyakde ẹsụhọ ke obio, ye mbon oro ẹkedian̄arede ẹda ẹnyụn̄ ẹwọn̄ọde ẹtiene enye, ye mbon eken oro ẹkeyakde ẹsụhọ, Nebuzaradan+ etubom mbon ukpeme+ atan̄ mmọ aka ntan̄mfep ke Babylon.+
10 Ndien Nebuzaradan etubom mbon ukpeme, ayak ndusụk owo, kpa mme usụhọde owo oro mîkenyeneke baba n̄kpọ kiet, ẹsụhọ ke isọn̄ Judah;+ enye onyụn̄ ọnọ mmọ in̄wan̄ vine ye n̄kpọsọn̄ utom ke usen oro.+
11 N̄ko-n̄ko, Nebuchadrezzar edidem Babylon ọnọ Nebuzaradan etubom mbon ukpeme ewụhọ aban̄a Jeremiah, ete:
12 “Da enye nyụn̄ tịn̄ enyịn se enye, kûnyụn̄ unam enye baba idiọkn̄kpọ kiet.+ Edi nam ye enye kpa nte enye edidọhọde fi.”+
13 Ntem Nebuzaradan etubom mbon ukpeme ye Nebushazban+ kpa Rabsaris, ye Nergal-sharezer kpa Rabmag ye kpukpru mme akpan owo edidem Babylon ẹdọn̄;
14 ndien mmọ ẹdọn̄ ẹkesio Jeremiah ke Okụre Ufọk Ukpeme+ ẹdi ẹnyụn̄ ẹyak enye ẹnọ Gedaliah+ eyen Ahikam+ eyen Shaphan,+ man akpada enye aka ufọk esie, enye okponyụn̄ odụn̄ ke otu mbio obio.
15 Ndien uyo Jehovah esịm Jeremiah ke adan̄aemi ẹkọbide enye ẹbaha ke Okụre Ufọk Ukpeme,+ ete:
16 “Ka kọdọhọ Ebed-melech+ owo Ethiopia, ete, ‘Ntem ke Jehovah mme udịm, Abasi Israel, ọdọhọ ete: “Sese ami mmọn̄ nnam ikọ mi osu obio emi ke idem kaban̄a afanikọn̄ idịghe kaban̄a eti,+ ndien mmọ ẹyesu ke iso fo ke usen oro.”’+
17 “‘Ndien ami nyanyan̄a fi ke usen oro,’+ uyo Jehovah edi emi, ‘ndien owo idiyakke fi isịn ke ubọk mbon oro afo okopde ndịk aban̄a.’+
18 “‘Koro ami nditreke ndinam fi ọbọhọ, afo udunyụn̄ uduọhọ ke akan̄kan̄; ndien afo ayada ukpọn̄ fo enyene nte n̄kpọ mbụme,+ koro afo ọbuọtde idem ye ami,’ uyo Jehovah edi emi.”+
